Ajali ya ndege ya warukaji miavuli yauwa watu 12 Missouri

Watu 12 wamefariki baada ya ndege ndogo iliyokuwa imewabeba watu waliokuwa wakielekea kwenye zoezi la kuruka kwa miavuli kuanguka na kulipuka kwa moto katika jimbo la Missouri nchini Marekani.

Kwa mujibu wa mamlaka, ndege hiyo ilikuwa imembeba rubani mmoja na abiria 11. Ilianguka muda mfupi baada ya kupaa kutoka uwanja mdogo wa Butler Memorial Airport, karibu saa 11:30 asubuhi siku ya Jumapili.

Sherifu wa kaunti ya Bates, Chad Anderson, amesema baadhi ya ndugu wa waliokuwa ndani ya ndege hiyo walishuhudia ajali hiyo. Makasisi na wahudumu wa kujitolea walipelekwa eneo la tukio kuwasaidia jamaa wa waathiriwa.

Rubani alijaribu kutua kwa dharura

Ndege hiyo binafsi ilikuwa ikiendeshwa na kampuni ya Skydive Kansas City. Maafisa wamesema ilikuwa ndege aina ya Pacific Aerospace 750XL, yenye injini moja ya turboprop, inayotumiwa mara nyingi katika shughuli za kuruka kwa miavuli.

Dennis Jacobs, kaimu meneja wa uwanja huo na mkuu wa idara ya dharura ya kaunti ya Bates, amesema ndege hiyo ilikuwa imetoka kupaa na kugeuka kushoto kabla ya kuanguka. Kwa maoni yake, huenda ilikuwa imepoteza nguvu na rubani alikuwa akijaribu kuitua karibu na barabara, kabla ya ndege hiyo kupoteza mwelekeo na kuangukia pua.

Waokoaji walizima moto uliokuwa umeteketeza mabaki ya ndege hiyo muda mfupi baada ya ajali. Jacobs amelielezea eneo la tukio kuwa la kutisha.

Uchunguzi wa sababu za ajali waanza

Maafisa wa Shirika la Usafiri wa Anga la Marekani, FAA, walifika eneo la tukio, huku wachunguzi kutoka Bodi ya Kitaifa ya Usalama wa Usafiri, NTSB, wakielekea huko kufanya uchunguzi zaidi.

Kwa sasa haijulikani ni nini hasa kilichosababisha ajali hiyo. Polisi wa Missouri wamesema sababu zote zinazowezekana zitachunguzwa na NTSB.

Mtaalamu wa usalama wa anga, Jeff Guzzetti, amesema ajali kadhaa za zamani za ndege zinazotumiwa kwa kuruka miavuli zimehusishwa na matengenezo duni na udhibiti hafifu wa usalama.

Wasiwasi kuhusu usalama wa ndege za kurusha miavuli

NTSB hapo awali iliwahi kuonya kuwa usimamizi wa ndege zinazotumika kwa kurusha watu kwa miavuli si mkali vya kutosha, hasa baada ya ajali ya mwaka 2019 huko Hawaii iliyouwa watu 11.

Ndege iliyoanguka Missouri ilikuwa imetengenezwa mwaka 2010. Taarifa za kampuni ya kufuatilia safari za ndege, FlightAware, zinaonyesha kuwa ndege hiyo ilikuwa tayari imefanya safari mbili fupi siku hiyo kabla ya ajali.

Mji mdogo wa Butler una wakazi takribani 4,300 na uko umbali wa kilomita 105 kusini mwa Kansas City. Uwanja wa Butler Memorial na barabara iliyo karibu nao zimefungwa wakati uchunguzi ukiendelea.