اسلام آباد خودکش دھماکے میں مدد کا شبہ، چار افراد گرفتار

پاکستانی وزیر داخلہ محسن نقوی نے ہفتے کے روز بتایا کہ اسلام آباد میں گزشتہ روز ہوئے دہشت گردانہ حملے سے تعلق کے شبے میں چار افراد کو گرفتار کر لیا گیا ہے۔ اسلام آباد کے نواح میں ایک شیعہ مسجد ہوئے نماز جمعہ کے وقت ہوئے خود کش حملے میں تیس سے زائد افراد ہلاک اور ایک سو ساٹھ سے زائد زخمی ہو گئے تھے۔

محسن نقوی نے پریس کانفرنس میں کہا کہ گرفتار ہونے والوں میں مبینہ ماسٹر مائنڈ بھی شامل ہے، جنہیں پشاور اور نوشہرہ میں چھاپوں کے دوران حراست میں لیا گیا، ’’تکنیکی اور انسانی انٹیلی جنس کی بنیاد پر خیبر پختونخوا کے اضلاع پشاور اور نوشہرہ میں مشترکہ چھاپے مارے گئے، جن کے نتیجے میں چار سہولت کاروں کو گرفتار کر لیا گیا۔‘‘ اس کے علاوہ کراچی سے خود کش بمبار کے بہنوئی کو بھی حراست میں لیے جانے کی اطلاعات ہیں۔

ہفتے کے روز دارالحکومت میں ہونے والے اس خودکش حملے کے متاثرین کی نمازِ جنازہ میں ہزاروں افراد نے شرکت کی۔ 
دہشت گرد تنظیم داعش نے اس حملے کی ذمہ داری قبول کی ہے۔اس حملے کو سن 2008  میں میریٹ ہوٹل بم دھماکے کے بعد اسلام آباد کا سب سے خونریز واقعہ قرار دیا جا رہا ہے۔
 

وسطی سوڈان میں ہفتے کے روز نیم فوجی گروپ ریپڈ سپورٹ فورسز کے ایک ڈرون حملے میں بے گھر خاندانوں کو لے جانے والی ایک گاڑی کو نشانہ بنایا گیا، جس کے نتیجے میں کم از کم 24 افراد ہلاک ہو گئے، جن میں آٹھ بچے بھی شامل تھے۔

سوڈان ڈاکٹرز نیٹ ورک کے مطابق یہ حملہشمالی کردفان صوبے کے شہر رہاد کے قریب ہوا۔ متاثرہ گاڑی ان افراد کو لے جا رہی تھی جو دوبیکر کے علاقے میں جاری لڑائی سے جان بچا کر بھاگے تھے۔ کئی زخمیوں کو علاج کے لیے رہاد منتقل کیا گیا، جہاں پہلے ہی طبی سہولیات کی شدید کمی ہے۔

ڈاکٹروں کی تنظیم نے عالمی برادری اورانسانی حقوق کی تنظیموں سے مطالبہ کیا کہ وہ ’’فوری کارروائی کریں تاکہ شہریوں کو تحفظ دیا جا سکے اور RSF کی قیادت کو ان خلاف ورزیوں پر براہِ راست جواب دہ ٹھہرایا جائے۔‘‘

ریپڈ سپورٹ فورسز کی جانب سے فوری طور پر کوئی ردِعمل سامنے نہیں آیا۔ یہ گروہ گزشتہ تقریباً تین برس سے سوڈانی فوج کے خلاف اقتدار کی جنگ میں مصروف ہے۔

ہفتے کے روز شام اور سعودی عرب کے درمیان کئی معاہدوں پر دستخط ہوئے، جن میں ایک مشترکہ ایئرلائن اور ٹیلی کمیونی کیشن کے شعبے میں ایک ارب ڈالر کا منصوبہ بھی شامل ہے۔ حکام کے مطابق یہ اقدامات جنگ کے بعد شام کی تعمیرِ نو کی کوششوں کا حصہ ہیں۔
دسمبر 2024 میں طویل عرصے سے برسراقتدار بشار الاسد کی حکومت کے خاتمے اور اقتدار میں آنے والی عبوری شامی حکومت کی سعودی عرب ایک بڑا حمایتی رہا ہے۔

دمشق میں نئی قیادت سرمایہ کاری کے حصول کے لیے سرگرم ہے اور سعودی عرب سمیت خلیجی ممالک اور مختلف کمپنیوں کے ساتھ بڑے معاہدے کر چکی ہے۔

