ایران نے خلیج میں امریکی اڈوں کو نشانہ بنایا، تہران کا دعویٰ

دنیا بھر کے کیتھولک مسیحیوں کے روحانی پیشوا پوپ لیو ہفتہ چھ جون کے روز اپنے کئی روزہ دورے پر اسپین پہنچ گئے۔ یہ ان کا پاپائے روم کے طور پر اسپین کا اولین سرکاری دورہ ہے اور گزشتہ 15 برسوں میں کسی بھی پوپ کا اسپین کا پہلا دورہ بھی۔

اس کے علاوہ اپنے اس دورے کے دوران پوپ لیو میڈرڈ میں ہسپانوی پارلیمان سے خطاب  بھی کریں گے۔ ان سے پہلے آج تک کسی بھی پوپ نے میڈرڈ میں اسپین کی قومی پارلیمان سے کبھی خطاب نہیں کیا۔

پوپ لیو کا استنبول کی تاریخی نیلی مسجد کا دورہ

کلیسائے روم کے سربراہ کا جزیرہ نما آئبیریا کی بادشاہت اسپین کا ہفتہ چھ جون کو شروع ہونے والا یہ دورہ 12 جون کو اپنے اختتام کو پہنچے گا۔

پاپائے روم کا عالمی رہنماؤں سے مطالبہ

میڈرڈ پہنچنے کے بعد پوپ لیو نے اس دورے کے دوران اپنا جو پہلا خطاب کیا، وہ اپنے پیغام میں بہت پرزور اور بالکل واضح تھا۔

پوپ لیو نے عالمی رہنماؤں سے مخاطب ہوتے ہوئے کہا کہ انہیں ’’امن کے لیے روتی اور چیخیں مارتی ہوئی دنیا کی آوازیں‘‘ سننا چاہییں۔
پوپ لیو کے الفاظ میں، ’’(عالمی رہنماؤں کو) صرف اپنی مقبولیت میں اضافے کے لیے معاملات کو حد سے زیادہ سادہ بنا کر پیش کرتے ہوئے عوام کو تقسیم کر دینے کی روش ترک کرنا چاہیے۔‘‘

کیتھولک پوپ اور برطانوی بادشاہ کا 500 سال بعد مشترکہ دعائیہ اجتماع

پوپ لیو نے حالیہ ہفتوں میں ایران جنگ اور تارکین وطن کے خلاف پالیسیوں کی وجہ سے جنگوں سے تباہی اور مہاجرین کے ساتھ بدسلوکی کے خلاف جو بیانات دیے تھے، ان پر امریکہ کے صدر ڈونلڈ ٹرمپ کافی ناراض ہو گئے تھے۔ اپنی اس ناراضی کے اظہار کرتے ہوئے صدر ٹرمپ نے پوپ پر بہت کم نظر آنے والے تنقید بھی کی تھی۔

ٹرمپ اور پوپ میں مصالحت کی روبیو کی کوشش کتنی کامیاب رہی؟

اس کے جواب میں پوپ لیو نے کہا تھا کہ جنگوں کی تباہ کاریوں اور خود پسند حکمرانوں کے خلاف آئندہ بھی بولتے رہیں گے۔

اس پس منظر میں پوپ لیو اسپین میں اپنے قیام کے دوران میڈرڈ میں بے گھر انسانوں اور جزائر کیناری پر تارکین وطن سے بھی ملیں گے۔

میڈرڈ سے ملنے والی رپورٹوں کے مطابق پاپائے روم بے گھر انسانوں اور تارکین وطن اور مہاجرین سے مل کر اس بارے میں دنیا کے لیے ایک عملی مثال قائم کریں گے کہ ’’ہر انسان کی عزت اور تکریم‘‘ کی جانا چاہیے۔

