Германія, Польшча, Украіна: як жывуць беларускія айцішнікі ў эміграцыі | Беларусь: погляд з Еўропы - па-беларуску | DW | 04.05.2021

Посетите новый сайт DW

Зайдите на бета-версию сайта dw.com. Мы еще не завершили работу. Ваше мнение поможет нам сделать новый сайт лучше.

  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

Па-беларуску

Германія, Польшча, Украіна: як жывуць беларускія айцішнікі ў эміграцыі

На фоне рэпрэсій, павышэння падаходнага падатку і праблем з інтэрнэтам беларускія IT-спецыялісты працягваюць пакідаць краіну. DW паразмаўляла з трыма беларускімі айцішнікамі, якія цяпер жывуць і працуюць за мяжой.

DW паразмаўляла з айцішнікамі, якія з’ехалі з Беларусі і сення працуюць ва Ўкраіне, Польшчы і Германіі.

Украіна: шмат беларусаў, самотна не бывае

Максім – праектны менеджар у беларускай кампаніі, што займаецца распрацоўкай мабільных дадаткаў і вэб-сайтаў. У свой вольны час ён займаецца праваабарончай дзейнасцю, а таксама ўваходзіць у КС. 4 месяцы таму праз пагрозу палітычнага і крымінальнага пераследу Максім вымушаны быў з’ехаць ва Ўкраіну: "Дзесьці з 25 лістапада пачалі масава ўзбуджаць крымінальныя справы. Шмат маіх сяброў пасадзілі яшчэ 12 лістапада па крымінальнай справе супраць студэнтаў, і я разумеў, што сёння, заўтра або праз тыдзень выйдуць на мяне".

Belarus Beitrag IT-Fachleute im Ausland | Maksim Kavalou

Максім, менеджар IT-праектаў

Кампанія, на якую працуе Максім, суправаджала яго на ўсіх этапах легалізацыі ў новай краіне, а таксама аплаціла выдаткі, звязаныя з пераездам: "Нашая кампанія арыентаваная на бізнес і не ўмешваецца ў палітыку. Але калі ты разумееш, што хутка па цябе прыйдуць, кампанія дапаможа табе з’ехаць". Пасля жніўня 2020 года з кампаніі Максіма з’ехалі каля 30 чалавек, частка плануе з’ехаць цягам гэтага года. 7 калегаў Максіма жывуць зусім побач: "Мы кожны аўторак ходзім у лазню, на выходных вандруем па краіне. І ў цэлым у Кіеве шмат беларусаў, у нас тут вялікая кам’юніці, і мы кожную нядзелю ладзім акцыі на Майдане. Таму самотна не бывае".

Украіну Максім абраў праз тое, што адтуль паходзіць ягоны бацька, гэта дазваляе атрымаць сталы від на жыхарства: "Плюс няма моўнага фактара, і ў нашай кампаніі тут ёсць філія. Мне прапаноўвалі яшчэ Польшчу і Латвію, але гэта было не так цікава з-за падаткаў".

Ва Ўкраіне Максім працуе як індывідуальны прадпрымальнік, што дазваляе эканоміць на падатках. У выніку ён зарабляе амаль столькі ж, колькі ў Беларусі: "Калі б я з’ехаў у Латвію, там бы я згубіў каля 30% ад таго заробку, які маю цяпер".

Максім жыве ў прыгарадзе Кіева. За арэнду аднапакаёўкі штомесяц ён аддае каля 230 еўра. Такія ж грошы ён выдаткоўваў на арэнду жытла ў мінскай Лошыцы: "У Кіеве вельмі дарагая арэнда, такое жытло каштавала б, напэўна, еўра 330. Але ў цэлым па Ўкраіне квадратны метр таннейшы за мінскі. Нармальную кватэру можна набыць за 600-700 еўра за квадратны метр". А вось на камуналку цяпер даводзіцца выдаткоўваць у два разы больш: 170 рублёў замест 70-80 у Мінску. Кошты на прадукты ва Ўкраіне, як мяркуе Максім, моцна не адрозніваюцца ад беларускіх.

Цяпер Максім адчувае сябе значна лепей, чым да ад’езду: "Адчуваю, што я ў бяспецы, магу спакойна вандраваць, гуляць і ўначы, і ўдзень, магу гуляць са сцягам, спяваць песні і ведаю, што мне нічога не пагражае".

Польшча: кошты на ежу не адрозніваюцца, а арэнда i квіткі на праезд значна даражэй

Марына (імя змененае – Рэд.) пераехала ў Польшчу 2 месяцы таму па праграме Poland.Business Harbour, якая дазваляе беларускім IT-спецыялістам бясплатна атрымаць візу і працаваць без дадатковых дазволаў: "Атрымаць візу было нескладана, чакаць трэба было крыху больш за месяц".

Polen Warschau Hochhäuser

Варшава, цэнтр гораду

Марына працуе праектным менеджарам у кампаніі, што распрацоўвае мабільныя дадаткі. Да пераезду яе падштурхнула нежаданне мірыцца з несправядлівасцю навокал: "Тое, што цяпер адбываецца, вельмі моцна ўплывае на мяне ў эмацыйным плане".

Кампанія, на якую працуе Марына, прапануе праграму рэлакейту супрацоўнікаў ва ўкраінскі офіс. Але Марына вырашыла абраць Польшчу: "З гэтай краінай мяне больш што звязвае, у мяне тут ёсць сябры, я ведаю мову".