شامی سرمایہ کاری اتھارٹی کے سربراہ طلال الہلالی نے کئی معاہدوں کا اعلان کیا، جن میں ایک کم بجٹ شامی سعودی ایئرلائن بھی شامل ہے، جس کا مقصد علاقائی اور بین الاقوامی فضائی روابط کو مضبوط بنانا ہے۔

معاہدے کے تحت شمالی شہر حلب میں ایک نیا بین الاقوامی ہوائی اڈہ تعمیر کیا جائے گا جبکہ موجودہ ہوائی اڈے کو بھی ازسرِنو ترقی دی جائے گی۔

الہلالی نے ’’سلک لنک‘‘ نامی منصوبے کا بھی اعلان کیا، جس کے ذریعے شام کے ٹیلی کمیونی کیشن انفراسٹرکچر اور ڈیجیٹل کنیکٹیویٹی کو بہتر بنایا جائے گا۔

اسلامک اسٹیٹ کی پاکستان میں سرگرم ذیلی شاخ نے اسلام آباد کے مضافات میں واقع ایک شیعہ مسجد پر ہونے والے خودکش حملے کی ذمہ داری قبول کر لی ہے، جس میں کم از کم 36 افراد ہلاک اور 169 زخمی ہوئے۔ تنظیم کے مطابق حملہ آور نے مرکزی دروازے پر سکیورٹی اہلکاروں پر فائرنگ کی اور اندرونی گیٹ تک پہنچ کر خود کو دھماکے سے اڑا لیا۔

ہفتے کے روز ہلاک ہونے والے ان افراد کی نماز جنازہ سخت سکیورٹی میں ادا کی گئی، جس میں ہزاروں سوگوار شریک ہوئے۔ حکام کے مطابق حملہ آور پاکستانی شہری تھا، جو حال ہی میں افغانستان گیا تھا، جبکہ رات گئے چھاپوں میں اس کے قریبی رشتہ داروں سمیت کئی مشتبہ افراد کو گرفتار کیا گیا۔ 

یہ حملہ دو ہزار آٹھ میں میریٹ ہوٹل پر ہونے والے حملے کے بعد اسلام آباد کا سب سے خونریز واقعہ قرار دیا جا رہا ہے اور ایسے وقت میں پیش آیا ہے جب وزیر اعظم شہباز شریف کی حکومت کو ملک بھر میں بڑھتی عسکریت پسندی کا سامنا ہے۔ میریٹ حملے میں کم از کم 63 افراد ہلاک ہوئے تھے۔ وزیر دفاع خواجہ محمد آصف نے کہا کہ افغانستان سے سرگرم شدت پسند اب دارالحکومت تک حملے کر رہے ہیں، جس پر افغان طالبان نے ردِعمل دیتے ہوئے الزام کو ’’غیر ذمہ دارانہ‘‘ قرار دیا۔

امریکہ، روس، بھارت اور یورپی یونین نے اس دہشت گردانہ واقعے کی مذمت کی ہے۔ وزیر اعظم شہباز شریف نے عالمی ہمدردی پر شکریہ ادا کرتے ہوئے کہا کہ دہشت گردوں کو انصاف کے کٹہرے میں لایا جائے گا۔

داعش ماضی میں بھی پاکستان کی شیعہ برادری کو نشانہ بناتی رہی ہے، جن میں 2022 میں پشاور کی ایک مسجد پر خودکش حملہ بھی شامل ہے۔ 
 

روس نے یوکرین کے توانائی نظام پر بڑے پیمانے پر نئے حملے کیے ہیں، جن میں پاور گرڈ، بجلی گھروں اور سب اسٹیشنز کو نشانہ بنایا گیا۔ یوکرینی صدر وولودیمیر زیلنسکی کے مطابق رات بھر ہونے والے حملوں میں 400 سے زائد ڈرونز اور تقریباً 40 مختلف اقسام کے میزائل استعمال کیے گئے۔

زیلنسکی نے سوشل میڈیا پلیٹ فارم ایکس پر بتایا کہ مغربی یوکرین کے علاقوں وولین، ایوانو فرانکیفسک، لویو اور ریونے میں توانائی کی تنصیبات کو نشانہ بنایا گیا۔ انہوں نے کہا کہ روس حقیقی سفارت کاری کا راستہ اختیار کر سکتا ہے، مگر وہ ہر روز نئے حملوں کا انتخاب کرتا ہے۔ انہوں نے امریکی ثالثی میں جاری مذاکرات کی حمایت کرنے والے ممالک سے اپیل کی کہ وہ ان تازہ حملوں پر ردِعمل دیں۔

