Gjermania e interesuar në mbylljen e grindjes Rusi-Ukrainë | FOKUS | DW | 02.01.2006
  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

FOKUS

Gjermania e interesuar në mbylljen e grindjes Rusi-Ukrainë

Një e treta e gazit që përdor Gjermania kalon përmes Ukrainës. Qeveria gjermane e interesuar që grindja të përfundojë sa më shpejt, por nuk do të luajë rol ndërmjetësues

Linjë gazmbajtëse në Rusi

Linjë gazmbajtëse në Rusi

"As nuk shtrohet për diskutim që Gjermania të luajë rol ndërmjetësues në këtë konflikt"- ka përsëritur të hënën në Berlin zëdhënësi i qeverisë gjermane, Tomas Shteg. Nisur nga fakti, ish-kancelari gjerman Gerhard Shrëder, tashmë është anëtar i këshillit mbikqyrës të koncernit gjymështetëror rus, Gazprom, ditët e fundit gazetarët kanë shtruar vazhdimisht pyetjen, se përse ai nuk ndërhyn që grindja mes Rusisë dhe Ukrainës të përfundojë sa më shpejt. Por asnjëra nga qeveritë e prekura nuk i ka kërkuar ndihmë Gjermanisë, kurse sa për ish-kancelarin Shrëder, ai nuk është më pjesë e qeverisë, kështu që "mund ta pyesni vetë" – iu përgjigj Shteg pyetjes përkatëse.

Ekonomia: Rezervat mjaftojnë për 75 ditë

Interesimi i Gjermanisë, ashtu si edhe i shumë vendeve të tjera të Evropes Perëndimoret për zgjidhjen e problemit megjithatë mbetet: Së pari, sepse afro 80 për qind e sasisë së gazit, që Gjermania importon nga Rusia vjen përmes Ukrainës. Kjo është gati një e treta e nevojave të Gjermanisë për gaz. Shkak për t'u shqetësuar, janë të mendimit gazetarët, por zëdhënësja e ministrisë së ekonomisë i qetëson: "Si nga sipërmarrësit ashtu edhe nga shoqatat e tregtarëve të gazit, kemi marrë garancinë që jemi të siguruar nga ndërprerje afatmesme. Rezervat e gazit zgjasin për 75 ditë, ndërkohë që ekziston mundësia të rrisim importimin nga Norvegjia."

Kriza mund të ndikojë në rritjen e çmimit të gazit

Në qoftë se ndërprerja e gazit do të zgjasë për një kohë afatgjate, atëherë njëri nga ndikimet do të jetë rritja e çmimit, thotë Klaus Hashker, zëdhënës i koncernit gjerman Gasag. Një lajm jo shumë i mirë për 17 milionë familjet që furnizohen me gaz, aq më tepër që viti i ri filloi me rritje të çmimit të gazit, që nuk kishin të bënin me grindjen aktuale, por me rritjen në përgjithësi të çmimit të naftës.

Linja e Baltikut - lehtësim apo varësi e re?

Në prizmin afatgjatë një shpresë për çlirimin deri diku të varësisë nga Ukraina përbën linja gazmbajtëse e Detit Baltik që Gazprom me dy koncerne gjermane Eon dhe BASF po ndërtojnë tani nga Rusia në Gjermani. "Kjo me siguri që do ta stabilizojë furnizimin me gaz," – thotë Hashker. "Ndërtimi i saj është pasqyrim i kërkesës së rritur në Evropën perëndimore, dhe ka mundësi që në të të përfshihen edhe vende të tjera." Por se a ekziston rreziku, që ashtu si edhe me Ukrainën, Rusia të pesëfishojë çmimin e gazit që do të kalojë nga linja e Baltikut, kësaj pyetjeje i shmangen si ekonomia ashtu edhe politika. Qeveria gjermane nuk e trajton këtë grindje si lojë e Rusisë për të dëshmuar pushtet, por si një problem që ka të bëjë me mosrespektimin e kontratave.

  • Data 02.01.2006
  • Autor Anila Shuka, Berlin
  • Shtypni Shtypeni faqen
  • Permalink https://p.dw.com/p/Aqgp
  • Data 02.01.2006
  • Autor Anila Shuka, Berlin
  • Shtypni Shtypeni faqen
  • Permalink https://p.dw.com/p/Aqgp