Najeriya za ta shiga matsala saboda dogaro kan mai

Masanan na cewa hakan ya sanya kasar da ta fi dukiya a Afirka gamuwa da barazanar da ba ta taba gani ba saboda dogaron da ta yi kacokan a kan albarkatun man.

Koda yake hajar na iya farfadowa zuwa wani matsayi na farashi a kan kowace gangar danyen man a kasuwannin duniya, har yanzu da sauran aiki gaban Najeriyar ganin kusan kashi 90% na kudaden shiganta daga man ta dogara.

Ita ma ministar kudin kasar, Zainab Ahmed, ta fada a makon jiya cewar annobar COVID-19 da kuma faduwar darajar makamashin, sun taba Najeriyar matuka.

Najeriyar dai ta yi kasafin kudinta na bana ne a kan mizanin farashin man dala 57 a kan kowace ganga guda.