Status-quo-ja në Kosovë është e paqëndrueshme
7 Qershor 2007Grupi negociator i Kosovës, nuk është i gatshëm të pranojë kurrfarë shtyrje të zgjidhjes së statusit të Kosovës, ndërsa, vazhdimin e negociatave edhe të paktën për një vit, ashtu sic kërkon pala ruse, për Prishtinën zyrtare është një proces i cili nuk do të prodhojë rezultate më shumë sesa janë arritur deri tash. Kështu deklaroi presidenti i Kosovës Fatmir Sejdiu, i cili thotë se pala koosvare vazhdon të besojë tek partnerët e bllokut perëndimor se rezoluta për Kosovën do të miratohet shumë shpejtë në KS-it.
Pala kosovare, thotë se samiti i vendeve më të industrializuara që po zhvillon punimet në Gjermani mund të qartësojë situatën dhe pozicionet e fuqive të mëdha për cështjen e Kosovës, ndërsa nuk dëshirojnë të besojnë se mund të ketë shtyrje të procesit. Ata shprehen të matur në deklarime dhe vlerësime për vendet që e kundërshtojnë pakon e Marti Ahtisarit, në këtë rast për federatën ruse, ndërsa, shpresat më të mëdha i bazojnë në SHBA-së.
Sidoqoftë, udhëheqësit politik kosovar po përcjellin më vëmendje zhvillimet për Kosovën në arenën ndërkombëtare, ndërsa vazhdojnë të përsërsin qëndrimin
se status-quo, në Kosovë është e paqëndrueshme. Këtë fakt e përsërisin vazhdimisht edhe përfaqësuesit ndërkombëtar në Kosovë dhe shprehen se ka ardhur koha që BE-ja t'i marrë përgjegjësitë për Kosovën nga misioni i KB-së. Vendosja e një misioni të BE-së në Kosovë, lejohet vetëm pas shfuqizimin të rezolutës 1244 dhe nxjerrjes së një rezolute të re në KS-it, për të cilën pala
kosovare pajtohet që rezoluta të ketë për bazë planin e Marti Ahtisarit, që sipas tyre garanton pavarësi të mbikqyrur për Kosovën.