Durimi shpërblehet- Angela Merkel është kancelare

Tri javë pas zgjedhjeve parlamentare krerët e Bashkimit Kristiandemokrat-kristiansocial dhe të Partisë Socialdemokrate janë marrë vesh për zgjedhjen e kryetares së CDU-së, Angela Merkel, e para kancelare në historinë e Gjermanisë, në rast se arrihet një koalicion i gjerë. Si kompensim socialdemokratët do të kenë dy poste ministrore më shumë sesa CDU-CSU-ja. Presidiumet e partive e miratuan me shumicë të madhe kompromisin. Aktualisht kryesitë e partive po këshillohen për të vendosur në përfundim mbi fillimin e negociatave formale për koalicionin. Nga CDU-CSU-ja mësohet se zëvendëskryetari i tanishëm i parlamentit Norbert Lammert do të jetë kryetari i ri i Bundestagut. CDU-CSU do të ketë gjithashtu ministritë e mbrojtjes dhe atë të brendshme. Ministri aktual i ekonomisë Wolfgang Clement bëri të ditur se nuk do të jetë anëtar i kabinetit të ardhshëm. Pasues i tij në post do të jetë kryetari i Partisë Kristiansociale Edmund Stoiber. Sipas raporteve të pakonfirmuara socialdemokratët do të kenë ministrinë e jashtme, atë të financave, të drejtësisë si dhe të punës e çështjeve sociale.

Gjatë një konference për shtyp sot pasdite Angela Merkel tha:

"Bashkimi CDU/CSU do të zërë vendin e kancelarit. CDU/CSU dhe socialdemokratët do të kenë numër të njëjtë votash në kabinetin qeveritar, kjo do të thotë që asnjëra palë nuk mund ta majorizojë me votë palën tjetër."