Trumpi e Netanjahu flasin ndryshe për fundin e luftës

Sipas  Presidentit të SHBA-së Donald Trump , ai nuk pret që lufta kundër Iranit të zgjasë shumë më gjatë. Ai i tha CBS se Irani nuk ka më marinë, sisteme komunikimi apo forcë ajrore. Raketat e tij janë shkatërruar pothuajse plotësisht, dhe dronët dhe fabrikat janë eliminuar.

Megjithatë, Trump-i vazhdoi duke thënë se ishte ende shumë herët për të pritur që luftimet të përfundonin këtë javë. Ata po ecin përpara me më shumë vendosmëri se kurrë për t'i dhënë fund kërcënimit të gjatë një herë e përgjithmonë. Pas fillimit të sulmeve të përbashkëta izraelito-amerikane në fund të shkurtit, Trump-i kishte parashikuar se lufta do të zgjaste katër deri në pesë javë.

Menjëherë pas parashikimit të rishikuar të Trump-it, çmimet e naftës ranë ndjeshëm. Çmimi i naftës së papërpunuar Brent ra në rreth 89 dollarë për fuçi. Deri të hënën në mbrëmje, ajo ende tregtohej pranë 120 dollarëve.

Sipas Fox News, Trump-i më vonë deklaroi në një intervistë se mund të ishte i gatshëm të fliste me Iranin, por se kjo do të varej nga kushtet. I pyetur për mundësinë e negociatave me Teheranin në një intervistë të hënën në mbrëmje, Trump i tha Fox News se kishte dëgjuar se Teherani ishte shumë i interesuar të zhvillonte bisedime, sipas kanalit të lajmeve.

Garda e Revolucionit me qëndrim luftarak

Në një reagim fillestar, Garda e Revolucionit e Iranit deklaroi se njoftimi i njëanshëm i Trump-it për një përfundim të afërt të luftimeve nuk kishte kuptim: "Ne jemi ata që do të përcaktojmë se kur do të përfundojë kjo luftë." Garda njoftoi gjithashtu se do të bllokonte eksportet e naftës përmes Ngushticës së Hormuzit deri në fund të luftës.

"Forcat e armatosura iraniane nuk do të lejojnë që asnjë litër naftë nga rajoni të eksportohet te armiku dhe partnerët e tij deri në njoftim të mëtejshëm", deklaroi një zëdhënës i Gardës së Revolionit. Ngushtica midis Iranit dhe Gadishullit Arabik është thelbësore për eksportet e naftës të shteteve të Gjirit.

Kryeministri izraelit Netanjahu kundërshton Trumpin

Pas dhjetë ditësh lufte kundër Iranit, kanë dalë në pah qasje të ndryshme midis Presidentit të SHBA-së Donald Trump dhe  Kryeministrit izraelit Benjamin Netanjahu.  Ndërsa Trump-i e sheh fundin e luftës kundër Iranit si të afërt - dhe gjithashtu lë të kuptohet gatishmërinë e tij për të negociuar - Netanjau theksoi se Izraeli "nuk ka mbaruar" me sulmet e tij kundër udhëheqjes iraniane.

"Qëllimi ynë është që populli iranian të heqë dorë nga zgjedha e tiranisë", tha Netanjahu. Nuk ka dyshim se "po ua thyejmë kockat me masat që kemi marrë deri tani, dhe ende nuk kemi mbaruar", shtoi Netanjahu, duke iu referuar udhëheqësve në Teheran.

Në Uashington, kjo u interpretua si një shenjë e dallimeve në rritje të opinioneve midis Shteteve të Bashkuara dhe Izraelit në lidhje me strategjinë e luftës dhe kohëzgjatjen e konfliktit.

Sulme nga të gjitha anët

Ndërkohë, luftimet vazhdojnë. Irani nisi sulme të reja kundër Izraelit dhe shteteve arabe të Gjirit. Sirenat paralajmëruan për raketa që po afroheshin në qendrën financiare të Dubait. Në Bahrein, autoritetet njoftuan se një sulm iranian kishte goditur një ndërtesë banimi në kryeqytet. Një grua 29-vjeçare u vra dhe tetë të tjerë u plagosën. Arabia Saudite njoftoi se kishte shkatërruar dy dronë mbi rajonin e saj lindor të pasur me naftë. Sirena u dëgjuan edhe në Jeruzalem këtë mëngjes.

Sipas autoriteteve lokale, 1.200 persona kanë vdekur në Iran që nga fillimi i luftës. Përveç kësaj, më shumë se 10.000 vetë janë plagosur.  Në Izrael, ekipet e shpëtimit dhe ushtria e kanë deklaruar  numrin e të vdekurve në 13 që nga fillimi i luftës. Sipas Ministrisë së Shëndetësisë, gati 500 persona kanë vdekur në Liban si rezultat i përshkallëzimit të ri të konfliktit midis Izraelit dhe milicisë Hezbollah të mbështetur nga Irani.

(Palët ndërluftuese si burim: në situatën aktuale, informacioni nga palët ndërluftuese ose vëzhguesit e luftës nuk mund të verifikohet drejtpërdrejt nga një organ i pavarur)

 

(dlf/tgsch)