Kansela wa Ujerumani Angela Merkel ametoa wito wa mabadiliko katika Baraza la Usalama la Umoja wa Mataifa, akisema umoja huo unapaswa kubadilika ili uweze kukabiliana na changamoto za dunia za karne ya 21. Hayo Bi Merkel ameyaeleza katika ujumbe wake wa kuadhimisha miaka 75 tangu kuanzishwa kwa Umoja wa Mataifa. Kansela huyo amesisitiza kuwa Ujerumani iko tayari kutimiza majukumu yake, na itafurahi zaidi ikiwa majukumu hayo yatajumuisha kiti chake cha kudumu katika Baraza la Usalama lililo pana zaidi. Katika ujumbe huo, Kansela Merkel amesema ubora wa Umoja wa Mataifa lazima uakisi matakwa ya wanachama wake. ''Nchi yoyote inayodhani inaweza kuendelea peke yake inajidanganya'', amesema Kansela Merkel bila hata hivyo kuitaja nchi yoyote kwa jina.

Uingereza imepandisha kiwango cha tahadhari juu ya kitisho cha maambukizi wa virusi vya corona kutoka ngazi ya tatu hadi ya nne, kutokana na kuongezeka kwa kasi ya maambukizi mapya. Ngazi ya nne maana yake ni kwamba hatari ya kuambukizwa virusi hivyo ni ya kiwango cha juu. Wataalamu wa afya nchini humo wameonya kuwa ikiwa hatua madhubuti hazitachukuliwa, Uingereza itaanza kushuhudia ongezeko la vifo kutokana na ugonjwa wa COVID-19. Mganga mkuu wa serikali ya England Chris Whitty amesema ifikapo katikati mwa mwezi ujao wa Oktoba, huenda Uingereza itakuwa ikisajili maambukizi mapya 50,000 kila siku. Tayari Uingereza ndio nchi iliyoathiriwa zaidi na COVID-19 barani Ulaya, ikiwa imewapoteza watu wake 42,000 kwa janga hilo. Waziri mkuu wa nchi hiyo Boris Johnson ametangaza mkakati mpya wa kuzuia kasi ya kuenea zaidi kwa ugonjwa huo, zikiwemo kupunguza muda wa huduma za baa na mikahawa.

Uturuki na Ugiriki zimekubaliana kuanza mazungumzo yenye lengo la kumaliza mzozo wa utafutaji wa gezi katika eneo linalogombaniwa la mashariki mwa bahari ya Mediterania na Aegean. Hayo yametangazwa na Ikulu ya Uturuki mjini Ankara, baada ya mazungumzo kati ya viongozi wa Uturuki, Ujerumani na Umoja wa Ulaya. Rais wa Uturuki Recep Tayyip Erdogan, Kansela wa Ujerumani Angela Merkel na rais wa Baraza la Ulaya Charles Michel wamefanya mkutano kwa njia ya video, na kuafikiana kuwa msukumo uliopo kutokana na mchakato wa mawasiliano unapaswa kuendelezwa na pande hizo mbili. Rais Erdogan ameelezea matumaini yake kuwa katika mkutano wa kilele wa viongozi wa nchi za Umoja wa Ulaya utakaofanyika Alhamis na Ijumaa mjini Brussels utaleta ari mpya ya uhusiano mwema baina ya Umoja wa Ulaya na Uturuki.

Kumetokea mripuko mkubwa katika eneo la kusini mwa Lebanon linalodhibitiwa na kundi la madhehebu ya kishia la Hezbollah. Chanzo kimoja katika ofisi ya habari ya kundi hilo kimelithibitishia shirika la habari la Ujerumani dpa kutokea kwa mripuko huo, kikisema umetokea katika kituo cha kukusanya mabomu ya kutegwa ardhini, yaliyotumiwa katika vita vya Julai 2006. Chanzo kingine kimesema mripuko ulitokea kwenye jengo linalomilikiwa na Hezbollah katika mji wa kusini mwa Lebanon wa Ain Qana, kwenye mkoa wa Iqlim al-Tuffah. Chanzo hicho kimeongeza kuwa inaaminika jengo hilo lilikuwa ghala la silaha. Taarifa za awali zilikuwa zimesema kuwa mripuko umetokea kwenye kituo cha kuuza mafuta ya petroli. Shirika la Msalaba Mwekundu la Lebanon limesema hakukuwepo taarifa zozote kuhusu vifo au majeruhi. Wenyeji wa eneo hilo wamearifu kuwa barabara kuelekea kwenye jengo hilo imefungwa na maafisa wa usalama wa Hezbollah.

Matokeo ya kura ya maoni iliyopigwa Italia yanaonyesha kuwa raia wengi wa nchi hiyo wanataka kupunguzwa kwa idadi ya wajumbe katika mabaraza mawili ya bunge nchini humo. Takwimu za awali za matokeo hayo zimeonyesha kuwa asilimia 70 ya wapiga kura wameridhia kupunguzwa kwa theluthi moja ya wabunge. Mpango uliopo ni kupunguza idadi ya wabunge katika baraza la wawakilishi kutoka 630 hadi 400, na kutoka 315 hadi 200 katika baraza la seneti. Vuguvugu la Nyota Tano linaloongozwa na waziri wa mambo ya nje Luigi Di Maio ndilo linaloongoza miito ya mageuzi hayo. Na katika uchaguzi wa jimbo la Tuscany uliofanyika sambamba na kura hiyo ya maoni, chama cha mrengo wa kushoto kimeweza kudumisha wingi wake dhidi ya chama cha mrengo mkali wa kulia kinachoongozwa na naibu waziri mkuu wa zamani, Matteo Salvini.

Shirika la anga za mbali la Marekani, NASA, limetangaza mpango wa kutuma tena wanaanga mwezini, kwa gharama ya takribani dola bilioni 28. Kati ya hizo, chombo cha kuwapeleka wanaanga hao kitagharimu dola bilioni 16. Mpango huo ulianzishwa na rais Donald Trump kama mojawapo ya vipaumbele vya utawala wake, utahitaji idhini ya bunge la nchi hiyo linalokabiliwa na uchaguzi wa mwezi Novemba. Gharama hiyo ya Dola bilioni 28 inapaswa kupatikana katika bajeti ya miaka minne kati ya 2021 na 2025. Katika mazungumzo na waandishi wa habari, mkuu wa NASA Jim Bridenstine amesema hofu za kisiasa ni changamoto kubwa kwa kazi ya shirika lake. Rais wa zamani Barack Obama aliufuta mradi wa kupeleka wanaanga katika sayari ya Mars, baada ya mtangulizi wake kutumia mabilioni ya dola kuuandaa.