1. Kalo tek përmbajtja
  2. Kalo tek lista qendrore e navigimit
  3. Kalo tek më shumë oferta të DW

Pas tërmetit konferencë ndërkombëtarë në Tiranë në janar

14 Dhjetor 2019

Në janar 2020 zhvillohet në Tiranë konferenca e donatorëve ndërkombëtarë. Ajo organizohet nga Komisioni Europian për të siguruar ndihmë financiare në rikuperimin e dëmeve që shkaktoi tërmeti i fuqishëm i 26 nëntorit.

https://p.dw.com/p/3UnQF
Albanien Thumane | Schäden nach Erdbeben
Fotografi: Getty Images/AFP/G. Shkullaku

Ishte Ambasadori i Delegacionit Europian në Shqipëri, Luigi Soreca, ai që bëri me dije të premten, (13.12.2019) se konferenca e donatorëve ndërkombëtarë do të organizohet nga Komsioni Europian, (KE) për të siguruar ndihmë financiare në rikuperimin e dëmeve që shkaktoi tërmeti i fuqishëm i 26 nëntorit, do të zhvillohet në Tiranë, pas një muaji, në janar 2020.

Në një postim në twitter, Ambasadori Soreca shkruan se "Bashkimi Europian qëndron në solidaritet me Shqipërinë për tërmetin e fundit. Këshilli Europian mirëpret njoftimin e Komisionit Europian për të ofruar ndihmë humanitare dhe për të organizuar një konferencë të donatorëve". Njoftimi për organizimin nga Komisioni Europian i kësaj konference në Tiranë, në janar 2020, erdhi një ditë pas vendimeve që mori Këshilli Europian në takimin e liderëve të BE në Bruksel.

Janez Lenarcic EU Kommissar Besuch Albanien
Rama inspekton dëmet e tërmetit me komisarin e BE për krizat, Janez Lenarcic, 5.12.2029Fotografi: DW/A. Ruci

Tërmeti – mirënjohje ndaj BE, ndryshime në qeveri 

Kryeministri Rama shprehu në një postim në Facebook mirënjohjen e tij për solidaritetin e liderëve të Bashkimit Europian ndaj Shqipërisë. Ai  vlerësoi vendimin për të organizuar konferencën e donatorëve në janar në Tiranë dhe theksoi  se konferenca do të mbështesë programin e rindërtimit të vendit. Këshilli Europian mori vendimin për për zhvilimin e Konferencës Ndërkombëtare të Donatorëve në Tiranë, në janar 2020, pasi Operacioni i Emergjences, i ngritur nga qeveria Rama përfundoi raportin e dëmeve të shkaktuara nga tërmeti

Albanien nach Erdbeben
ThumanaFotografi: DW/Ani Ruci

Komisioni parlamentar i Ekonomisë vendosi të premten të ndryshojë projekt-buxhetin e shtetit për vitin 2020 dhe t'i vërë në dispozicion 20 miliardë lekë "Fondit të Rindërtimit” që do të ngrihet  për përballimin e dëmeve të tërmetit.

Presidenti Meta dekretoi të premten propozimin e kryeministrit Rama për emërimin e Arben Ahmetaj, Ministër Shteti për Rindërtimin. Ahmetaj ka qenë për pesë vjet 2013-2018 Ministër i Financave. Ai u shkarkua në dhjetorin e vitit  të kaluar, si pjesë e ndryshimit  mbi 50% të qeverisë që bëri Rama në kohën e protestave të studentëve. Idenë për një konferencë të donatorëve ndërkombëtarë e dha në fillim të dhjetorit pas samitit të NATO-s në Londër, Presidenti francez, Emmanuel Macron, për të ndihmuar Shqipërinë në rikuperimin e dëmeve nga tërmeti prej 6,4 ballësh i 26 nëntorit. Raporti i Operacionit të Emergjencës ka konstatuar se 13.000 qytetarë kanë humbur banesat, 261 pallate janë të pabanueshme dhe 851 të dëmtuara, 2237 banesa janë të pabanueshme dhe 4618 të dëmtuara,  44 objekte janë hedhur në erë dhe dhjetëra të tjerë ruhen me perimetër sigurie.

 

 

Ani Ruci Korrespondente nga Tirana