Shqipëria ka përparuar | Gjermania | DW | 08.11.2006
  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

Gjermania

Shqipëria ka përparuar

Raporti i Komisionit të BE-së për vendet e Ballkanit Perëndimor ka rënë këtë radhë nën hijen e debatit rreth fillimit të negociatave me Turqinë. Prandaj edhe reagimet nga Berlini kanë qenë të rezervuara

default

Nga njëra anë raporti konfirmon perspektivën tashmë të pakthyeshme të vendeve të Ballkanit në Evropë, në anën tjetër megjithë vlerësimet e shënuara në të për secilin vend del në pah se përveç Kroacisë, asnjëri nga shtetet në fjalë nuk mund ta parashikojë që tani datën e hyrjes në BE.

Qeveria gjermane pajtohet me raportin e publikuar të mërkurën në Bruksel nga Komisioni Evropian për vendet e Ballkanit Perëndimor. Zëdhënësi i ministrisë së jashtme, Stefan Bredohl, tha të mërkurën në Berlin, se Gjermania e mbështet perspektivën evropiane të këtyre vendve, por ajo "orientohet në disa kushte që duhen plotësuar, e këtë e kanë në dorë vetë shtetet."

Parlamentari socialdemokrat Josip Juratovic, antar i Komisionit të Bundestagut për BE-në, shprehet i kënaqur me vlerësimet pozitive të raportit për Shqipërinë. Për programin shqip të Deutsche Welle-s ai tha: "Është e gëzueshme që Shqipëria ka bërë disa përparime sa i përket demokracisë dhe implementimit të shtetit juridik si dhe në transparencën e veprimtarisë parlamentare."

Presidenti i Nismës Evropiane për Stabilitet, ESI, Gerald Knaus, i ka konfirmuar gjithashtu përparimet e Shqipërisë në një intervistë me DW-në: "Shqipëria tashmë është stabile, ka rritje ekonomike, ka një numër të madh të rinjsh të shkolluar e me përvojë, një pjesë e mirë e të cilëve po kthehen në vendin e tyre, ajo pra po bëhet më evropiane."

Knaus tha më tej se shpreson që Bashkimi Evropian nuk do të orientohet vetëm tek imazhi i keq i Shqipërisë në të kaluarën dhe do të reagojë më objektivisht ndaj përparimeve të Shqipërisë.

E megjithatë, këto nota pozitive nuk mjaftojnë për t'i dhënë Shqipërisë statusin e kandidatit. Turqia atë e ka marrë që në vitin 1999 dhe ende nuk ka filluar me bisedimet, konstaton Knaus i cili vëren se Shqipëria e sotme është ende shumë pas Turqisë së 1999-es. Knaus megjithatë propozon që vendeve të Ballkanti t'u jepet menjëherë statusi i kandidatit, përderisa atyre u është premtuar antarësimi i plotë: "Me mbylljen e kapitullit të Kosovës të gjithë fqinjët që do të sillen në mënyrë konstruktive: Shqipëria, Serbia, Mali i Zi, Bosnja Hercegovina, të marrin si shpërblim statusin e kandidatit."

Josip Juratoviç në këtë pikë është më i rezervuar: Integrimi në Evropë nuk duhet të jetë me detyrim thotë ai: "Ballkani Perëndimor është pesë e rëndësishme e Evropës parë në aspektin gjeopolitik. E aty nuk duhet të ketë vakuum. Por në anën tjetër, vendet nuk dueht të hyjnë vetvetiu në Evropë ato duhet të bëjnë edhe më shumë për të arritur standardet e kërkuara."

  • Data 08.11.2006
  • Autor Anila Shuka
  • Shtypni Shtypeni faqen
  • Permalink https://p.dw.com/p/Aqyo
  • Data 08.11.2006
  • Autor Anila Shuka
  • Shtypni Shtypeni faqen
  • Permalink https://p.dw.com/p/Aqyo