Merkel: Zgjidhja e statusit në dobi të gjithë rajonit
7 Nëntor 2006Reklamë
Kosova nuk bën pjesë në pikat e para të politikës së kryetares së ardhshme të Bashkimit Evropian, Gjermanisë. Temat që dëgjohen më shpesh janë projekti i lënë në mes i kushetutës Evropiane, tregu i përbashkët energjetik, marrëdhëniet e BE-së me Afrikën dhe Azinë. Prandaj edhe paksa befasues ishte prononcimi i kancelares kristdemokrate Angela Merkel të martën në Berlin, mbas takimit me kryetarin e radhës së BE-së, kryesministrin finlandez, Matti Vanhannen.
"Presidenca gjermane do ta shoqërojë edhe më tej të ardhmen e Kosovës," - tha Merkel. "Jemi për një zgjidhje që do të ndihmojë zhvillimin e përbashkët të të gjithë vendeve në rajon: ajo duhet të ndihmojë Kosovën, por edhe të marrë parasysh interesat e Serbisë."
Kancelarja gjermane, që në gjashtëmujorin e parë të vitit të ardhshëm do të kryesojë Këshillin Evropian, e theksoi edhe një herë mbështetjen e saj për ndërmjetësuesin Ahtisaari. Merkel informoi se në dhjetor pret që Ahtisaari të vijë për një vizitë në Berlin, ku do të raportojë personalisht për propozimet e tij lidhur me statusin e ardhshëm të Kosovës. "Rruga do të jetë e komplikuar", shtoi kancelarja kristiandemokrate.
Sa i përket planit kohor Gjermania vazhdon të qendrojë mbas atij të ish-presidentit finlandez Marti Ahtisaari, bën të ditur për DW-në ministria e jashtme gjermane. Një zëdhënëse e saj nuk pranoi të komentonte propozimin e Solanës për shtyrjen e afatit të zgjidhjes së statusit për mbas datës së zgjedhjeve në Serbi.
Reklamë