Gazetarët: RTK-ja në shërbim të qytetarëve dhe jo pushtetit
27 Tetor 2009Qeveria e Kosovës akoma nuk pranon të flasë për kritikat që i bëhen asaj nga Drejtoria e Përgjithshme e Unionit Europian të Trasmetimeve, e cila kritikon kryeministrin Hashim Thaçi, për ndikim mbi RTK-në, transmetuesin e vetëm publik në Kosovë.
“Presioni i qeverisë mbi RTK-së, nuk është në të mirë as të qytetarëve të Kosovës dhe as të synimeve të qeverisë për njohje të mëtejshme të shtetit të ri”, thuhet në letrën e drejtorit të Përgjithshëm të EBU-së, Jean Réveillon.
RTK-ja është në gjendje të rëndë
Këtyre shqetësimeve iu bashkohet edhe Shoqata e Gazetarëve Profesionistë të Kosovës. Bul Salihu, anëtar bordi i kësaj shoqate, thotë se gazetarët profesionistë të Kosovës vazhdimisht kanë ngritur zërin kundër ndikimit të qeverisë mbi transmetuesin publik të Kosovës: “Ne deri tash disa herë kemi ngritur zërin për punën në RTK-së, mbi të cilin tash qeveria e Kosovës po ushtron një kontrollë të rreptë. Aty po kontrollohet lajmi, ka pasur raste ku është ndaluar transmetimi i kronikave vetëm pak minuta para se ato të transmetohen, kronika këto të cilat nuk kanë qenë në favor të qeverisë. Kjo tregon se RTK-ja është në një gjendje të rëndë”, thotë Bul Salihu.
Agron Bajrami, kryeredaktor i të përditshmes "Koha Ditore", thotë se edhe më parë ka pasur ndikim të pushtetit mbi transmetuesin publik, por tani ndikimi ka arritur pikën kulmore. Sipas tij, politika redaksionale në RTK-së e cila duhej të ishte e pavarur, është në rrezik.
"Gjatë të gjitha këtyre viteve prej themelit të RTK-së, ky televizion më shumë i ka shërbyer politikës sesa i ka shërbyer qytetarit. Ky televizion është komercializuar tej mase gjë që nuk e lejon një transmetues publik. Pra, kjo kompani në aspektin ekonomik më shumë i ngjan një transmetuesi komercial, ndërsa, në aspektin e politikës redaktuese më shumë i ngjan një transmetuesi shtetërorë", shprehet Agron Bajrami.
Prishja e marrëveshjes nga KEK-u rrezikon të ardhmen e RTK-së
Qytetarët e Kosovës ka vite që parapaguajnë transmetuesin publik me një shumë prej 3.5 eurosh në muaj. Mbledhja e këtyre të hollave është bërë nëpërmjet faturave të energjisë elektrike në bazë të një marrëveshje me KEK-un. Kjo marrëveshje tani është ndërprerë në mënyrë të njëanshme nga ana e KEK-ut dhe si pasojë po rrezikohet e ardhmja financiare e RTK-së gjë që theksohet edhe në letrën e drejtorisë së përgjithshme të Unionit Europian të Trasmetimeve. Ndërprerja e kontratës së parapagimit të RTK-së, nga ana e KEK-ut, tani po shqyrtohet në Gjykatën Kushtetuese të Kosovës, e cila së shpejti pritet të dalë me një vendim. Edhe Kuvendi i Kosovës po shqyrton mundësinë e gjetjes së mënyrave tjera të parapagimit për transmetuesin publik të Kosovës.
Autor: Bekim Shehu
Redaktoi: Elert Ajazaj