Biden: Jo furnizime me armë për ofensivën izraelite në Rafah

Presidenti amerikan Joe Biden përdori gjatë një interviste për kanalin televiziv amerikan CNN fjalë të qarta në drejtim të Izraelit. "E kam bërë të qartë se nuk do të furnizoj më me armë, nëse ata pushtojnë Rafahun”, tha Biden.

Biden pranoi se armë dhe predha artilerie me të cilat SHBA ka furnizuar Izraelin janë përdorur për të vrarë civilë gjatë ofensivës shtatë-mujore të Izraelit kundër organizatës militante islamike palestineze Hamas.

Shtetet e Bashkuara të Amerikës tashmë kanë pezulluar furnizimin me 3.500 bomba për Izraelin për shkak të rezervave lidhur me ofensivën që planifikon Izraelit në Rafah. I pyetur për këtë vendim Biden tha se nga këto lloj bombash në Gazë janë vrarë civilë.

SHBA do të vazhdojë të kujdeset për sistemin "Kupola e Hekurt" për mbrojtjen ndaj raketave, në mënyrë që Izraeli të jetë "i sigurt" dhe në gjendje për t'iu përgjigjur sulmeve.

Megjithatë Biden u bëri të qartë kryeministrit izraelit Benjamin Netanyahu dhe kabinetit të tij të luftës "se ata nuk do të marrin mbështetjen tonë, nëse vërtetë shkojnë në qendra të populluara".

Ambasadori i Izraelit në OKB shumë i zhgënjyer

Ambasadori i Izraelit në Kombet e Bashkuara, Gilad Erdan, tha se ishte "shumë i zhgënjyer" nga kërcënimi i Bidenit. "Kjo është një deklaratë e vështirë dhe shumë zhgënjyese nga një president të cilit i kemi qenë mirënjohës që nga fillimi i luftës”, tha Erdan për median izraelite Kan.

Deklaratat e Bidenit do të interpretohet nga armiqtë e Izraelit, Irani, Hamasi dhe Hezbollahu si diçka "që u jep atyre shpresë për sukses". Nëse Izraeli pengohet të hyjë në "një zonë kaq të rëndësishme dhe qendrore si Rafahu, ku ndodhen mijëra terroristë, pengje dhe udhëheqës të Hamasit, si mund t'i arrijmë qëllimet tona," tha Erdan.