صدر زیلنسکی نے زور دیا کہماسکو کو سرد موسم کو دباؤ کے ہتھیار کے طور پر استعمال کرنے سے روکنا ہو گا اور اس مقصد کے لیے یوکرین کو فضائی دفاعی نظام کے لیے مزید میزائل درکار ہیں۔

ان حملوں کے بعد ہمسایہ ملک پولینڈ میں بھی لڑاکا طیارے فضا میں بلند کیے گئے۔ پولستانی فوج کے مطابق اس تناظر میں فورسز اور ضروری وسائل کو متحرک کر دیا گیا ہے جبکہ زمینی فضائی دفاع اور ریڈار نظام الرٹ پر رکھے گئے۔ یوکرین کے مغربی علاقوں میں ان حملوں کے بعد مشرقی پولینڈ کے شہروں ژیشوف اور لوبلن کے ہوائی اڈوں پر فضائی آمدورفت عارضی طور پر معطل کرنا پڑی۔

بین الاقوامی کرکٹ کونسل (آئی سی سی) پاکستان کرکٹ بورڈ کے ساتھ بات چیت میں مصروف ہے تاکہ ٹی ٹوئنٹی ورلڈکپ کے سلسلے میں پندرہ فروری کو کولمبو میں ہونے والے اہم میچ کو بچایا جا سکے۔ پاکستان بھارت کے خلاف یہ میچ کھیلنے سے انکار کر چکا ہے۔

خبر رساں اداروں کے مطابق آئی سی سی کی باضابطہ خط و کتابت کے بعد پی سی بی نے آئی سی سی سے رابطہ کیا ہے۔ ذرائع کے مطابق عالمی ادارہ ٹکراؤ کے بجائے مذاکرات کے ذریعے مسئلہ حل کرنا چاہتا ہے۔

بھارت اور پاکستان کا مقابلہ کرکٹ کی دنیا کے سب سے منافع بخش میچز میں شمار ہوتا ہے، جس سے براڈکاسٹنگ، اسپانسرشپ اور اشتہارات کی مد میں کروڑوں ڈالر کمائے جاتے ہیں۔ تاہم یہ میچ اس وقت خطرے میں پڑ گیا جب پاکستان کی حکومت نے ٹیم کو کولمبو میں میچ کھیلنے سے روک دیا۔ 

یہ ٹورنامنٹ پہلے ہی سیاسی کشیدگی کی نذر ہو چکا ہے۔ سکیورٹی خدشات کے باعث بنگلہ دیش نے بھارت میں کھیلنے سے انکار کیا، جس کے بعد اس کی جگہ اسکاٹ لینڈ کو شامل کیا گیا۔ اس فیصلے کے خلاف احتجاجاً پاکستان نے گروپ اے میں میزبان بھارت کے خلاف میچ نہ کھیلنے کا اعلان کیا۔

پاکستان نے ٹورنامنٹ کے افتتاحی میچ میں نیدرلینڈز کو شکست دی ہے، مگر اگر بھارت کے خلاف میچ چھوڑ دیا گیا تو پاکستان کو دو قیمتی پوائنٹس سے ہاتھ دھونا پڑیں گے۔ ساتھ ہی نیٹ رن ریٹ کو بھی بڑا نقصان پہنچے گا۔ دوسری جانب بھارتی کپتان سریا کمار یادو کہہ چکے ہیں کہ ان کی ٹیم میچ کے لیے کولمبو جانے کو تیار ہے۔

واضح رہے کہ پاکستان اور بھارت گزشتہ ایک دہائی سے زیادہ عرصے سے دوطرفہ کرکٹ نہیں کھیل رہے اور دونوں ٹیمیں صرف عالمی یا علاقائی ٹورنامنٹس میں آمنے سامنے آتی ہیں، اسی لیے یہ میچ کھیل کے ساتھ ساتھ سیاسی اور معاشی لحاظ سے بھی غیر معمولی اہمیت رکھتا ہے۔

یوکرینی صدر وولودیمیر زیلنسکی کا کہنا ہے کہ امریکہ روس اور یوکرین پر دباؤ ڈال رہا ہے کہ وہ رواں برس جون تک جنگ ختم کر دیں۔ 

