Mkuu wa genge Haiti atishia kuwaua mateka wamishonari

Video hiyo iliyochukuliwa Jumatano na kuchapishwa jana Alhamisi kwenye mitandao ya kijamii inamuonyesha Wilson Joseph, akiwa amevaa suti na kuzungukwa na watu wenye silaha, wakiwa mbele ya majeneza yaliyokuwa na miili ya wanachama watano wa genge lake.

Kiongozi huyo wa genge la wahalifu ametishia kuwaua Wamishonari hao kwa kuwa bado hajapata alichokihitaji. Vyanzo vya usalama vimeliambia shirika la habari la AFP kuwa watekaji nyara hao wanadai fedha cha dola milioni 17 ili kuwaachilia huru mateka.

Siku ya Jumamosi, kundi la wamishonari 17 wakiwemo raia wa Marekani na Canada pamoja na watoto wao walitekwa nyara walipokuwa wamekitembelea kituo cha watoto yatima mashariki mwa Port-au-Prince.

Marekani imetoa tahadhari kwa raia wake dhidi ya kusafiri Haiti kutokana na matukio ya utekaji nyara yanayolenga raia wa Marekani.