Nyuklia: Mazungumzo kati ya Marekani na Iran kufanyika Rome

Hayo yamesemwa leo na Waziri wa Mambo ya Nje wa Iran Abbas Araghchi.

Mwanadiplomasia huyo wa Iran amesema pembezoni mwa kikao cha Baraza la Mawaziri leo kwamba duru ya mazungumzo kati ya Washington na Tehran, yanayosimamiwa na Oman, yamepangwa kufanyika Jumamosi ijayo katika mji mkuu wa Italia, Rome.

Marekani hata hivyo haijatoa tamko lolote kuhusu suala hilo. Mkutano tofauti na wawakilishi kutoka Ujerumani, Ufaransa na Uingereza umepangwa kufanyika siku ya Ijumaa.

Soma pia: Iran yapendekeza mazungumzo ya nyuklia na nchi za Ulaya 

Ingawa hakukuwepo na uthibitisho kutoka Wizara ya mambo ya nje ya Ujerumani, tovuti ya habari ya Iran ya Iran Nuances imeripoti kuwa mazungumzo hayo yatafanyika katika ngazi ya manaibu mawaziri wa mambo ya nje.

Mataifa hayo matatu ya Ulaya yalikuwa miongoni mwa yaliosaini makubaliano muhimu ya nyuklia ya mwaka 2015 kati ya Iran na mataifa mengine sita yenye nguvu, yaliyo na lengo la kuizuia Iran kutengeneza silaha za nyuklia.