Shpërthim në Parkun Kimik Leverkusen

Një punonjës gjeti vdekjen dhe 31 u plagosën gjatë shpërthimit të rëndë që ndodhi në parkut kimik Currenta Leverkusen. Katër punonjës të tjerë konsiderohen të zhdukur.

Shpërthimi ndodhi në një nga rezervuarët e impiantit të djegies së mbetjeve të rrezikshme, ne zonën ku grumbullohen dhe asgjësohen mbetjet e prodhimit të kompanive kimike që gjenden në këtë park industrial.  Shpërthime shkaktoi zjarre dhe re të shumta tymi që dukeshin prej disa kilometrash larg.

Ndërkohë zjarret janë shuar dhe nuk ka rrezik për përhajpje të mëtejshme në uzinat e tjera të parkut kimik.

Zyra Federale për Mbrojtjen Civile dhe Ndihmën e Fatkeqësive e përcaktoi ngjarjen si "rrezik ekstrem" dhe paralajmëroi popullsinë civile të mos hapë dritaret.

Sipas matjeve të para të ajrit që bënë njësitë e mbrojtjes së mjedisit në veri të Këlnit rreth mesditës rezultoi se për popullsinë aktualisht nuk ka ndonjë rrezik. Megjithatë shoferëve të makinave u kërkohet që të mos hapin dritaret si dhe sistemin e ventilimit në makinë.

Hetimet nëse prej shpërthimit dhe zjarreve janë çliruar në ajër substanca helmuese vazhdojnë.

Parku kimik strehon 70 kompani

I ashtuquajturi park kimik - Chempark - është një nga parqet më të mëdhenj të industrisë kimike në Evropë.

Në një sipërfaqe prej rreth njëmbëdhjetë kilometrash katrorë në këtë park kanë uzinat e tyre mbi 70 kompani, ku punojnë rreth 50,000 vetë në fushat e prodhimit, kërkimit dhe shërbimeve. Vetëm rrjeti i brendshëm rrugor i parkut ka një gjatësi mbi 100 kilometra.

Aty prodhohen kimikate, lëndët e para petrokimike dhe polimerë. Portofoli përfshin rreth 10,000 materiale të ndryshme të papërpunuara dhe produkte si amoniaku, benzeni, goma, silikonet dhe acidi klorhidrik. Parku është i lidhur me sistemin evropian të tubacioneve për naftë dhe benzinë ​​të papërpunuar, gaz natyror, etilen dhe produkte të tjera petrokimike.

Në vitin 2019, koncernet kimike Bayer dhe Lanxess ua shitën aksionet e tyre Currentas - një kompani investimesh në infrastrukturë që i takon bankës australiane Macquarie.