جرمنی میں سیاسی محرکات کی بنا پر جرائم کے ارتکاب کی مجموعی تعداد کے حوالے سے گزشتہ سال ایک نیا ریکارڈ دیکھنے میں آیا۔ ایک رپورٹ کے مطابق 2025ء کے دوران یورپی یونین کے آبادی کے لحاظ سے اس سب سے بڑے رکن ملک میں ایسے جرائم کی تعداد کم از کم بھی 85 ہزار رہی۔

اے ایف ڈی کا ملک کی داخلی انٹیلی جنس ایجنسی پر مقدمہ

جرمن اخبار ’ویلٹ ام زونٹاگ‘ نے ہفتہ چھ جون کے روز بتایا کہ جرمنی کے تمام 16 وفاقی صوبوں میں سے 15 میں 2025ء کے دوران ایسے جرائم کی مجموعی تعداد کم از کم بھی 85,000 رہی، جن کے ارتکاب کے بنیادی محرکات سیاسی نوعیت کے تھے۔ اس سے قبل 2024ء میں ایسے جرائم کی سالانہ تعداد 84,174 رہی تھی۔

اس بارے میں ایک تفصیلی رپورٹ اخبار ’ویلٹ ام زونٹاگ‘ کی کل اتوار سات جون کی اشاعت میں شائع کی جا رہی ہے۔

جرمن سکیورٹی اداروں کی سخت گیر اسلام پسندوں پر کڑی نظر، وزیر داخلہ

پندرہ وفاقی صوبوں کا ڈیٹا

اس جرمن جریدے نے اس موضوع پر اپنی تفصیلی چھان بین کے بعد بتایا کہ جرمنی میں ایسے جرائم کی سالانہ تعداد گزشتہ ایک دہائی کے دوران دو گنا ہو چکی ہے۔

جرمنی میں وفاقی صوبوں کی مجموعی تعداد 16 ہے اور یہ سالانہ اعداد و شمار 15 صوبوں کے ڈیٹا کو جمع کر کے تیار کیے گئے ہیں۔ ان میں صرف ایک صوبے رائن لینڈ پلاٹینیٹ کا گزشتہ برس کا سالانہ ڈیٹا شامل نہ کیا جا سکا۔

برلن میں ہزارہا شہریوں کا دائیں بازو کے انتہا پسندی خلاف احتجاجی مظاہرہ

جریدے کے مطابق ملک میں ایسے جرائم کی شرح بھی بڑھ رہی ہے، جن کے محرکات تو سیاسی تھے، لیکن جو پرتشدد جرائم تھے۔
گزشتہ برس ایسے پرتشدد سیاسی جرائم کی تعداد 4,100 سے زائد رہی۔ ان میں جسمانی حملے، توڑ پھوڑ، دھماکہ خیز مواد کے ساتھ کیے جانے والے جرائم اور نقص امن کے جرائم خاص طور پر قابل ذکر تھے۔

داخلی سیاسی تقسیم اور مشرق وسطیٰ کے تنازعات

جریدے کے مطابق ملک میں ان جرائم کی شرح میں اضافے کی بڑی وجوہات میں گزشتہ برس داخلی سیاسی تقسیم کا باعث بننے والے قومی انتخابات اور مشرق وسطیٰ میں پائے جانے والے خونریز تنازعات بھی شامل تھے۔

'دائیں بازو کی انتہا پسندی سے جرمن معیشت کو ممکنہ خطرہ'

اہم بات یہ ہے کہ ان جرائم میں سے نصف سے زائد کو تفتیشی اہلکاروں نے انتہائی دائیں بازو کی سوچ کے نتیجے میں ہونے والے جرائم قرار دیا۔

اس کے علاوہ بائیں بازو کی انتہا پسندانہ سوچ کی وجہ سے جن جرائم کا ارتکاب کیا گیا، ان کی سالانہ تعداد میں بھی قریب 35 فیصد اضافہ دیکھنے میں آیا۔