امریکی صدر ڈونلڈ ٹرمپ یوکرین اور روس کے درمیان گزشتہ چار برس سے جاری مسلح تنازعے کی خاتمے کی کوشش میں ہیں۔ زیلنسکی نے بتایا کہ امریکہ نے اگلے ہفتے فلوریڈا میں ممکنہ طور پر دونوں فریقین کے مابین مذاکرات کی میزبانی کرنے کی پیشکش کی ہے۔ 

امریکہ کی ثالثی میں یوکرینی جنگ کے خاتمے کے لیے حالیہ مہینوں میں کوششیں تیز ہوئی ہیں، جن کے تحت جنوری میں متحدہ عرب امارات کے دارالحکومت ابوظہبی میں مذاکرات کے دو دور ہو چکے ہیں، جن میں قیدیوں کے تبادلے میں تو پیش رفت ہوئی مگر جنگ کے خاتمے کے حوالے سے کوئی بڑی خبر  سامنے نہیں آئی۔

روس اس وقت یوکرین کے تقریباً 20 فیصد علاقے پر قابض ہے اور مشرقی ڈونیٹسک ریجن پر مکمل کنٹرول کا مطالبہ کر رہا ہے، جبکہ یوکرین کا مؤقف ہے کہ زمین چھوڑنے سے ماسکو کی حوصلہ افزائی ہو گی۔ کییف نے موجودہ فرنٹ لائن پر جنگ کو فوری طور پر روکنے کی تجویز دی ہے، جسے روس نے مسترد کر دیا۔
 

جرمن شہر میونخ میں آئندہ ہفتے ہونے والی میونخ سکیورٹی کانفرنس کے موقع پر دسیوں ہزار مظاہرین کے سڑکوں پر آنے کی توقع ہے۔ میونخ ڈسٹرکٹ انتظامیہ کے مطابق اب تک مختلف احتجاجی سرگرمیوں کے لیے مجموعی طور پر تقریباً 1 لاکھ 20 ہزار افراد نے شرکت کے لیے رجسٹریشن کروا رکھی ہے۔

آئندہ بدھ سے اتوار تک شہر بھر میں 21 احتجاجی تقاریب منعقد ہو رہی ہیں۔ حالیہ برسوں میں کانفرنس کے موقع پر مظاہروں میں نسبتاً کم لوگ شریک ہوتے رہے ہیں، مگر اس بار نمایاں طور پر زیادہ شرکت متوقع ہے۔

سب سے بڑا مظاہرہ چودہ فروری کو متوقع ہے، جہاں ایرانی حکومت کے مخالفین ریلی نکالیں گے۔ منتظمین کے مطابق اس احتجاج میں ایک لاکھ تک افراد شریک ہو سکتے ہیں۔ اسی دن شہر کے مرکز میں سکیورٹی کانفرنس کے خلاف ایک اور مظاہرہ ہوگا، جس میں تقریباً  چار ہزار افراد کی شرکت متوقع ہے۔

اس کے علاوہ جنگ مخالف ریلیاں اور دیگر مظاہرے بھی منصوبہ بندی میں شامل ہیں، جن میں ہر ایک میں تقریباً تین ہزار افراد رجسٹرڈ ہیں، جبکہ ایک مظاہرہ “ویکسین کے آزادانہ انتخاب” کے مطالبے پر بھی ہو گا۔

میونخ سکیورٹی کانفرنس ہر سال فروری میں میونخ کے بائریشر ہوف ہوٹل میں منعقد ہوتی ہے، جہاں دنیا کے اہم ترین سکیورٹی مسائل پر گفتگو کی جاتی ہے۔ ناقدین اسے ’’عالمی عسکریت پسندوں کا اجتماع‘‘ قرار دیتے ہیں۔

یہ کانفرنس 13 سے 15 فروری تک جاری رہے گی اور منتظمین کے مطابق 65 عالمی رہنما اس کانفرنس میں شریک ہو رہے ہیں۔ مہمانوں میں کئی وزرائے خارجہ اور وزرائے دفاع بھی شامل ہوں گے۔ نمایاں شرکاء میں امریکی وزیر خارجہ مارکو روبیو، یوکرینی صدر وولودیمیر زیلنسکی اور جرمن چانسلر فریڈریش میرس شامل ہیں۔پاکستانی وزیراعظم شہباز شریف کی بھی میونخ سیکورٹی کانفرنس میں شرکت متوقع ہے۔
 

