Pas sinjaleve nga satelitët amerikanë | Bota | DW | 07.05.2005
  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

Bota

Pas sinjaleve nga satelitët amerikanë

ShBA dhe OKB paralajmërojnë ndaj rrezikut të provave bërthamore nga Koreja e Veriut

Stacion bërthamor në Korenë e Veriut

Stacion bërthamor në Korenë e Veriut

Konflikti mbi programin bërthamor të Koresë së Veriut po përshkallëzohet më tej. Pas sinjaleve të dyshimta nga rregjistrimet satelitore amerikane, ShBA dhe Kombet e Bashkuara e kanë paralajmëruar dje Penjanin të heqë dorë nga kryerja e provave bërthamore.
Ka të ngjarë që Koreja e Veriut së shpejti të shpërthejë një bombë atomike. Asnjëherë më parë nuk ka patur sinjale kaq shqetësuese sa tani për një provë mundshme bërthamore. Fotot e marra nga satelitët spiunë amerikanë tregojnë se si në malet e Giljut në verilindje të vendit është hapur një tunel i madh i cili është mbyllur përsëri. Tuneli duket se i ngjan një zone në të cilën në Pakistan shtatë vjet më parë u ndezën lëndë shpërthyese bërthamore. Ish shefi i programit bërthamor pakistanez e pat vizituar disa herë Korenë e Veriut gjatë viteve '90 dhe i kish shitur teknologji bërthamore regjimit të Penjanit. Në një largësi të përshtatshme nga tuneli satelitët spiunë kanë zbuluar një tribunë të pajisur mirë e cila mendohet se do të shërbente për spektatorë të rrangjeve të larta. Një tribunë e ngjashme ishte ndërtuar për lëshimin e raketave në përvjetorin e 50-të të themelimit të shtetit.

Sipas të dhënave të zyrtarëve amerikanë fotot duhen interpretuar megjithatë me kujdes. Ka të ngjarë që Koreja e Veriut të simulojë kryerjen e provave bërthamore për të shtyrë ShBA të shpërblejnë Penjanin për pezullimin e programit bërthamor. Për këtë interpretim flet fakti që Koreja e Veriut normalisht i fsheh pasjisjet dhe aktivitetet e saj ushtarake nën tokë. Vendi i presupozuar i provave mund të jetë pra thjesht një skenë teatri për kamerat e zbulimit nga qielli.

Megjithatë si ShBA ashtu dhe Kombet e Bashkuara në kuadër të konferencës për çështjet atomike në Nju Jork e kanë paralajmëruar shprehimisht shtetin e vogël në Lindjen e Largët të heqë dorë nga të tilla prova. Ato do të konsideroheshin "një akt i ri provokimi" ka deklaruar Skot Mekklelan zëdhënësi i presidentit amerikan Xhorxh Bush. Organizata Ndërkombëtare për Energjinë Bërthamore në Vjenë foli për një "sinjal shumë të gabuar". Uashingtoni ka informuar hollësisht mbi përgatitjet për prova të mundshme atomike aleatët e tij në rajon, Korenë e Jugut dhe Japoninë. Edhe ato duhet të përgatiten për pasojat politike të provave të tilla. Këtë temë presidenti Bush e ka trajtuar edhe gjatë një bisede të gjatë telefonike me presidentin e Kinës Hu Xhintao.

Koreja e Veriut deri tani nuk është shprehur zyrtarisht rreth akuzave për përgatitjen e provave bërthamore. Spekullimet ndërkombëtare mund të jenë ndoshta të mirëpritura nga rregjimi kërcënimet e deritanishme të të cilit nuk janë marrë seriozisht. Diktatura ushtarake në Penjan e pati shpallur zyrtarisht veten fuqi bërthamore në muajin shkurt.

Klima politike megjithatë është bërë edhe më e akullt. Spekullohet se ShBA do të presin deri në fund të majit rikthimin e Koresë së Veriut në negociatat e gjashtë shteteve për çështjet bërthamore. Nëse kjo nuk do të ndodhë do të thirret Këshilli i Sigurimit. Kjo u bë e ditur dje nga ministri i jashtëm i Japonisë Nobutaka Makimura. Koreja e Veriut e ka cilësuar paraprakisht një hap të tillë si shpallje lufte.

  • Data 07.05.2005
  • Autor Martin Fritz
  • Shtypni Shtypeni faqen
  • Permalink https://p.dw.com/p/ArPR
  • Data 07.05.2005
  • Autor Martin Fritz
  • Shtypni Shtypeni faqen
  • Permalink https://p.dw.com/p/ArPR
Reklamë