جرمنی کے دارالحکومت برلن میں زیر علاج ایبولا وائرس کے ایک امریکی مریض کو دو ہفتوں تک علاج کے نتیجے میں صحت یاب ہونے کے بعد ہفتہ چھ جون کو شاریٹے نامی ہسپتال سے فارغ کر دیا گیا۔

برلن کے اس بہت بڑے اور مشہور ہسپتال کی طرف سے بتایا گیا کہ یہ مریض ایک ایسا امریکی ڈاکٹر ہے جو ڈیموکریٹک ریپبلک کانگو میں ایبولا وائرس کا شکار ہو گیا تھا، ’’لیکن اب یہ مریض صحت یاب ہو چکا ہے اور اس کی جسمانی حالت بھی اچھی ہے۔‘‘

شاریٹے ہسپتال کی طرف سے جاری کردہ ایک بیان میں کہا گیا، ’’یہ مریض، جو امریکہ کا شہری ہے، 20 مئی سے شاریٹے ہسپتال کے قرنطینہ کے طور پر تیا رکردہ ایک خصوصی میڈیکل یونٹ میں زیر علاج تھا اور اس میں 72 گھنٹے سے بھی زیادہ عرصے تک، ایبولا وائرس سے لگنے والی بیماری کے مزید کوئی طبی شواہد نہ ملنے اور اس کے جسم میں ایبولا وائرس کی موجودگی کی تصدیق نہ ہونے پر، اسے ہفتے کے روز ہسپتال سے چھٹی دے دی گئی۔‘‘

دنیا کے دس انتہائی خطرناک وائرس

بیس مئی کو علاج کے لیے برلن کے اس ہسپتال میں لائے جانے کے بعد سے اس مریض کے ہر روز تفصیلی طبی ٹیسٹ کیے جاتے رہے تھے اور ساتھ اس کی مسلسل ’کمبائنڈ اینٹی وائرل‘ تھیراپی بھی کی گئی تھی۔

ہسپتال کے بیان کے مطابق اس علاج کے نتیجے میں 30 مئی کے بعد بھی ہر روز کیے جانے والے طبی ٹیسٹوں میں اس مریض میں ایبولا وائرس کی موجودگی ایک بار بھی ثابت نہ ہوئی، جس کے بعد اسے ہسپتال سے فارغ کر دینے کا فیصلہ کیا گیا۔

روسی صدر دلاویمیر پوٹن کی طرف سے یوکرین کے صدر وولودیمیر زیلنسکی کی براہ راست امن مذاکرات کے لیے ملاقات کی پیشکش مسترد کیے جانے کے بعد کییف کی مسلح افواج نے روس پر نئے فضائی حملے کیے ہیں۔

روسی یوکرینی جنگ میں کییف کی طرف سے یہ نئے فوجی حملے خاص طور پر روسی شہر سینٹ پیٹرزبرگ پر کیے گئے۔ یوکرین نے روس کے اس دوسرے سب سے بڑے شہر کو  چھ جون کی صبح تازہ فضائی حملوں کا نشانہ بنایا۔

روس کی یوکرین کے خلاف جنگ آئندہ کیا رخ اختیار کر سکتی ہے؟

سینٹ پیٹرزبرگ سے ملنے والی رپورٹوں کے مطابق مقامی حکام نے آج صبح ہی عام شہریوں کو ہدایت کر دی تھی کہ وہ اپنے گھروں سے باہر نہ نکلیں۔ مختلف نیوز ایجنسیوں نے اس بارے میں اپنی رپورٹوں میں لکھا ہے کہ کییف کی سینٹ پیٹرزبرگ کو بار بار نشانہ بنانے کی کوششیں اور وہاں مقامی حکام کا عام شہریوں کو گھروں سے باہر نہ نکلنے کا مشورہ دینا، دونوں ہی اس امر کی طرف اشارہ کرتے ہیں کہ اس جنگ میں یوکرین کی روس کے بہت اندر تک کے علاقوں پر حملے کرنے کی صلاحیت مسلسل بڑھتی جا رہی ہے۔

