ترمپ: ایران مذاکره کوي ځکه نه غواړي ورباندې برید وکړو
۱۴۰۴ بهمن ۱۷, جمعه
ترمپ دا څرگندونې په واشنگټن کې د ملي دعا د ناشتې کولو په مراسمو کې په خپله وینا کې وکړې او ویې ویل: «موږ یوه لویه کښتۍ د ایران پر لور استولې ده.»
له بلې خوا د ایران د بهرنیو چارو د وزیر ویاند، اسماعیل بقايی د ایکس پر ټولنیزه شبکې لیکلي چې د بهرنیو وزیر عباس عراقچي، په مشرۍ یو هیئت د عمان پلازمینې ته رسیدلی دی.
اړونده موضوع: د ایران او امریکا خبري به د جمعې په ورځ په عمان کي ترسره سي
په پام کې ده چې د ایران او امریکا ترمنځ خبرې اتري نن د جمعې په ورځ (۲۰۲۶ م کال د فبرورۍ ۶) په مسقط کې ترسره سي.
بقايی لیکلي دي چې دغه ډیپلوماټیک تعامل، د اټومي موضوع په اړه یوه عادلانه او شرافتمندانه تفاهم ته د رسیدو په هدف ترسره کیږي.
امریکايی سرچینو هم اعلان کړی دی چې د امریکا د ولسمشر زوم جرد کوشنر، او د دونالد ترمپ ځانگړی استازی ستیو ویتکوف، له قطري چارواکو سره د خبرو اترو له پاره د دغه هیواد پایتخت دوحې ته رسیدلي دي.
اړونده موضوع: د ايران او امريکا متقابل ګواښونه؛ ترمپ پر پوځي اقدام فکر کوي؟
د هغوی سفر په عمان کې د امریکا او ایران ترمنځ خبرو اترو مخکې ترسره سوی دی.
لاهم د خبرو اترو د چوکاټ او محتوا په اړه ډېرې ناڅرگندتیاوې موجودې دي. ایران غواړي یوازي د اتومي موضوع په اړه او د عربي هیوادونو د استازو له موجودیت پرته خبري اتري وکړي، خو امریکايي چارواکي، په شمول د امریکا د بهرنیو چارو وزیر مارکو روبیو، وايي چې د امریکا او ایران ترمنځ په «معنی لرونکو» خبرو اترو کې باید «د ایران د بالستیک توغندیو ساحه، په ټوله سیمه کې د ترهګرو سازمانونو ملاتړ، د هغه اټومي پروګرام او له خپلو خلکو سره د حکومت د چلند څرنګوالی» شامل وي.