Mazungumzo ya kumaliza vita kati ya Ukraine na Urusi yanaendelea leo Jumanne. Hayo ni kulingana na kiongozi wa ujumbe wa Ukraine David Arachamiya aliyenukuliwa na gazeti moja la nchini humo ingawa hakutoa maelezo zaidi. Urusi haijatoa maelezo yoyote kuhusiana na mkutano huo. Pande zote mbili zilikutana jana Jumatatu kwa njia ya video katika duru ya nne ya mazungumzo na kisha baadaye mchana mshauri wa rais wa Ukraine Mykhailo Podolyak alitangaza kuwa mazungumzo hayo yameahirishwa hadi leo Jumanne. Ukraine inataka vita visimamishwe na pia kuondolewa askari wote wa Urusi kutoka nchini humo. Urusi nayo inaitaka Ukraine itambue jimbo la Crimea lililotwaliwa na Urusi katika rasi ya Bahari Nyeusi kama eneo halali ya Urusi.

Kansela wa Ujerumani Olaf Scholz amepokea kwa furaha hatua ya mawaziri wakuu wa Poland, Jamhuri ya Czech na Slovenia ya kufanya safari mjini Kiev leo Jumanne, akisema ni vizuri kutumia njia tiofauti za kutafuta suluhisho la mzozo wa Ukraine na Urusi. Kansela Scholz amesema jumuiya ya kimataifa inafuata mkakati wa wazi wa kisiasa kuisaidia Ukraine. Scholz amesema njia zote za kidiplomasia zinapaswa kutumika katika kutafuta suluhu ya mgogoro wa Ukraine na kuhimiza kusitishwa kwa mapigano mara moja. Kansela wa Ujerumani amesema ni muhimu kuendelea na majadiliano na Rais wa Ukraine Volodymyr Zelensky na pia Rais wa Urusi Vladimir Putin, ili kufanikisha makubaliano ya kusitisha mapigano.

Shirika la Umoja wa Mataifa la kuwahudumia wakimbizi UNHCR limesema kiasi cha michango ya dharura kwa ajili ya kuisaidia Ukraine kimevunja rekodi. Shirika hilo limesema makampuni, wakfu na wafadhili mbalimbali wamechangia zaidi ya dola milioni 200 katika muda wa wiki mbili kwa ajili ya Ukraine. Kamishna Mkuu wa Umoja wa Mataifa anayesimamia huduma kwa wakimbizi Filippo Grandi amewashukuru wote walochangia duniani kote kwa wema na ukarimu wao wa kuwasaidia watu wanaokimbia vita nchini Ukraineambapo mamilioni ya watu wanahitaji msaada wa haraka. Idadi ya watu walioikimbia Ukraine tangu Urusi ilipoivamia nchi hiyo imezidi watu milioni 2.8. Kulingana na shirika la UNHCR, zaidi ya watu milioni 2 wamegeuka kuwa wakimbizi wa ndani.

Wizara ya mambo ya nje ya Iran imesema Marekani inapaswa kuamua juu ya kuurejesha mkataba wa nyuklia uliofikiwa mnamo mwaka 2015 baina ya nchi hiyo na mataifa makubwa huku ukiwepo wasi wasi juu ya mazungumzo ya mjini Vienna kuvunjika. Juhudi za kufikia mapatano zimeingia katika hali ya sintofahamu baada ya Urusi, kutoa masharti katika dakika ya mwisho. Urusi kwa sasa inazozana na nchi za magharibi baada ya kuivamia Ukraine. Mazungumzo yamesimamishwa kwa muda usiojulikana licha ya hati husika kukamilika. Waziri wa mambo ya nje wa Urusi Lavrov amekanusha madai ya Marekani kuwa Urusi inayakwamisha mazungumzo ya mjini Vienna juu ya kuufufua mkataba na Iran. Waziri huyo amesema Urusi inataka mkataba huo urejeshwe haraka lakini inasubiri Marekani iondoe vikwazo ilivyoweka dhidi ya Iran.

Nchi za Ghuba zinakusudia kuandaa mazungumzo kati ya pande zote zinazohusika na mgogoro wa nchini Yemen ikiwa pamoja na wajumbe wa Kihouthi wanaoungwa mkono na Iran. Mazungumzo hayo yatafanyika mjini Riyadh mwishoni mwa mwezi huu. Baraza la ushirikiano wa nchi sita za Ghuba limesema lengo la mazungumzo hayo ni kuvimaliza vita vya wenyewe kwa wenyewe vya nchini Yemen viliavyoanza tangu mwaka 2015. Mjumbe mmoja wa serikali ya Yemen inayoungwa mkono na Saudi Arabia ameeleza kuwa upande wao upo tayari kuhudhuria mkutano huo ili kutafuta suluhisho juu ya masuala ya usalama, kisiasa na kijeshi. Hata hivyo ameelezea wasi wasi iwapo waasi wa Houthi watakubali kuhudhuria mazungumzo hayo katika mji mkuu wa Saudi Arabia ambayo inaongoza mfungamano wa kijeshi ili kuisaidia serikali ya Yeman kupambana na waasi hao. Saudi Arabia haitashiriki kwenye mazungumzo hayo endapo yatafanyika.

Umoja wa Mataifa umesema pana dalili za wazi zinazoonyesha kwamba jeshi la Myanmar limetenda uhalifu wa kivita tangu kuangushwa kwa utawala wa kiraia nchni humo. Msemaji wa kitengo cha hali za binadamu, Ravina Shamdasani ameeleza kuwa Umoja wa Mataifa umeweza kubainisha mtindo wa uhalifu huo katika mwaka uliopita unaoonyesha kuwa uhalifu huo unapangwa na kuratibishwa na kwamba mfumo wa mashambulio unatekelezwa. Jeshi la Mynmar lilitwaa mamlaka mwaka uliopita na kuiondoa serikali ya Aung San Suu Kyi iliyochaguliwa kwa njia za kidemokrasia. Baada ya majeshi ya usalama kutumia mabavu dhidi ya watu waliokuwa wanafanya maandamano ya amani, maalfu ya wananchi wameunda vikosi vya wanamgambo ili kupambana na wanajeshi.