القاعده پر امريکايي الوتکه باندي د ناکامه بريد مسؤليت منلی دی | دويچه ويله پښتو | DW | 29.12.2009
  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

دويچه ويله پښتو

القاعده پر امريکايي الوتکه باندي د ناکامه بريد مسؤليت منلی دی

له امستردام څخه د دېترويت Detroitپه لور په 253 لمبر الوتني باندي تر ناکامه بريد درې ورځي وروسته ،اوس اوباما خپله خاموشي بس کړې ده

دامريکا په هوايي ميدان کښي تر ناکامه بريد وروسته 253 لمبر طياره

دامريکا په هوايي ميدان کښي تر ناکامه بريد وروسته 253 لمبر طياره

په هاوای کې د رخصتيو په ځای کې دهء هڅه وکړه قاطعيت څرگند کړي، چې دا د داخلي امنيت د وزيرې جانېت ناپوليتانو په پرتله چې زړه نا زړه معلومېدله، ډېر توپير لري . دغې وزيرې په اول سر کې د شنډ شوي بمي بريد په اړه ويلي وه، چې هر څه په صحيح ډول تر سره شوي وو، خو بيا مجبوره شوه چې خپلي خبري بېرته واخلي . ولسمشر اوباما په خپل وار د23کلن نايجريايي فاروق عبدالمطلب د پردې تر شا ولاړو مشکوکو هڅونکو ته گواښ وکړاو ويې ويل :

«موږ به تر هغو آرام کښېننو تر څو مو ټول هغه کسان نه وي نيولي چې په هغه کې لاس لري او تر څو چې هغوی مسووليت نه وي منلی . ما يوه بشپړه څېړنه غوښتې ده، نه يوازي په دې اړه چې د مشکوکو بريدکونکو په اړه معلومات څنگه استعمال شوي دي، بلکه د لستونو د سيستم په اړه هم، او دا چې څنگه پکښې ښه والی راتلی شي . »

د امريکا په متحده آيالتونو کې څلور ډوله لستونه جوړ شوي دي . په لومړي درجه لست کي د عبدالمطلب نوم هم راغلی و، خو پنځه سوه زره نور نومونه هم پکښې ليکل شوي دي . په دغه ليست کې د مشکوک بريدکونکي نوم هغه وخت وليکل شو چې پلار يې ښايي د امريکې د يو سفارت په وړاندي د خپل زوی د افراطي کېدلو په اړه اخطار ورکړی وي .

«د يوې بلې څېړنې د لارې به په هوايي ډگرونو کې امنيتي تدابير هم وڅېړل شي، مخکې تر دې چې مسافرين الوتکو ته ورخېژي .»

د اوباما له څرگندونو څخه لږ دمخه د القاعده ترهگر سازمان په نوموړې امريکايي الوتکه باندي چې 289 انسانان پکښې سپاره وه، د بريد پړه منلې وه . ويل کيږي چې په يمن کې د القاعدې پرجنگياليو باندي د دوو بريدونو په بدل کې نوموړي ډلي دغه هڅه کړې ده .

دغه معلومات د اينتل سنتر لخوا خپاره شوي دي چې په انترنېټ کې د ترهرگرو ډلو پيغامونه څېړي . يمني عسکرو، د امريکې د استخباراتو په ملاتړ په دسامبر کې د القاعده پر احتمالي مېشتغالو باندي هوايي بريدونه تر سره کړي وو. وروستۍ حمله د کريسمس له شپې څخه يوه ورځ دمخه تر سره شوې وه .

دا مهال د امريکا په متحده آيالتونو کې د بريدونو د مخنيوي او د تېروتنو د سياسي مسؤليت په اړه بحثونه شروع شوي دي . سناتور جو ليبرمن چې په کوم سياسي گوند پوري اړه نه لري او د سنا د داخلي امنيت د پلاوي مشر دی، په دې اړه يوه مرکه ورکړه چې د اورگاډي په تمځای کې ورسره شوې وه :

«ولي د ټول بدن سکنرونه نه استعمالوو. هغه د معمولو فلز کشف کونکو په مقايسه بل ډول فعاليت کوي . دغه سکنرونه د ټول بدن شکل راته ښېي او هر هغه څه هم راپه گوته کيږي چې سړی يې له ځان سره گرځوي، لکه د مثال په ډول چاودېدونکي مواد .»

د امريکاد داخلي امنيت ادارې اوس مهال د مسافرينو په مقابل کي شرايط بېرته لږ کړي او نرم کړي دي . مسافرين بايد نور د الوتني په وروستيو شپېتو دقيقو کې پر خپل ځای پاته نسي او کمپلي او بالښتونه هم بېرته پر خپلو پښو او غېږ اچولی شي . دغسي شرايط ورباندي تر بريدونو لږه موده وروسته لگول شوي وه. خو د الوتکې کارکونکي دغه شرايط تر اوسه لا پر هر چا باندي تطبيقولی شي، البته که هغوی ته لازم ښکاره شي .

پاولِرت/ نسيم صابر

کتونکی : محمد قاسم نوري

اړوند مطالب