یوکرین جنگ: پوٹن کی سابق جرمن چانسلر کو ثالث بنانے کی تجویز، برلن محتاط

سینٹ پیٹرزبرگ کے گورنر الیکسانڈر بیگلوف نے شہریوں کو خبردار کرتے ہوئے کہا کہ انہیں اپنے گھروں میں ہی رہنا چاہیے اور ممکن ہے کہ موبائل انٹربیٹ رابطے بھی غیر فعال ہو جائیں۔

روس وکٹری ڈے پریڈ پر ممکنہ یوکرینی حملے سے خوف زدہ، زیلنسکی

دوسری طرف علاقائی گورنر الیکساندڑ دروزدینکو نے کہا کہ ہمسایہ روسی علاقے لینن گراڈ کی فضا میں گزشتہ شب اور آج ہفتے کی صبح تک مجموعی طور پر 141 ایسے ڈرونز مار گرائے گئے، جو یوکرین کی طرف سے حملوں کے لیے بھیجے گئے تھے۔

یوکرینی صدر زیلنسکی نے ہفتے کے روز ایکس پر اپنی ایک پوسٹ میں لکھا، ’’گزشتہ رات ہمارے ڈرونز تقریباﹰ ایک ہزار کلومیٹر کا فاصلہ طے کرتے ہوئے روس میں سینٹ پیٹرزبرگ تک کے علاقے میں پہنچ گئے، وہاں تک جہاں دشمن کی بحریہ کے جنگی سامان کی ایک ذخیرہ گاہ ہے اور ایک بحری اڈہ بھی۔‘‘

جرمن چانسلر کا زیلنسکی سے اصلاحات کا عمل تیز کرنے کا مطالبہ

بحیرہ بالٹک میں روسی تیل کی برآمدی بندرگاہ پر ایک بار پھر یوکرینی حملہ

اسی دوران یوکرینی فوج کی طرف سے بھی ایک بیان میں ہفتے کے روز کہا گیا کہ اس نے روسی خطے لینن گراڈ میں ایک آئل ڈپو اور ایک آئل ٹرمینل کو مسلح ڈرونز کے ساتھ کیے گئے حملوں میں نشانہ بنایا۔

اسرائیل کی طرف سے ہمسایہ ملک لبنان کے جنوب میں ایک گاڑی پر کیے جانے والے ایک نئے فضائی حملے میں لبنانی فوج کے تین اہلکار ہلاک ہو گئے۔ یہ بات ملکی دارالحکومت بیروت میں لبنانی فوج کی طرف سے بتائی گئی۔

یہ فوجی ہلاکتیں ایسے وقت پر ہوئی ہیں، جب ابھی چند روز قبل ہی واشنگٹن میں اسرائیل اور لبنان کے مابین ہونے والے مذاکرات کے بعد امریکہ کے صدر ڈونلڈ ٹرمپ نے اعلان کیا تھا کہ دونوں ممالک کے مابین ایک مشروط فائر بندی ڈیل طے پا گئی ہے۔

ایران کا حزب اللہ کی حمایت کا اعادہ، امن کی منزل ہنوز دور

لبنانی فوج کی طرف سے سوشل میڈیا پلیٹ فارم ایکس پر ایک پوسٹ میں بتایا گیا، ’’اسرائیل نے بربریت کا مظاہرہ کرتے ہوئے جنوبی لبنان میں خردلی اور نبطیہ کے درمیان سڑک پر ایک فوجی گاڑی کو فضائی حملے کا نشانہ بنایا، جس کے نتیجے میں ایک فوجی افسر سمیت متعدد فوجی اہلکار مارے گئے۔‘‘

