Jamus ta jaddada goyon bayanta ga Ukraine

Shugaban gwamnatin Jamus Olaf Scholz a wata tattaunawa ta wayar tarho da ya yi da shugaban Ukraine Volodmyr Zelensky a wannan Laraba, ya tabbatar masa da ci gaba da taimaka musu a yakin da suke yi da Rasha wanda aka kwashe sama da kwanaki 100 ana gumurzu.

Kazalika shugabannin biyu sun kuma tattauna batun yiwuwar fitar da tarin hatsi da ke Ukraine ta cikin teku, a cewar kakakin gwamnati.

Matakin rufe tashoshin ruwan Ukraine da Rasha ta yi ne musabbabin karancin abinci da yanzu haka duniya ke fuskanta da ma karin farashinsa musamman ma a nahiyar Afirka.

Mista Scholz ya kuma sanar da Zelensky tattaunawar da ya yi da shugaban Faransa Emmanuel Macron da kuma shugaban Rasha Vladmir Putin.