Trump na ziyarar aiki a kasar Birtaniya | Labarai | DW | 03.06.2019
  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

Labarai

Trump na ziyarar aiki a kasar Birtaniya

Shugaba Donald Trump ya isa kasar Birtaniya a ziyarar aiki na kwanaki uku da ya fara a nahiyar Turai. Trump da iyalinsa sun sami tarba ta musanman daga Sarauniya Elizabeth a fadarta ta Buckingham.

Ana ganin tsokacin Shugaba Trump gabannin isowarsa Birtaniya kan dambarwar Brexit zai tada kura a ziyarar, bayan da ya ce tsohon ministan harkokin wajen Birtaniyar Boris Johnson zai zama kyakkyawar zabi da zai maye Firaminista Therasa May. Shugaban na Amirka ya shawarci wanda ake sa rana zai zama Firaminista na gaba da ya fice daga EU ba tare da cimma yarjejeniya ba, kuma ya ki biyan EU kudin rabuwa.

Matakin na Trump na shan suka daga 'yan adawa inda magajin garin Landan Sadiq Khan ya kwatanta kalaman Trump da mara kan gado. Ana sa ran cewa dimbin masu zanga-zangar yin tir da Trump kan rashin mutunta yarjejeniyar kare muahalli za su fantsama kan tituna yayin ziyarar ta Trump.