پیٹرول مزید مہنگا، پاکستانی عوام شدید مشکل میں
21 ستمبر 2022
سیلاب سے متاثرہ پاکستانی عوام پر حکومت کی جانب سے ''مہنگائی کا ایک اور بم‘‘ گرا دیا گیا ہے۔ ملک میں پیٹرول کی قیمتوں میں مزید ایک روپے 45 پیسے فی لیٹر کا اضافہ کیا گیا ہے، جس کے بعد ملک میں پیٹرول کی نئی قیمت 237.43 روپے فی لیٹر ہو گئی ہے۔ دوسری جانب لائٹ ڈیزل کی قیمت میں 4.26 روپے فی لیٹر اور مٹی کے تیل کی قیمت میں 8.30 روپے فی لیٹر کی کمی کی گئی ہے۔
پاکستانی حکومت کا کہنا ہے کہ پیٹرولیم مصنوعات کی قیمتوں میں اضافے کی وجہ تیل کی عالمی قیمتوں میں اتار چڑھاؤ اور شرح مبادلہ میں تبدیلی ہے۔
پاکستان میں حالیہ سیلاب اور بارشوں کے بعد ملک کو شدید جانی اور مالی نقصان کا سامنا ہے۔ مون سون کی شدید بارشوں کے بعد سیلاب میں 1500 سے زائد افراد ہلاک اور تقریباً 33 ملین افراد متاثر ہوئے ہیں۔ ملک میں اس سال مون سون کی یہ بارشیں معمول سے 190 فیصد زیادہ ہوئی ہیں۔ اس صورتحال نے ملک کو معاشی تباہی کے دہانے پر لا کھڑا کیا ہے۔
پیٹرول کی قیمت بڑھتے ساتھ ہی عوام اور اپوزیشن کی جانب سے سوشل میڈیا پر بھی ایک طوفان برپا ہو گیا ہے۔
پاکستان تحریک انصاف (پی ٹی آئی) کے رہنما فواد چوہدری کا کہنا ہے کہ دنیا میں پیٹرول اور پام آئل کی قیمتیں کریش کر چکی ہیں تاہم پاکستان میں عوام پر پھر 'پیٹرول بم‘ گرا دیا گیا ہے۔
سابقہ ریلوے منسٹر شیخ رشید نے اپنے ایک ٹویٹ کے ذریعے عوام سے سوال کیا کہ بڑھتی ہوئی مہنگائی کے پیش نظر اب ملک کو الیکشن کی طرف جانا ہے یا بند گلی کی طرف؟
تاہم موجودہ حکومتی پارٹی پاکستان مسلم لیگ ن کے کسی سرکردہ رکن کی جانب سے سوشل میڈیا پر اس حوالے سے اب تک کوئی پیغام سامنے نہیں آیا۔ ماہرین کا خیال ہے کہ پاکستان میں گزشتہ 15 دنوں کے دوران روپے کی قدر میں بڑے پیمانے پر کمی کے علاوہ سیلز ٹیکس کے متوقع نفاذ اور پیٹرولیم ٹیکس میں مزید اضافے کی وجہ سے پیٹرولیم مصنوعات کی قیمتوں میں مزید اضافہ ممکن ہے۔