دوسری طرف اسرائیلی فوج نے اپنے ایک بیان میں کہا ہے کہ اس کی طرف سے ایک ایسی گاڑی کو فضائی حملے میں ٹارگٹ کیا گیا، جو ’’مشکوک انداز میں حرکت‘‘ کر رہی تھی، وہ بھی ’’ایک ایسے فعال جنگی علاقے میں، جسے خالی کرایا جا چکا تھا۔‘‘

اسرائیلی دفاعی افواج (آئی ڈی ایف) کی طرف سے مزید کہا گیا، ’’اسرائیلی فوج دہشت گرد تنظیم حزب اللہ کے خلاف مسلح کارروائیاں کرتی ہے، لبنانی فوج کے خلاف نہیں۔‘‘ ساتھ ہی یہ بھی کہا گیا کہ اسرائیلی فوج اس واقعے کا جائزہ لے رہی ہے۔

حزب اللہ کے سربراہ کا ’جامع‘ جنگ بندی کا مطالبہ

اسرائیل اور لبنان کی ایران نواز ملیشیا حزب اللہ کے مابین جنگ کو ختم کرانے کے لیے جو فائر بندی 17 اپریل سے نافذ ہے، اس کا اب تک مکمل احترام نہیں کیا گیا اور سیزفائر طے ہونے کے بعد سے لبنان میں اسرائیلی فوج کی زمینی کارروائیاں اور فضائی حملے بھی مسلسل جاری ہیں، جبکہ جواباﹰ حزب اللہ کی طرف سے بھی اسرائیلی فوجیوں پر حملوں کی بار بار کوششیں کی جاتی رہی ہیں۔

اسرائیل اور لبنان میں امن مذاکرات، مگر اسرائیلی فوجی پیش قدمی بھی جاری

جنوبی لبنان میں اسرائیلی فوج کی مزید پیش قدمی: شدید فضائی و زمینی حملے

لبنان جنگ میں اسرائیل اور لبنان نے جس تازہ فائر بندی پر اتفاق کیا تھا، اسے حزب اللہ کی طرف سے یہ کہہ کر مسترد کیا جا چکا ہے کہ جنگ کے خاتمے کے لیے اسرائیلی فوج لبنان کے وہ تمام ریاستی علاقے خالی کرے، جن پر اس کا قبضہ ہے یا جہاں وہ موجود ہے۔

امریکی فوج کی مرکزی کمان (سینٹ کام) نے ہفتہ چھ جون کے روز کہا کہ اس نے ایران کی طرف سے اسٹریٹیجک اہمیت کی حامل آبنائے ہرمز کی طرف لانچ کیے گئے متعدد بیلسٹک میزائلوں اور چار جنگی ڈرونز کو مار گرایا۔

ایران نے خلیج فارس میں امریکی اڈوں کو نشانہ بنایا، تہران کا دعویٰ

امریکہ کی فوج کے جاری کردہ ایک بیان میں ہفتے کو علی الصبح کہا گیا کہ یہ چاروں مسلح ڈرونز ایسے تھے جو ’’اپنے ہدف کو نشانہ بناتے ہوئے خود بھی تباہ ہو جاتے ہیں۔‘‘

سینٹ کام کی طرف سے سوشل میڈیا پلیٹ فارم ایکس پر ایک پوسٹ میں لکھا گیا، ’’ون وے حملوں کے لیے بھیجے گئے یہ ایرانی ڈرونز خطے میں میری ٹائم ٹریفک کے لیے فوری نوعیت کا ایک بڑا خطرہ تھے، جسے ناکام بنا دیا گیا۔‘‘

جنگ کا دباؤ، کیا ایران میں نظام اب بھی مستحکم ہے؟

ایران کا حزب اللہ کی حمایت کا اعادہ، امن کی منزل ہنوز دور

ساتھ ہی امریکی فوج نے مزید کہا کہ اس نے خلیج فارس میں ایرانی جزیرے قشم پر بھی تازہ حملے کیے ہیں اور ایرانی شہر گروک میں ان ریڈار تنصیبات کو بھی ہدف بنایا گیا، جو ایرانی ساحلی علاقوں کی نگرانی کے لیے استعمال ہوتی تھیں۔

