Maas azuru Pakistan | Matukio ya Kisiasa | DW | 12.03.2019
  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages
Matangazo

Matukio ya Kisiasa

Maas azuru Pakistan

Waziri wa mambo ya kigeni wa Ujerumani Heiko Maas amekutana na waziri mkuu wa Pakistan Imran Khan na kujadiliana kuhusu mahusiano baina yao. Khan na Maas pia wamezungumzia hali ya wasiwasi inayozikabili India na Pakistan

Waziri wa mambo ya kigeni wa Ujerumani Heiko Maas amekutana na waziri mkuu wa Pakistan Imran Khan na kujadiliana kuhusu mahusiano baina ya mataifa hayo mawili. Khan na Maas pia wamezungumzia hali ya wasiwasi inayozikabili India na Pakistan pamoja na juhudi za Pakistan za kurejesha amani. 

Mawaziri hao wamejadiliana pia kuhusu usalama wa kikanda pamoja mchakato wa amani nchini Afghanistan.

Mapema hii leo waziri wa mambo ya nje wa Pakistan Shah Mahmood Qureshialisema kumekuwepo na hatua zilizofikiwa katika mazungumzo ya amani yanayoendelea Qatar yaliyoingia wiki ya pili sasa na yanayokutanisha wanamgambo wa kundi la Taliban na Marekani. "Inaeleweka kwamba kuna hatua zimepigwa kwa kuangazia mazungumzo ya awali ya amani nchini Afghanistan. Haitarajiwi kuwa rahisi, haijawahi kuwa na wala haitakuwa rahisi." alisema Qureshi.

Alitoa matamshi hayo kwenye mkutano na waandishi wa habari akiwa na waziri Maas mjini Islamabad. Hata hivyo hakufafanua zaidi kuhusu hatua hizo, ingawa aliongeza kuwa Pakistan imeendelea kuyahimiza makundi yanayohasimiana nchini humo kukaa pamoja na kuwa na mazungumzo yenye tija baina yao.

Pakistan Islamabad Besuch Bundesaußenminister Heiko Maas bei Premier Khan (Imago/photothek)

Waziri wa mambo ya nje, Heiko Maas akizungumza na waziri wa mambo ya nje wa Pakistan, Imran Khan

Maas amewasili nchini Pakistan katika wakati ambapo machafuko katika eneo la Kashmir yakiendelea, lakini pia hali ya kiusalama nchini Afghanistan nayo ikiwa tete. Usalama wa kikanda umekuwa ni ajenda kuu kwenye mkutano na maafisa waandamizi wa Pakistan, ikiwa ni pamoja na waziri mkuu Imran Khan.

Ziara ya Maas nchini Pakistan inakuja wakati jeshi nchini humo likiripoti kwamba watu wawili wameuawa hii leo kwenye mapigano yaliyohusisha vikosi vya Pakistan na India katika eneo linalozozaniwa la Kashmir. Kwenye mazungumzo na waziri Qureshi, amesema Pakistan na India kwa pamoja wana jukumu la kuhakikisha wanazuia machafuko kusambaa zaidi. Aliongeza kuwa mataifa hayo yanahitaji kuhakikisha yanaacha wazi njia za mawasiliano na kuhakikisha wanamaliza mzozo huo.

Akiwa Islamabad, Maas pia anatarajiwa kuzungumzia uungaji mkono wa mashirikiano ya karibu na Afghanistan. Maas, aliwasili katika mji mkuu wa Pakistan, Islamabad akitokea Afghanistan ambako alikutana na kufanya mazungumzo na viongozi waandamizi hapo jana. Wakati wa ziara hiyo, aliitaja Pakistan kama "kiungo muhimu kwa Afghanistan imara".

Wakati wa ziara hiyo, Maas pia alitarajiwa kukutana na wawakilishi wa mashirika yasiyo ya kiserikali nchini Pakistan na kutembelea kituo cha afya cha wakimbizi wa Afghanistan. Amesema Pakistan huenda ikawa ndio yenye jukumu kubwa la kuhakikisha amani nchini Afghanistan.

Mwandishi: Lilian Mtono/DPE/DW

Mhariri: Sekione Kitojo

 

Matangazo

Unaweza kusikiliza matangazo yetu hapa

Kusikiliza matangazo ya Idhaa ya Kiswahili ya DW, tafadhali bonyeza alama ya spika ya masikioni hapo chini, na kuwasiliana nasi, tafadhali tuandikie moja kwa moja kupitia: kiswahili@dw.com