OSBE organizon zgjedhjet serbe në Kosovë
1 Maj 2012OSBE konfirmoi rolin e saj lehtësues në organizimin e zgjedhjeve parlamentare dhe presidenciale të Serbisë në Kosovë. Lajmi u bë i ditur nga vetë OSBE, të hënën në mbremje (30.04), përmes një komunikate për media, ku thuhet se kryesuesi i OSBE-së, Imon Gilmor e ka mirëpritur këtë marrëveshje, ndërsa ka sqaruar se ai vetë ka qenë në kontakt me palët e përfshira.
OSBE me rolin e lehtësuesit për zgjedhjet e Serbisë në Kosovë
“Mirëpres marrëveshjen që është arritur të hënën sa i përket rolit lehtësues të misionit të OSBE-së në Kosovë për organizimin e zgjedhjeve parlamentare dhe presidenciale të Serbisë në Kosovë”, thuhet në njoftimin e OSBE-së, mirëpo nuk specifikohen detajet. Duke cituar njoftimin e OSBE-së, Imon Gilmor, më tej thotë:
"Në ditët e fundit, unë kam qenë në kontakt të vazhdueshëm me palët e përfshira, së bashku me sekretarin e përgjithshëm të OSBE-së, Lamberto Zanieri, për t'i inkurajuar ata që të ndërmarrin një qasje pozitive”. Edhe Lamberto Zanieri, sipas njoftimit të OSBE-së, tha se tashmë, kjo organizatë ka nisur përgatitjet për organizimin e qendrave të votimit për t'iu mundësuar votuesve serbë në Kosovë që të ushtrojnë të drejtën e tyre për të votuar në këto zgjedhje.
Qeveria e Kosovës përshendet vendimin e OSBE-së
Vendimin e OSBE-së për të lehtësuar votimin për qytetarët serbë të Kosovës me shtetësi të dyfishtë në zgjedhjet presidenciale dhe parlamentare të Serbisë, e përshëndeti edhe qeveria e Kosovës, nëpërmjet një njoftimi të shkruar. Sipas qeverisë, ky vendim i OSBE-së është i bazuar në parimet dhe vlerat evropiane dhe në harmoni me Dokumentin Gjithëpërfshirës të Presidentit Ahtisaari, Kushtetutën dhe ligjet e Republikës së Kosovës.
"Gjatë ditës së 6 majit do të hapen qendra mobile votimi, do të ketë vetëm simbole të OSBE-së, ndërsa numërimi do të bëhet jashtë territorit të shtetit të Kosovës, në mungesë aktuale të Ambasadës së Serbisë në Republikën e Kosovës dhe anasjelltas. Vendimi i OSBE-së reflekton qëndrimet dhe parimet e panegociueshme dhe vijat e kuqe të Republikës së Kosovës për këtë çështje. Qeveria e Republikës së Kosovës vlerëson se ky është një hap i madh për shtetin e Kosovës, sepse për herë të parë Serbia është pajtuar që të mos organizojë asnjë lloj zgjedhje në Kosovës, në 13 vitet pas përfundimit të luftës", thuhet në njoftimin e qeverisë së Kosovës.
"OSBE-ja po e ndërmerr një veprim të tillë me kërkesën e Qeverisë së Republikës së Kosovës për të mundësuar votimin e qytetarëve të Republikës së Kosovës, që i takojnë komunitetit serb dhe kanë dyshtetësi, në zgjedhjet parlamentare dhe presidenciale të Serbisë, ashtu siç e përcakton Kushtetuta e Republikës së Kosovës", thuhet më tej në këtë deklaratë.
Diplomatët perendimorë përshëndesin vendimin e OSBE-së
Edhe përfaqësuesit në Kosovë të vendeve më të industrializuara, SHBA-së, Francës, Gjermanisë, Italisë dhe Mbretërisë së Bashkuar, e mirëpritën marrëveshjen e arritur nga OSBE-ja për lehtësimin e pjesëmarrjes së serbëve të Kosovës në zgjedhjet parlamentare dhe presidenciale të Serbisë me 6 maj. Në një komunikatë në emër të vendeve të QUINT-it, thuhet:
“Qeveritë e Kosovës dhe Serbisë duhet të përgëzohen për gatishmërinë e tyre për t'ua siguruar votuesve me të drejtë vote mundësinë për të ushtruar të drejtat e tyre demokratike. Ne i jemi mirënjohës OSBE-së për gatishmërinë e saj për të ndërmarrë këtë detyrë sfiduese në afat të shkurtër dhe i ofrojmë mbështetjen e plotë ekipit të misionit të OSBE-së në Kosovë”. Ata u bëjnë thirrje të gjithë qytetarët që të ndihmojnë për të ruajtur një mjedis të qetë dhe paqësor ashtu që OSBE-ja të mund të kryejë punë.
Autoritetet e Prishtinës janë pajtuar që serbët e Kosovës të mund të votojnë për zgjedhjet parlamenttare dhe presidenciale të Serbisë bazuar në parimin e dy shtetësisë. Por, Prishtina, zyrtare është kategorike kundër organizimit të zgjedhjeve lokale të Serbisë edhe në Kosovë. Ministria e punëve të brendshme tashmë ka hartuar një plan për të penguar çdo përpjekje për mbajtjen e këtyre zgjedhjeve.
Autor: Bekim Shehu
Redaktoi: Mimoza Kelmendi