Marekani yataka Iran iwekewe upya vikwazo | Matukio ya Kisiasa | DW | 21.08.2020
  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages
Matangazo

Matukio ya Kisiasa

Marekani yataka Iran iwekewe upya vikwazo

Marekani imeufahamisha rasmi Umoja wa Mataifa kuhusiana na matakwa yake ya vikwazo kwa Iran virudishwe. Hayo yamepelekea upinzani kutoka kwa Urusi na wanachama wengine wa Baraza la Usalama la Umoja wa Mataifa.

Marafiki wa Marekani kutoka Ulaya pia wameonyesha upinzani, wakiitaja hatua hiyo kuwa kinyume cha sheria.

Waziri wa mambo ya nje wa Marekani Mike Pompeo amemfahamisha rais wa Baraza hilo la Usalama akisema Iran imekiuka pakubwa mkataba wa mwaka 2015 wa nyuklia jambo linalotoa nafasi ya kuwekwa vikwazo hivyo kwa mara nyengine tena.

"Marekani haitokubali kamwe mfadhili mkubwa wa ugaidi duniani kununua na kuuza ndege, magari ya kivita, makombora na silaha zengine bila udhibiti. Vikwazo hivi vya Umoja wa Mataifa vitaendeleza marufuku ya kununua silaha," alisema Pompeo.

Urusi kupitia naibu balozi wake katika Umoja wa Mataifa imeikosoa Marekani

Marufuku hayo ya Iran kununua silaha yalikuwa yanakamilika Oktoba 18. Yanaizuia Iran pia kufanya majaribio ya makombora na urutubishaji wa urani.

UN-Sicherheitsrat New York 2016 | Waffenembargo Libyen (Imago Images/Xinhua)

Baraza la Usalama la Umoja wa Mataifa likiwa kikaoni

Mara baada ya hatua hiyo ya Marekani naibu balozi wa Urusi katika Umoja wa Mataifa Dmitry Polyansky  ameandika katika mtandao wa kijamii wa Twitter akiishambulia Marekani kwa kutoheshimu sheria na kufanya kile inachotaka bila kumshauri yeyote.

Uingereza, Ufaransa na Ujerumani nchi ambazo ni wanachama wa mkataba wa nyuklia wa mwaka 2015, wameungana na Urusi kuipinga hatua hiyo ya Marekani licha ya kuwa nchi hizo za Ulaya ni marafiki wa Marekani, jambo linaloashiria kibarua cha Marekani katika suala hilo.

Trump aliiondoa Marekani kwenye mkataba wa nyuklia na Iran mwaka 2018

Iran yenyewe imeikosoa Marekani kwa hatua hiyo iliyochukua. Majid Ravanchi ni Mwakilishi wa Kudumu wa Iran katika Umoja wa Mataifa.

USA | UN- Sicherheitsrat | Iranischer Botschafter Majid Takht Ravanchi (Getty Images/S. Platt)

Balozi wa Iran Umoja wa Mataifa Majid Takht Ravanchi

"Kulingana na hoja za kisheia, Marekani si mshiriki wa mkataba wa nyuklia na haina haki ya kukitumia kipengele cha kurudisha tena vikwazo na tafsiri yake ya azimio 2231 haiwezi uubadilisha ukweli," alisema Majid.

Rais Donald Trump mwaka 2018 aliiondoa Marekani kutoka kwenye mkataba huo wa mwaka 2015 ambao unajumuisha nchi sita zenye nguvu duniani pamoja na Iran. Marekani inashikilia kwamba chini ya azimio la Baraza la Usalama la Umoja wa Mataifa bado ina haki ya kukirudisha kipengee cha kuiwekea tena Iran vikwazo.

Shirika la Umoja wa Mataifa la Usimamizi wa Niashati ya Nyuklia limeripoti kuhusiana na Iran kwenda kinyume na makubaliano hayo ingawa Iran yenyewe inasema hiyo inatokana na Marekani kukiuka makubaliano hayo kwa kujiondoa na kisha kuiwekea Iran vikwazo vikali vya kimataifa.

Matangazo

Unaweza kusikiliza matangazo yetu hapa

Kusikiliza matangazo ya Idhaa ya Kiswahili ya DW, tafadhali bonyeza alama ya spika ya masikioni hapo chini, na kuwasiliana nasi, tafadhali tuandikie moja kwa moja kupitia: kiswahili@dw.com