Najeriya ta nuna fushi kan rikicin Ukraine

Najeriya ta yi kira ga jami'an kan iyaka a Ukraine da sauran kasashe makwabta da su mutunta 'yan kasarta da ke Ukraine. Mai bai wa shugaban Najeriya shawara kan yada labarai Garba Shehu ya ce Najeriya ta samu rahotanni marasa dadin ji na yadda ake hana 'yan kasarta hawa motocin safa-safa da jiragen kasa domin shiga kasar Poland da sauran kasashe. Ya kuma ce akwai rahoton da ke nuna cewa kasar Poland ita ma ta fara hana 'yan Najeriya da ke Ukraine shiga kasarta.

Najeriyar ta ce yana da muhimmanci a mutunta kowa da kowa ba tare da nuna wata alfarma ba. Sai dai tuni ofishin jakadancin Poland da ke Najeriya ya musanta zargin, a yayin da ake dakon jin martanin ofishin jakadancin Ukraine a Najeriya kan wannan batu da ke ci gaba da daukar hankalin kasashen duniya.