اس سے قبل یو ایس سینٹ کام کی طرف سے ایک مختلف بیان میں یہ بھی کہا گیا تھا کہ امریکی فوج نے مجموعی طور پر کئی ایسے ایرانی بیلسٹک میزائلوں اور ڈرونز کو فضا میں ہی تباہ کر دیا، جو ایران کی طرف سے آبنائے ہرمز کے سمندری علاقے میں اور خطے کی ہمسایہ عرب ریاستوں پر حملوں کے لیے لانچ کیے گئے تھے۔

کویت کے مرکزی ہوائی اڈے پر ایرانی ڈرون حملہ، ایک بھارتی شہری ہلاک اور درجنوں افراد زخمی

سینٹ کام نے ایک بیان میں کہا، ’’ابتدائی اندازوں کے مطابق چھ ایرانی میزائلوں کو فضا میں ہی تباہ کر دیا گیا جبکہ ساتواں ایرانی میزائل اپنے ٹارگٹ تک پہنچنے میں ناکام رہا۔‘‘

ایرانی پاسداران انقلاب نے ہفتہ چھ جون کے روز دعویٰ کیا کہ انہوں نے خطے میں امریکی فوجی اڈوں کو پھر نشانہ بنایا ہے۔ اس دوران کویت نے ایرانی ڈرونز مار گرانے کا دعویٰ کیا جبکہ بحرین میں فضائی حملے کے خلاف سائرن بجائے گئے۔

تہران سے موصولہ رپورٹوں کے مطابق ایران کی پاسداران انقلاب اسلامی کور (آئی آر جی سی) نے ہفتے کے دن کہا کہ اس نے خلیج فارس کے خطے میں جو نئے حملے کیے، ان کا ہدف علاقے میں امریکی فوجی اڈے تھے۔

جنگ کا دباؤ، کیا ایران میں نظام اب بھی مستحکم ہے؟

ریاستی نشریاتی ادارے آئی آر آئی بی نے اپنی نشریات میں پاسداران انقلاب کے جاری کردہ ایک بیان کا حوالہ دیتے ہوئے بتایا کہ امریکہکی فوج کی طرف سے ’’سیریک شہر اور قشم کے جزیرے پر دہشت گردانہ حملوں اور ایک بچے کی ہلاکت کا سبب بننے والی جارحیت کے بعد خطے میں دشمن کے اڈوں کو میزائلوں سے نشانہ بنایا گیا۔‘‘

ایران کا حزب اللہ کی حمایت کا اعادہ، امن کی منزل ہنوز دور

ایرانی ڈرونز کے خلاف کویت کی کارروائی، بحرین میں خطرے کے سائرن

انہی حملوں کے تناظر میں بعد ازاں خلیجی عرب ریاست کویت کی طرف سے کہا گیا کہ اس کے فضائی دفاعی نظام نے ’’جارحانہ‘‘ ڈرونز اور میزائلوں کے خلاف کارروائی کی۔

اسی طرح خلیج فارس کے ایک دوسرے ملک بحرین میں بھی فضائی حملوں سے خبردار کرنے والے سائرن بجانا پڑ گئے۔

حزب اللہ کے سربراہ کا ’جامع‘ جنگ بندی کا مطالبہ

ہفتے کو علی الصبح بحرین میں جب سائرن بجائے گئے، تو ساتھ ہی ملکی وزارت داخلہ نے سوشل میڈیا پلیٹ فارم ایکس پر اپنی ایک پوسٹ میں لکھا، ’’تمام شہریوں اور مقامی رہائشیوں کو ہدایت کی جاتی ہے کہ وہ پرسکون رہیں اور قریب ترین محفوط جگہوں کا رخ کریں۔‘‘
ادارت: عدنان اسحاق