Maambukizi ya virusi vya corona duniani yapindukia milioni 5 | Matukio ya Kisiasa | DW | 21.05.2020
  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages
Matangazo

Matukio ya Kisiasa

Maambukizi ya virusi vya corona duniani yapindukia milioni 5

Zaidi ya watu milioni tano wameambukizwa virusi vya corona duniani na zaidi ya 327,000 wamefariki, wakati ambapo Shirika la Afya Duniani, WHO limeripoti ongezeko kubwa zaidi la maambukizi ya corona kwa siku moja.

Shirika la Afya Duniani limesema kuwa zaidi ya maambukizi 106,000 yameripotiwa kwa siku moja jana, hiyo ikiwa idadi ya juu zaidi kwa siku tangu mripuko wa virusi vya corona katika mji wa Wuhan huko China mwezi Desemba. Mkuu wa WHO, Tedros Adhanom Ghebreyesus amesema ana wasiwasi mkubwa kuhusiana na hali katika mataifa masikini duniani.

Bara la Ulaya linaonekana kuwa limevuka kilele cha maambukizi huku idadi ya visa vipya na vifo ikionekana kushuka kila siku jambo linalotoa nafasi kwa baadhi ya nchi kulegeza vikwazo vyake.

Urusi Jumatano ilirekodi kiasi kidogo zaidi cha maambukizi tangu Mei mosi huku wagonjwa wengi wakiruhusiwa kutoka hospitali na kurudi nyumbani. Kulingana na maafisa nchini Urusi, hii inaonyesha kwamba maambukizi hayaongezeki tena kwa sasa.

Marekani inaendelea kuilaumu China kuhusiana na Corona

Nchini Italia viwanja vya ndege vimeruhusiwa kufunguliwa tena kuanzia Juni 3 ambapo ndege za kimataifa pia zitaingia nchini humo.

Na Marekani, nchi ambayo imeathirika zaidi duniani, maafisa wa serikali wanaendelea kuilaumu China kwa jinsi ilivyoshughulikia mripuko wa virusi vya corona. Waziri wa mambo ya nje Mike Pompeo amedola bilioni mbili zilizoahidiwa na China katika kupambana na janga hili ni fedha kidogo mno, ikilinganishwa na mamia kwa maelfu ya watu walioaga dunia na hasara ya matrilioni ya pesa.

Symbolbild Mike Pompeo in Afghanistan (imago images/Xinhua/L. Jie)

Waziri wa mambo ya nje wa Marekani, Mike Pompeo

Huko Amerika ya Kusini nako, hali imezidi kuwa mbaya zaidi nchini Brazil na taifa hilo huenda likawa la pili duniani kwa kuwa na idadi kubwa ya maambukizi. Nchi hiyo ilitoa mwongozo kwa raia wake kutumia dawa ya kutibu malaria Hydroxychloroquin katika mapambano dhidi ya virusi vya corona.

Mayra Pinheiro ni afisa katika wizara ya afya Brazil.

"Daktari ndiye anayeamua kumpa mgonjwa dawa hiyo, na mgonjwa ana haki ya kuikubali au kuikataa. Tunawafahamisha kabisa kuhusiana na athari zake," alisema Mayra Pinheiro.

Afrika Kusini yaripoti kifo cha kwanza cha mtoto mchanga kutokana na Corona

Barani Asia nako maambukizi nchini Japan yanapungua na nchi hiyo italegeza baadhi ya vikwazo katika miji ya Osaka, Kyoto na Hyogo Alhamis.

Japan Ministerpräsident Shinzo Abe (Imago Images/Kyodo)

Waziri Mkuu wa Japan Shinzo Abe

Thailand imesema inatarajia chanjo ya virusi vya corona iwe tayari mwakani, baada ya majaribio yaliyofanyiwa panya kuonyesha matumaini.

Barani Afrika, Wizara ya afya Afrika Kusini imeripoti kifo chake cha kwanza kinachohusiana na corona kwa mtoto mchanga wakati ambapo idadi ya vifo nchini humo imefikia watu 339.

Huku idadi ya maambukizi na wanaofariki ikiongezeka kote duniani kila uchao, serikali zinataraji kwamba chanjo itapatikana hivi karibuniili ziweze kuzinusuru chumi ambazo zimeathirika vibaya. Ila kulikuwa na habari ya kutia moyo Jumatano, kwani tafiti zilizofanyiwa tumbili zilionyesha kwamba binadamu wanaweza kupata kinga dhidi ya virusi vya corona.

Matangazo

Unaweza kusikiliza matangazo yetu hapa

Kusikiliza matangazo ya Idhaa ya Kiswahili ya DW, tafadhali bonyeza alama ya spika ya masikioni hapo chini, na kuwasiliana nasi, tafadhali tuandikie moja kwa moja kupitia: kiswahili@dw.com