Sweden yasalimu amri mbele ya Ufaransa

Ufaransa imeonyesha ubora wake katika michuano ya Kombe la Dunia baada ya kuibuka na ushindi wa mabao 3-0 dhidi ya Sweden, huku nyota wake Kylian Mbappé akitia kambani mabao mawili yaliyoiwezesha timu hiyo kutinga hatua ya mtoano ya 16 bora, ambapo sasa itachuana na Paraguay.

Ufaransa ilianza mchezo huo kwa kasi na kuonyesha dhamira ya kutawala mchezo tangu dakika za mwanzo. Kikosi hicho kinachotiwa makali na kocha Didier Deschamps kilitawala umiliki wa mpira, kilicheza kwa nidhamu ya hali ya juu na kutengeneza nafasi nyingi za kufunga, huku Sweden ikijikuta ikitumia muda mwingi kujilinda.

Mbappé alikuwa mwiba mkali kwa safu ya ulinzi ya Sweden kutokana na kasi yake, vyenga, uwezo wa kupenya na umakini wake mbele ya lango. Bao lake la kwanza liliiweka Ufaransa kifua mbele na kuongeza morali kwa wachezaji wenzake, huku Sweden ikilazimika kubadili mbinu ili kutafuta bao la kusawazisha.

Licha ya juhudi za Sweden kuleta ushindani kipindi cha pili, Ufaransa iliendelea kuwa timu bora zaidi uwanjani. Mbappé alipachika bao lake la pili kwa ustadi mkubwa kunako dakika ya 74 ya mchezo, akionyesha kwa mara nyingine kwa nini anahesabiwa miongoni mwa washambuliaji hatari zaidi duniani. Bao hilo lilizima kabisa matumaini ya Sweden ya kurejea mchezoni.

Bao la tatu la Ufaransa lilifungwa na Bradley Barcola na kupiga muhuri ushindi huo wa kishindo na kuifanya timu hiyo kumaliza mchezo ikiwa katika kiwango cha juu cha kujiamini.

Na kwengineko katika uwanja wa Dallas, jimbo la Texas Marekani, safari ya Ivory Coast ilifikia tamati baada ya kupokea kichapo cha mabao 2-1 dhidi ya Norway.

Matokeo hayo yameipa Norway tiketi ya kusonga mbele na sasa itakutana na miamba Brazil katika raundi ya 16 bora huku Ivory Coast ikiyaaga mashindano licha ya kuonyesha kiwango kizuri cha ushindani kwa sehemu kubwa ya mchezo.

Haaland azima moto wa Ivory Coast

Ivory Coast iliingia uwanjani ikiwa na matumaini makubwa ya kuendeleza safari yake kwenye michuano hiyo, lakini ilijikuta ikikabiliwa na wapinzani waliokuwa na nidhamu na uwezo wa kutumia vyema nafasi walizozipata.

Norway ilionyesha utulivu na umakini katika vipindi muhimu vya mchezo, jambo lililowasaidia kupata ushindi na hatimaye kufuzu hatua inayofuata.

Magoli ya Norway yalitiwa kambani na Antonio Musa na Erling Haaland huku bao pekee la Ivory Coast likifungwa na Amad Diallo, ambaye aliingia kipindi cha pili na kuleta uhai mpya katika mchezo.

Baada ya mechi hiyo, kocha wa Ivory Coast, Emerse Fae, alieleza kuwa ameridhishwa na namna ambavyo wachezaji wake walijitoa na kupambana kwa moyo wote licha ya matokeo yasiyokuwa mazuri. Alisema timu yake haikukata tamaa wakati wowote wa mchezo na ilionyesha nia ya kupambana hadi dakika za mwisho.

Fae alibainisha kuwa tofauti kubwa kati ya timu hizo haikuwa katika ari ya ushindani, bali ilikuwa katika kiwango cha ukomavu wa kimchezo. Ameongeza kuwa, Norway ilionyesha uzoefu mkubwa wa kukabiliana na presha katika hatua muhimu za mchezo, huku Ivory Coast ikifanya makosa machache yaliyowagharimu na kuwanyima nafasi ya kurejea mchezoni.

Kocha huyo aliongeza kuwa uzoefu wa kucheza mechi za kiwango cha juu ni jambo linalojengwa kwa muda, na anaamini kikosi chake kimepata somo muhimu litakalowasaidia katika mashindano yajayo.