Joe Biden ni rais mteule wa Marekani | Matukio ya Kisiasa | DW | 07.11.2020
  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages
Matangazo

Matukio ya Kisiasa

Joe Biden ni rais mteule wa Marekani

Joe Biden amemshinda rais aliye madarakani Donald Trump

Mgombea wa chama cha Democratic Joe Biden ameshinda uchaguzi wa Marekani Jumamosi akimshinda Donald Trump na kufikisha mwisho enzi iliyozigubika na kuzitia katika mtihani mkubwa siasa za Marekani. Ushindi wa Biden umeushangaza ulimwengu na kuiacha Marekani ikiwa katika mpasuko na kugawika kuliko wakati wowote katika miongo kadhaa.

Kansela wa Ujerumani, Angela Merkel, amempongeza Biden kwa ushindi wake. "Namtakia kila la kheri na ufanisi kwa moyo wangu wote na pia nampongeza Kamala Harris, mwanamke wa kwanza kuchaguliwa makamu wa rais wa Marekani," alisema Merkel katika ujumbe wake aliouandika katika ukurasa wake katika mtandao wa kijamii wa twita. 

Deutschland Berlin | Pressekonferenz | Angela Merkel

Angela Merkel, kansela wa Ujerumani

"Wamarekani wamemchagua rais wao. Hongera Joe Biden na Kamala Harris!" aliandika rais wa Ufaransa, Emmanuel Macron, katika ukurasa wake wa twita.

Wakuu wa Umoja wa Ulaya, Charles Michel na Ursula von der Leyen wamepongeza kuchaguliwa kwa Biden kama rais wa Marekani siku ya Jumamosi na kutoa wito wa mahusiano imara zaidi kati ya Marekani na Ulaya. 

"Nampongeza Joe Biden kwa ushindi wake katika uchaguzi wa rais wa Marekani na nina matumaini makubwa ya kukutana naye haraka iwezekanavyo," amesema rais wa halmashauri ya Umoja wa Ulaya, von der Leyen. "Umoja wa Ulaya na Marekani ni marafiki na washirika, wananchi wetu wana mahusiano ya karibu sana," alisema. 

Michel, ambaye ni rais wa baraza la Ulaya anayewawakilisha viongozi wa nchi wanachama wa Umoja wa Ulaya, pia ameandika ujumbe katika ukurasa wake wa mtandao wa kijamii wa twita akimpongeza Biden, lakini kwa uangalifu zaidi.

Ushindi wa Biden umekuja baada ya siku tano mfululizo za uhesabuji wa kura hali iliyoliweka taifa la Marekani katika taharuki huku uchaguzi huo ukimalizika kwa maelfu ya kura katika majimbo kadhaa muhimu yenye ushawishi mkubwa katika kuamua matokeo.

(afp, dpa)

Matangazo

Unaweza kusikiliza matangazo yetu hapa

Kusikiliza matangazo ya Idhaa ya Kiswahili ya DW, tafadhali bonyeza alama ya spika ya masikioni hapo chini, na kuwasiliana nasi, tafadhali tuandikie moja kwa moja kupitia: kiswahili@dw.com