1. Tsallake zuwa shafin jadawali
  2. Tsallake zuwa jadawalin abubuwan da shiri ya kunsa
  3. Tsallake zuwa karin wasu shafukan DW
Mayar da hankali
Ilimin Fasahar Zamani
Shirye-shiryen DW HausaBidiyo
Talabijin kai tsaye
SiyasaAfirka

NNPCL ya fara dakon mai daga matatar Dangote

Binta Aliyu Zurmi
September 15, 2024

Matatar mai ta Dangote a Najeriya ta fara lodin man fetur ga motocin kamfanin mai na kasa NNPCL. Matatar mai ta Dangote ta wallafa wani bidiyo da ke nuna jerin motocin kamfanin NNPCL a harabar matatar.

https://p.dw.com/p/4keFr
Nigeria Tankstelle in Abuja
Hoto: AFOLABI SOTUNDE/REUTERS

Wannan shi ne karon farko da kamfanin na NNPCL ke daukar mai daga matatar ta Dangote, bayan daukar lokaci ana kokarin cimma matsaya a kan batun cinikin danyen mai.

Motocin dakon mai kusan 500 ne rahotanni suka tabbatar sun yi jerin gwano a harabar matatar, suna jiran daukar man fetur din ya zuwa kasuwa a Najeriya.

Daga ranar 1 ga watan Oktoba mahukunta a Najeriya sun ce kamfanin NNPCL zai fara bayar da gangar danyen mai 385 a duk rana domin tace shi daga matatar ta Dangote.

Ana fatan wannan matakin ya kawo karshen matsalar karancin mai da ma tsadarsa a Najeriya, kasar da ke da dimbin arzikin man fetur amma tun bayan janye tallafi mai da Shugaba Bola Ahmed Tinubu ya yi ya saka al'ummar kasar cikin wani mawuyacin hali.