Franca nuk po arrin të vërë nën kontroll trazirat

Gjatë trazirave të fundit në Francë policia arrestoi rreth 1000 vetë. Ministria e Brendshme njoftoi se gjatë trazirave u plagosën rreth 150 policë dhe xhandarë. Kjo ishte nata e katërt e protestave pas vdekjes së një 17-vjeçari prej dhunës së policisë. 17-vjeçari do të varroset në Nanterre këtë të shtunë (01.07).

Demonstratat dhe tubimet u ndaluan në qytetet e mëdha të vendit si Lion, Marsejë dhe Strasburg. Por pavarësisht ndalimit të protestave pati plaçkitje, dëmtime materiale dhe përplasje të dhunshme.

Sipas njoftimeve të mediave përleshje veçanërisht të dhunshme pati në Marsejë dhe Lion. Në Marsejë u plaçkit ndër të tjera një supermarket, të cilit më parë i kishin vënë zjarrin.

Masa të rrepta

Ministri i Brendshëm Gerald Darmanin urdhëroi vendosjen e masave të rrepta për kufizimin e jetës pubike dhe të qarkullimit natën e së premtes dhe gjatë orëve të para të mëngjesit të ditës së shtunës, dhe mobilizoi rreth 45,000 policë dhe forca speciale për kontrollin e tyre.

Sipas Ministrisë së Brendshme franceze falë mobilizimit të forcave të sigurisë në të gjithë vendin, dhuna kishte qenë më pak intensive se një natë më parë.

Trazira edhe në territoret franceze jashtë shtetit

Ndërkohë, trazirat nuk u përhapën vetëm në kryeqytetin belg, Bruksel, por edhe në territoret franceze jashtë shtetit. Gjatë protestave në Kajenë, kryeqyteti i Guajanës Franceze, u vra një person nga një plumb rikoshetë.

Dhunë ka pasur edhe në Martinikë, ku rreth 20 deri në 30 persona të maskuar me kapuçë qëlluan gurë oficerët e policisë në kryeqytetin Fort-de-France. Në disa vende protestuesit dogjën kazanët e plehrave.