Maqedonia: Nga shembull në vend problematik
Luftimet e përgjakshme në Kumanovë e godasin Maqedoninë në kohën e një krize të rëndë. Qeveria dhe opozita qëndrojnë ballazi të papajtuara në këtë situatë, kësaj i shtohen edhe tensionet etnike.
Si pas lufte
Pas konfliktit të përgjakshëm në Kumanovë të Maqedonisë pamja që u ofrua në fundjavë (09. 5 - 10.05) ishte - thjesht shkatërrimi. Shumë shtëpi janë dëmtuar rëndë. Vërtet që banorët e evakuuar janë kthyer, por në shumë lagje është ndërprerë rryma elektrike.
Bilanc i përgjakshëm
Një grup me më shumë se 30 të armatosur ushtroi dhunë ndaj policëve, sipas të dhënave të autoriteteve. 8 policë u vranë dhe 14 pjesëtarë të dyshuar për sulme - së paku 20 vetë u arrestuan. Policia është tërhequr nga Kumanova dhe qeveria i shpalli dy ditë si ditë zie.
Sulm me granatahedhës
Konflikti shpërtheu të shtunën në mëngjes (09.05) me një kontroll të policisë në një lagje të banuar kryesisht me shqiptarë. Policia njoftoi se u godit nga snajperë dhe u sulmua me granata dhe armë automatike. Sulmuesit kishin përkrahës në Kumanovë, sipas policisë maqedonase.
Tensione etnike
Prej kohësh ekzistojnë tensionet mes shqiptarëve dhe maqedonasve, ndërkohë që në prill pati një incident: Rreth 40 shqiptarë nga Kosova sulmuan një rajon të policisë. Ata kërkonin themelimin e shtetit shqiptar. Dhuna e fundjavës në Kumanovë kërcënon të rrisë më tej tensionet në vend.
Kriza politike
Maqedonia ndodhet në një krizë të rëndë politike. Kryeministri Nikola Gruevski është vendosur me shpatulla pas muri për shkak të skandalit të përgjimeve. Opozita kërkon të provojë me publikimin e përgjimeve, korrupsionin dhe keqpërdorimin masiv të pushtetit. Qeveria duket se ka përgjuar ilegalisht më shumë se 20.000 vetë.
Kush fshihet pas dhunës?
Kreu i qeverisë Gruevski i ka hedhur benzinë këtij konflikti për të tërhequr vëmendjen nga gjendja e vështirë ku ndodhet, mendojnë shumë opozitarë, gazetarë dhe përfaqësues nga shoqëria civile. Qeveria nga ana e saj bën përgjegjës për luftimet në Kumanovë "terroristë" nga Kosova.
Demonstrata kundër qeverisë
Edhe brenda popullsisë maqedonase janë shtuar protestat kundër qeverisë: Javët e shkuara ka pasur demonstrata kundër Gruevskit në shumë qytete të vendit - si këtu në Shkup më 05.05.2015. Policia i shpërndau protestat duke përdorur dhunën.
Demonstrata të reja
Të dielën (17.05.2015) opozita ka bërë thirrje për një demonstratë masive kundër qeverisë. Pritet që pas dhunës në Kumanovë aty të marrin pjesë edhe shumë shqiptarë. Vëzhguesit i druhen një destabilizimi të mëtejshëm të Maqedonisë - madje edhe një lufte civile.
Konflikti i emrit me Greqinë
Të gjitha këto kur Maqedonia konsiderohej si një vend shembullor në Ballkan. Por bisedimet e anëtarësimit me BE-në pengohen gjithmonë nga Greqia. Arsyeja: Konflikti i emrit. Greqia kërkon që Maqedonia të ndryshojë emrin e saj për shkak të krahinës me të njëjtin emër në Greqi: Emri Maqedoni është i lidhur me Aleksandrin e Madh dhe historinë greke.