Pse ndodhen impiantet kimike gjermane pranë qyteteve të mëdha? | Gjermania | DW | 31.07.2021
  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages
Reklamë

Gjermania

Pse ndodhen impiantet kimike gjermane pranë qyteteve të mëdha?

Një shpërthim me pasoja fatale në një kompleks kimik pranë Këlnit ka ngritur shqetësime për afërsinë e kompleksit me një nga qytetet më të mëdha të Gjermanisë. Impiantet pranë qyteteve janë pamje e zakonshme në Gjermani.

Chempark në Leverkusen është një nga qendrat më të mëdha kimike në Evropë

Chempark në Leverkusen është një nga qendrat më të mëdha kimike në Evropë

Një shpërthim në një fabrikë kimike në Leverkusen, rreth 30 minuta me makinë nga qyteti perëndimor gjerman i Këlnit, u mori jetën të paktën dy personave dhe plagosi shumë të tjerë. Ekspertët thonë se shpërthimi ndoshta lëshoi përbërës toksikë në zonën përreth.

Tragjedia bëri që shumë njerëz të pyesin se çfarë kërkon një kompleks kimik masiv pranë njërit prej qyteteve më të mëdha të Gjermanisë. Në fakt, qytete të tjera të mëdha gjermane si Manheimi dhe Leipzigu gjithashtu kanë komplekse të mëdha kimike në afërsi të tyre.

Industria kimike në Rheinland-një rajon i landit federal gjerman të Rinit Verior-Vestfalisë, i cili përfshin parkun kimik në Leverkusen, është një nga qendrat më të mëdha për industrinë në Evropë. Rajoni ka mbi 260 kompani kimike që punësojnë më shumë se 70.000 vetë. Firmat shpesh grumbullohen në të ashtuquajturat parqe kimike.

Nga Wesseling-u në jug deri në Dormagen në veri: kompani globale si Bayer, ExxonMobil Chemical, Ineos, Covestro, Lyondellbasell dhe Lanxess janë të vendosura pak kilometra larg nga Këlni, një qytet me një popullsi prej mbi 1 milion njerëz.

Për të kuptuar se si mund të ekzistojnë një qytet i madh dhe një park kimik në një distancë kaq të afërt, duhet parë një histori e gjatë e Rheinlandit si central elektrik.

Carl Leverkus dhe fabrika e bojës

Lumi Rin luajti një rol vendimtar. Dobia e lumit si rrugë tregtare transporti bëri që shumë kompani kimike të hedhin bazat e tyre në rajon në fund të shekullit të 19-të.

Qyteti i Leverkusenit madje mori edhe emrin nga industria: Në vitin 1860, kimisti Carl Leverkus e zhvendosi fabrikën e tij nga Wermelskirchen-i në qytetin e vogël të afërt Wiesdorf, në Rin. Më pak se 20 vjet më vonë, paraardhësi i grupit kimik ndërkombëtar Bayer, Farbenfabriken vorm. Friedr. Bayer, gjithashtu u transferua në Wiesdorf nga Elberfeldi, i cili ishte bërë shumë i vogël për nevojat e kompanisë. Falë fabrikës së Leverkus-it, në brigjet e Rinit ishin të pranishme të gjitha lehtësitë e rëndësishme të nevojshme për prodhimin

Fillimet: prodhimi i subtancave kimike në Elberfeld në vitin 1888

Fillimet: prodhimi i subtancave kimike në Elberfeld në vitin 1888

.

Për t'u mundësuar punëtorëve një rrugë të shkurtër për në punë, qendrat e banimit u ndërtuan në afërsi të fabrikave. Shpejt, fshatrat përreth u shndërruan në qytete, të cilat në fund u bënë Leverkuseni i sotëm. Kjo është arsyeja pse zonat e banuara të qytetit janë ende të vendosura në afërsi të fabrikave sot. Në të njëjtën kohë, rritja e industrisë çoi në krijimin e më shumë vendeve të punës, gjë që çoi në një fluks njerëzish në qytete si Këlni.

Gjatë mrekullisë ekonomike të viteve të pasluftës, korporatat e vendosura në Rheinland u rritën ndjeshëm. Rreth fillimit të shekullit, disa parqe kimike lindën nga ristrukturimi i atyre që më parë ishin fabrika kimike të veçanta. Ideja ishte që të kombinoheshin aktivitetet prodhuese të kompanive të ndryshme në një vend të vetëm, të nxitej bashkëpunimi dhe të krijohej me sukses infrastruktura e nevojshme.

Parqet kimike - një sukses gjerman

"Modeli gjerman i parkut kimik është shumë i preferuar nga shtete të tjera", thotë Ernst Grigat, i cili drejtoi Chempark me impiantet e tij në Leverkusen, Dormagen dhe Krefeld-Uerdingen për më shumë se 10 vjet. Në Kinë,  janë ndërtuar sipas modelit gjerman më shumë se një mijë parqe kimike, thotë Grigati, i cili ka shkruar një doktoraturë në kimi. Kjo ndodh, sepse përqendrimi i ekspertizës dhe burimeve mundëson siguri më të mirë dhe menaxhim të mjedisit.

Rhineland-i gjithashtu u ofron kompanive kimike të bazuara atje një avantazh konkurrues. Dendësia e parqeve kimike i lejon firmat të bashkëpunojnë me njëra-tjetrën, thotë Grigat.

"Ekziston një marrëdhënie shumë e fortë midis fabrikave të Rheinland-it, midis Dormagen-it, Leverkusen-it dhe Wesseling-ut," thotë Grigat për DW.

Chempark në Leverkusen

Parku kimik, Leverkusen

Për këtë qëllim, qendra ka qasje në portet detare, ndodhet në një kryqëzim kryesor të transportit evropian dhe është e lidhur me një sistem unik tubacioni, përmes të cilit mund të transportohen 50% e të gjitha materialeve.

"Njerëzit e Këlnit mund të mos e dinë," thotë Grigati. "Por Këlni është kryeqyteti kimik i Gjermanisë, ndoshta edhe i Evropës."

Perspektivë e rrezikshme?

Por a nuk është e rrezikshme të prodhohen kimikate aq afër qyteteve? Jo patjetër, thotë Grigati.

Sigurisht, produktet e krijuara në industrinë kimike mund të jenë të rrezikshme. Por një avantazh i madh i parqeve kimike është se ato kanë një infrastrukturë të nevojshme të sigurisë, siç janë repartet e zjarrit që janë trajnuar posaçërisht në trajtimin e substancave të rrezikshme, tha ai.

Si rezultat, kompanitë e reja po preferojnë të krijojnë baza në parqe kimike, për të siguruar që ato janë të mbrojtura ligjërisht. Fabrikat që dikur ishin të vendosura në një zonë industriale, por tani janë papritmas në mes të qytetit për shkak të rritjes urbane, gjithashtu preferojnë të zhvendosen në një park kimik.

Këto parqe shpesh planifikohen në një shkallë kaq të madhe, sa që standardet e sigurisë mund të respektohen, pavarësisht afërsisë me zonat e banuara, thotë Grigat.