„Nuk jemi burka“

„Dua që me disa teza të ftoj për një debat për kulturën orientuese në Gjermani”, shkruan Thomas de Maizière në një artikull, si i ftuar nga gazeta "Bild am Sonntag". De Maizière rendit dhjetë pika, që sipas tij janë pjesë e kulturës orientuese gjermane, si për shembull disa zakone shoqërore: Në Gjermani jepet dora për t'u përshëndetur, tregohet fytyra dhe përmendet emri. „Ne nuk jemi burka", thekson politikani i CDU-së.

Tek kultura orientuese gjermane bën pjesë edhe shkollimi i përgjithshëm, vullneti për të arritur diçka në jetë, trashëgimia e historisë gjermane, me marrëdhënien e veçantë me Izraelin, dhe pasuria kulturore. Kush është i sigurtë për kulturën e tij, ndjehet i fortë, thotë ministri. Por mbi të gjitha qëndron respektimi i dinjitetit njerëzor.

Feja „si stuko e shoqërisë"

„Vendi ynë është i përcaktuar nga krishtërimi. Ne jetojmë në një paqe fetare. Baza për këtë është kushti i patjetërsueshëm i ligjit mbi të gjitha rregullat fetare në bashkëjetesën shtetërore dhe shoqërore”, shkruan ministri gjerman.

Feja është në vendin tonë "stuko e shoqërisë”, thotë de Maizière, vetë protestant besimtar. Për këtë „angazhohen në shoqëri në mënyrë të palodhshe kishat.”

Politikani kristiandemokrat shikon edhe „një patriotizëm të emancipuar" si pjesë e kulturës orientuese gjermane. Një patriot i tillë e do vendin e tij, pa urryer të tjerët. Edhe orientimi perëndimor i Gjermanisë, lidhja me Europën dhe një kujtesa e përbashkët kolektive për ngjarje, histori e tradita janë pjesë e kulturës orientuese gjermane. Ministri i Brendshëm gjerman nuk i pranoi kritikat ndaj konceptit të kulturës orientuese. Fuqia dhe siguria e brendshme në kulturën tënde të bën tolerant ndaj të tjerëve, shkruan ai.

"Dora e zgjatur"

Të gjithë atyre që vijnë në këtë vend dhe u lejohet të qëndrojnë „ne u zgjasim dorën", siguron ministri i Brendshëm. Por kush nuk e njeh këtë kulturë orientuese, nuk do ta njohë, ose madje e refuzon atë, ai „ka pak shanse për integrimin. Sepse ata nuk do të ndjehen pjesë e kësaj shoqërie, pa njohur dhe pa respektuar kulturën tonë orientuese."