Zgjidhja e statusit nuk do të shtyhet

Udhëheqësit politik kosovarë morrën konfirmimin nga përfaqësuesit e vendeve anëtare të grupit të kontaktit dhe përfaqësuesit e BE-së, se nuk do të ketë shtyrje të zgjidhjes së statusit të Kosovës.

Marko Lemanon thotë në emër të Bashkimit Evropian se, nëse ndodhë që vendimi për zgjidhjen e statusit të Kosovës të shtyhet ai do të ishte i befasuar, mirëpo deri tash ai nuk ka ndonjë informacion se zgjidhja e statusit të Kosovës do të shyhet për vitin e ardhshëm.

Në të njëjtën linjë shprehet edhe shefja e zyrës amerikane në Kosovë, Tina Kajdanov, e cila tha se deklarata e fundit e Grupit të kontaktit tregon qartë se grupi i kontaktit dëshiron që zgjidhja e statusit të Kosovës të arrihet deri në fund të vitit.
"Unë mendoj se gjatë vizitës së tij në Kosovë, zëvëndësekretari amerikan i shtetit për Evropë dhe Eurazi, Daniel Frid e bëri të qartë se zgjidhja e statusit të Kosovës duhet të arrihet deri në fund të këtij viti. Ky qëndrim nuk ka ndryshuar dhe vendet
anëtare të grupit të kontaktit janë unik," tha Tina Kajdanov.

Kryeministri i Kosovës Agim Çeku, thotë në emër të Qeverisë së Kosovës, se pala kosovare është e vendosur që zgjidhja e statusit të Kosovës duhet të arrihet deri në fund të këtij viti dhe ata ai është i bindur se kjo edhe do të ndodhë.