Waliokufa katika mafuriko Afrika Kusini wafikia 259 | Matukio ya Afrika | DW | 14.04.2022
  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages
Matangazo

Matukio ya Afrika

Waliokufa katika mafuriko Afrika Kusini wafikia 259

Idadi ya watu waliopoteza maisha katika mafuriko kwenye maeneo ya mji wa Durban nchini Afrika Kusini imepanda na kufikia 259 huku mamlaka nchini humo zikionya kwamba watu wengi zaidi bado wanahofiwa kupotea.

Mvua zilizonyesha kwa siku kadhaa zimesababisha maporomoko ya udongo na kusomba makaazi ya watu. Idadi ya waliofariki inatarajiwa kuongezeka wakati zoezi la utafutaji na uokoaji likiendelea katika jimbo la KwaZulu-Natal. Raia wengi wa maeneo hayo wamelazimika kuyakimbia makaazi yao ambayo yamesombwa na maji, majengo kuporomoka na miundombinu ya barabara kuharibika vibaya. Bandari ya Durban ilifurika maji na kontena za meli kusombwa.

Überschwemmung in Südafrika

Moja ya daraja lililoharibiwa

Rais wa Afrika Kusini Cyril Ramaphosa amesema mafuriko hayo ni "janga kubwa sana", akiongeza kuwa "maafa haya ni sehemu ya mabadiliko ya tabia nchi". Ramaphosa ametembelea maeneo yaliyoathirika vibaya na mafuriko ya Durban na maeneo jirani ya jiji kuu la eThekwini. Mkoa wa KwaZulu Natal unatarajiwa kutangazwa eneo la maafa.

Mamlaka pia zinajaribu kurejesha umeme katika maeneo mengi ya jimbo hilo baada ya mafuriko makubwa katika vituo mbalimbali vya kuzalisha umeme. Juhudi za uokoaji za jeshi la ulinzi la kitaifa la Afrika Kusini zilitatizika kutokana na kitengo chake cha jeshi la anga pia kuathiriwa na mafuriko. Mamlaka ya hali ya hewa ya Afrika Kusini imeonya kuendelea kwa hali ya upepo na mvua na hatari ya mafuriko huko Kwazulu-Natal na mikoa mingine wakati wa sikukuu ya Pasaka. Mikoa ya Eastern Cape, Free State na majimbo ya Kaskazini Magharibi inaweza kuathirika.