Заробак Марына працягвае атрымліваць на беларускую картку, якой без праблем разлічваецца ў варшаўскіх крамах. Але польскую картку таксама давялося зрабіць, каб аплочваць арэнду. У Мінску Марына здымала кватэру разам з сяброўкай, на арэнду штомесяц ішло каля 165 еўра. У Варшаве арэнда абыходзіцца ў 2,7 разы болей – 455 еўра за аднапакаёвую кватэру разам з камунальнымі і інтэрнэтам. Кошты на ежу, кажа Марына, асабліва не адрозніваюцца. А вось квіткі на праезд у Варшаве значна даражэй.

Камуналка ў Польшчы абыходзіцца мінімум у два разы болей – каля 85 еўра. У цэлым грошай застаецца менш з-за большых выдаткаў на арэнду.

Нягледзячы на абмежаванні ў сувязі з пандэміяй дыскамфорту ад жыцця ў Варшаве Марына не адчувае: "Хоць у Беларусі і працуюць кавярні, але большасць маіх знаёмых з’ехала, таму гэта не было для мяне вялікім плюсам. Знікла моцная трывога, якая была ў Беларусі. Часам калі я бачу паліцэйскія бусы, мяне яшчэ крыху трыгерыць. Але ў цэлым мой эмацыйны стан палепшыўся, атрымліваю асалоду ад жыцця".

Германія: з айцішным заробкам у Мінску можна жыць нашмат лепш

Алеся яшчэ 4 гады таму пераехала ў Германію – пасля таго, як яе мужу прапанавалі працу ў Гамбургу. У Беларусі яна 7 гадоў працавала ў IT сектары: "Пасля пераезду спачатку я не займалася пошукам працы, вывучала нямецкую мову. А пасля вельмі хутка атрымалася знайсці сваю першую працу". За 4 гады Алеся паспела папрацаваць у якасці quality assurance ingeneer у трох розных кампаніях.

Belarus Beitrag IT-Fachleute im Ausland | Alesya Stashkevich

Алеся ў нямецкім офісе

Розніца паміж беларускімі і нямецкімі IT-кампаніямі, на думку Алесі, у асноўным у тым, што ў Беларусі шмат якія кампаніі працуюць на аўтсорс, а ў Германіі IT-кампаніі займаюцца распрацоўкай уласных прадуктаў: "Тут працуеш на канкрэтным праекце, не мяняеш каманду, ведаеш усіх людзей і больш уцягнуты ў працэс". Яшчэ адна розніца ў тым, што ў Германіі запатрабаваныя больш універсальныя IT-спецыялісты, якія могуць выконваць больш шырокі спектр задач: "У Беларусі мне не трэба было займацца праграмаваннем, а тут трэба ведаць і ўмець усё. Але гэта нескладана асвоіць у працэсе працы".

Нямецкі заробак у IT-сектары не асабліва адрозніваецца ад беларускага: "Да аплаты падаткаў ён падаецца неблагім, але ў выніку ты атрымліваеш на рукі ў Беларусі і Германіі амаль тое самае. А жыццё ў Германіі нашмат даражэйшае, таму з айцішным заробкам у Мінску можна нашмат лепш жыць". На арэнду 3-пакаёвай кватэры штомесяц Алеся разам з мужам выдаткоўвае 1000 еўра, гэта ўключае ў сябе камуналку (каля 250 еўра). У Мінску за камуналку Алеся плаціла не больш за 30-40 еўра штомесяц. Праязны на транспарт абыходзіцца ў 80-120 еўра ў месяц. Кошты на прадукты, кавярні, кіно ў Германіі нашмат вышэйшыя.

Belarus Beitrag IT-Fachleute im Ausland | Alesya Stashkevich

Алеся з мужам у нацыянальных нямецкіх касцюмах

З перавагаў працы ў беларускіх IT-кампаніях Алеся называе сацыяльныя бенефіты – абанемент у спартовую залю, прыватную медычную страхоўку, выходны на дзень народзінаў: "Цяпер у мяне няма ніякіх бенефітаў апроч 15 еўраў на праязны квіток. Яшчэ медычная страхоўка, але тут яна ва ўсіх".

У нямецкай кампаніі Алесі падабаецца праца ў міжнародным асяродку: "У Мінску працуеш у больш монакультурнай камандзе, таму што да нас не прыязджаюць замежнікі. Плюс work-life balance у Германіі нашмат лепшы, чым у Мінску". У цэлым Алеся называе Германію камфортнай краінай для жыцця, якая дапамагае людзям у розных сітуацыях: "Але ў Германіі дастаткова закрытыя людзі. Для мяне гэта вялікі мінус, я пакуль не магу інтэгравацца ў нямецкае грамадства, таму я сябе не вельмі добра адчуваю ў сацыяльным плане".

Вялікай хвалі эміграцыі сярод сваіх знаёмых айцішнікаў у Мінску Алеся не назірае: "Усім цяперашняя сітуацыя не падабаецца, але ўсе разумеюць, што жыццё за мяжой нашмат больш складанае, таксама і ў фінансавым плане".

Глядзіце таксама:

Активистка из Беларуси – о протестах, репрессиях, солидарности и эмиграции

Контекст