Jamus: Matakan dakile yaduwar omicron
December 22, 2021
Shugabannin siyasar na Jamus sun amince da wannan matakin ne, saboda kare tsarin lafiyar kasar daga shiga rudani ganin yadda sabon nau'in corona na omicron ke kara yaduwa. Ana dai sa ran za a yi aiki da matakan a yayin bukukuwan Kirsimeti da shiga sabuwar shekara, sai dai ba za a rufe daukacin harkokin rayuwa ba. Bayan wata ganawa tsakanin sabon shugaban gwamnatin Jamus Olaf Scholz da gwamnonin jihohi, sun amince cewa kar mutane su wuce 10 a yayin duk wata haduwa da za su yi.
Karin Bayani: Al'umma na shakku kan rigakafi a Jamus
An dai amince mutane 10 su hadu ne kawai, idan dukkansu sun yi riga-kafin cutar ta coronavirus ko kuma ba su dade da warkewa daga cutar ba. Ga wadanda ba su yi da riga-kafin corona ba kuwa, mutane biyu kacal aka amince su hadu. An dauki matakin sbaoda tsoron yaduwar cutar ta coronavirus lokacin bukukuwan da ke tafe, kuma sabon shugaban gwamnatin Jamus din Scholz ya yi karin haske ga al'umma: "Na fahimmci kowanne daga cikinku da ba ya kaunar jin kiran cutar corona da yadda take sauyawa zuwa wasu nau'o'i, amma ba za mu rufe ido kan yadda muka ga sabon nau'in cutar ya fara barkewa a tsakaninmu ba."
Rige-rigen sayen kayayyakin kyaututtuka da ake bayarwa lokacin bukukuwan na Kirsimeti da sabuwar shekara domin mikawa ga 'yan uwa da abokan arziki, za su ci gaba da kasancewa kamar yadda aka saba kasancewar sabon matakin mahukuntan Jamus zai fara aiki ne a ranar 28 ga wannan wata na Disamba. za a gudanar da bikin sabuwar shekarar shiru, ba kamar yadda aka saba ba ta hanyar yin wasanni a wuraren da babu 'yan kallo da kuma rufe gidajen rawa.
Karin Bayani: Sharhi kan rudanin da gwamnatin Merkel ke ciki
Gwamnati tana fatan ganin samun ci gaba ta fuskacin yin riga-kafi zuwa lokacin bikin Kirsimeti. Ana fatan yin milyoyin riga-kafin zuwa watan Janairu mai zuwa. Sabon shugaban gwamnatin Jamus din ya ce ana samun raguwar masu kamuwa da cutar ta coronavirus,gabanin bullar sabon nau'in na Omicron. Cutar dai ta kassara armashin bikin Kirsimetin, kuma ga 'yan siyasa akwai sauran aiki kan irin yadda za su tunkari al'umma.