پاکستان: ’بورڈ آف پیس‘ میں شمولیت پر اپوزیشن جماعتیں برہم

پاکستان کی اپوزیشن جماعتوں نے حکومت کے اس فیصلے پر شدید تنقید کی کہ اس نے پارلیمنٹ کی منظوری کے بغیر امریکی صدر ڈونلڈ ٹرمپ کے 'بورڈ آف پیس‘ میں شرکت کا اعلان کیا، اور مطالبہ کیا کہ مکمل مشاورتی عمل کے بغیر کسی بھی رسمی شمولیت کو واپس لیا جائے۔

شہباز شریف حکومت نے ایک دن قبل غزہ امن منصوبے کے نفاذ میں معاونت کے لیے قائم کیے گئے نئے بین الاقوامی فورم، ٹرمپ کے 'بورڈ آف پیس‘ میں شامل ہونے کی دعوت قبول کی تھی۔

پاکستان کے دفترِ خارجہ نے بورڈ آف پیس کی تشکیل یا اس کے عملی طریقۂ کار کی تفصیلات فراہم نہیں کیں، تاہم پاکستان کے سرکاری خبر رساں ادارے اے پی پی اور دیگر میڈیا اداروں کے مطابق حکام کا کہنا ہے کہ اس فورم سے جنگ بندی کے انتظامات، انسانی امداد اور جنگ کے بعد تعمیرِ نو میں سہولت فراہم کرنے، اور اقوامِ متحدہ کی سرپرستی میں وسیع تر سیاسی عمل کی حمایت کی توقع کی جا رہی ہے۔

اپوزیشن سخت ناراض

جمعیت علمائے اسلام (ف) کے سربراہ مولانا فضل الرحمان نے پاکستان کی خارجہ پالیسی پر سوال اٹھاتے ہوئے کہا کہ ملک میں پالیسیاں بیرونی دباؤ کے تحت تشکیل دی جارہی ہیں اور پاکستان نے کبھی اپنی خارجہ پالیسی قومی مفادات کی بنیاد پر مرتب نہیں کی۔

انہوں نے حکومت پر اہم فیصلوں پر قومی اسمبلی کو اعتماد میں نہ لینے پر بھی تنقید کی اور سوال اٹھایا کہ کیا ایوان سے کوئی مشاورت کی گئی تھی۔

قومی اسمبلی سے خطاب کرتے ہوئے مولانا فضل الرحمان نے کہا کہ پاکستان کو کسی صورت بھی ایسے امریکی قیادت والے 'بورڈ آف پیس‘ کو قبول نہیں کرنا چاہیے جس میں نیتن یاہو شامل ہوں۔

انہوں نے'بورڈ آف پیس‘ کے قیام پر سوال اٹھاتے ہوئے کہا کہ ٹرمپ اپنی مرضی سے 'بورڈ آف پیس‘ تشکیل دے رہے ہیں، خود ہی اس کی رکنیت طے کر رہے ہیں اور خود ہی اس کے چیئرمین ہیں۔ ''اگر ہم پھر بھی امن، معاشی استحکام اور فلسطینیوں کے بہتر مستقبل کی امیدیں ایسے بورڈ سے وابستہ کریں تو یہ خود کو دھوکا دینے کے مترادف ہو گا۔‘‘

'جلد بازی میں شرکت نہ صرف نامناسب بلکہ ناقابلِ فہم‘ 

پاکستان تحریکِ انصاف (پی ٹی آئی) نے بھی حکومت کے 'بورڈ آف پیس‘ میں شامل ہونے کے فیصلے کو مسترد کردیا۔

ایکس پر جاری بیان میں پارٹی نے کہا کہ وہ اس فیصلے کو قبول نہیں کرتی اور زور دیا کہ ''اس نوعیت کے بین الاقوامی فیصلے ہمیشہ مکمل شفافیت اور تمام بڑی سیاسی جماعتوں سے جامع مشاورت کے ساتھ کیے جانے چاہئیں۔‘‘

فیصلے پر نظرِ ثانی کا مطالبہ کرتے ہوئے پی ٹی آئی نے حکومت سے کہا کہ وہ جامع مشاورتی عمل مکمل ہونے تک اس اقدام سے دستبردار ہو جائے۔

پی ٹی آئی کے سینیٹر علی ظفر نے بھی کہا کہ حکومت کی 'جلد بازی میں شرکت‘ نہ صرف 'نامناسب بلکہ ناقابلِ فہم‘ ہے۔

حکومت نے اپنے فیصلے کا دفاع کیا

وزیرِ امورِ پارلیمانی ڈاکٹر طارق فضل چوہدری نے پاکستان کے 'بورڈ آف پیس‘ میں شامل ہونے کے فیصلے کا دفاع کرتے ہوئے کہا کہ یہ اقدام سیاسی مصلحتوں کے بجائے قومی مفاد اور عالمی مسلم برادری کی اجتماعی ترجیحات کے تحت اٹھایا گیا ہے۔

انہوں نے مزید کہا کہ یہ فیصلہ فلسطینی عوام کے مفاد میں کیا گیا ہے اور مسئلۂ فلسطین پر پاکستان کے دیرینہ اصولی مؤقف کی توثیق کرتا ہے۔

انہوں نے کہا،''بورڈ آف پیس میں پاکستان کی شرکت کا مقصد ان کوششوں کی حمایت کرنا ہے جبکہ فلسطینی اور قومی مفادات دونوں کا تحفظ یقینی بنانا ہے۔‘‘ انہوں نے اس معاملے سے سیاسی فائدہ نہ اٹھانے کی بھی اپیل کی۔

’بورڈ آف پیس‘: اقوام متحدہ کے لیے چیلنج؟

خیال رہے کہ امریکی صدر ڈونلڈ ٹرمپ نے جمعرات کے روز باضابطہ طور پر ایک نئے بین الاقوامی ادارے، 'بورڈ آف پیس‘کا آغاز کر دیا ہے۔ انہوں نے ممالک کے ایک متنوع گروپ کے ساتھ مل کر اس کے اولین منشور پر دستخط کیے۔ حالانکہ ناقدین اس ادارے کو اقوام متحدہ کے لیے ایک چیلنج کے طور پر دیکھ رہے ہیں۔

سوئٹزرلینڈ کے شہر داووس میں ورلڈ اکنامک فورم کے اسٹیج پر بورڈ کی بنیادی دستاویز پر دستخط کرنے کے بعد ٹرمپ نے اعلان کیا، ''ہم دنیا میں امن قائم کرنے جا رہے ہیں۔‘‘ انہوں نے مزید کہا، ''اس بورڈ کے پاس اب تک کا سب سے اہم اور بااثر ادارہ بننے کا موقع موجود ہے۔‘‘

پاکستان کے ساتھ ہی مصر، اردن، متحدہ عرب امارات، انڈونیشیا، ترکی، سعودی عرب اور قطر بھی 'بورڈ آف پیس‘ میں شامل ہو چکے ہیں جبکہ البانیہ، ارجنٹینا، ہنگری، اسرائیل، قزاقستان، پیراگوئے اور ازبکستان بھی اس بورڈ میں شامل ہونے کی تصدیق کر چکے ہیں۔

تقریباً 60 حکومتوں کو اس میں شامل ہونے کی دعوت دی گئی ہے، لیکن واشنگٹن کے چند ہی مغربی اتحادیوں نے عوامی طور پر اسے قبول کیا ہے۔

ادارت: صلاح الدین زین