امریکی صدر ڈونلڈ ٹرمپ نے کہا ہے کہ عمانی دارالحکومت مسقط میں ایران کے ساتھ ہونے والی بالواسطہ بات چیت ’’کافی اچھی‘‘ رہی ہے اور اگلے ہفتے مذاکرات کا ایک اور دور ہو گا۔ ایرانی وزیر خارجہ عباس عراقچی نے بھی گفتگو کے ماحول کو مثبت قرار دیتے ہوئے مذاکرات جاری رکھنے پر اتفاق کی تصدیق کی۔

یہ مذاکرات عمان کی ثالثی میں ہو رہے ہیں، جن میں امریکی وفد کی قیادت مشرق وسطیٰ کے لیے امریکی مندوب اسٹیو وٹکوف نے کی، جب کہ ان کے ہمراہ ٹرمپ کے داماد جیرڈ کشنر بھی ٹیم میں شامل تھے۔ بات چیت کا مرکزی موضوع ایران کا جوہری پروگرام رہا۔ مغربی دنیا کا الزام ہے کہ ایران جوہری ہتھیاروں کی تیاری کی کوشش میں ہے، جب کہ تہران اپنے جوہری پروگرام کو سویلین مقاصد کے لیے قرار دیتا ہے۔

مذاکرات کے فوراً بعد واشنگٹن نے ایران کی تیل برآمدات روکنے کے لیے نئی پابندیاں بھی عائد کر دی ہیں۔ صدر ٹرمپ نے ایک ایگزیکٹیو آرڈر کے ذریعے ایران کے ساتھ کاروبار کرنے والے ممالک پر بھی ممکنہ ٹیرف عائد کرنے کا اعلان کیا ہے۔ یہ بات اہم ہے کہ امریکہ نے اپنا طیارہ بردار بحری بیڑا ایران کے قریب پہنچا دیا ہے اور ٹرمپ نے خبردار کیا کہ اگر معاہدہ نہ ہوا تو ’’نتائج بہت سخت ہوں گے۔‘‘

فرانس سمیت مغربی ممالک نے ایران سے ’’عدم استحکام پیدا کرنے‘‘ سے باز رہنے کا مطالبہ کیا، جبکہ تہران نے دباؤ اور دھمکیوں کے بغیر مذاکرات جاری رکھنے کی امید ظاہر کی۔
 

اقوام متحدہ ایک اندرونی رپورٹ کے مطابق اقوام متحدہ کی لبنان میں عبوری فورس (UNIFIL) کے امن دستوں کو جنوبی لبنان میں گزشتہ ایک سال کے دوران اسرائیل کی جانب سے جارحانہ رویے میں غیر معمولی اضافے کا سامنا رہا ہے، جس میں ڈرون سے گرینیڈ پھینکنے اور مشین گن سے فائرنگ جیسے واقعات شامل ہیں۔

رپورٹ کے مطابق ایسے واقعات کی تعداد گزشتہ برس جنوری میں صرف ایک سے بڑھ کر دسمبر میں 27 تک پہنچ گئی، جبکہ سال کے آخری مہینوں میں براہ راست فائرنگ کے واقعات میں بھی تیزی سے اضافہ ہوا۔ امن دستوں کا الزام ہے کہ ان کارروائیوں کا مقصد امن مشن کو کمزور کرنا اور اقوامِ متحدہ کی ’’بلو لائن‘‘کے قریب اسرائیلی فوجی موجودگی کو مضبوط کرنا ہو سکتا ہے۔

اسرائیل نے ان الزامات کی تردید کرتے ہوئے کہا ہے کہ وہ UNIFIL کے خلاف کوئی مہم نہیں چلا رہا۔ 
 

کیوبا نے ایندھن کی شدید قلت کے پیشِ نظر ایمرجنسی اقدامات شروع کر دیے ہیں، جن میں عوامی ٹرانسپورٹ کی خدمات میں بڑی کمی، اسکولوں اور جامعات کے حوالے سے پابندیاں اور سیاحت کے محدود اختیارات شامل ہیں۔ حکومت کا کہنا ہے کہ یہ قدم بنیادی معاشی سرگرمیوں اور ضروری عوامی خدمات کو برقرار رکھنے کے لیے اٹھایا گیا ہے۔ 

امریکہ نے کیوبا کے خلاف ’انرجی بلاکیڈ‘ کا اعلان کیا ہے۔ یہ بات اہم ہے کہ وینزویلا کے سابق صدر مادورو کیوبا کے قریبی حلیف تھے، تاہم امریکہ کے ہاتھوں ان کی گرفتاری کے بعد وینزویلا سے کیوبا کے لیے ایندھن کی فراہمی رک گئی ہے۔ 

کیوبا کی حکومت نے ان امریکی پابندیوں کی وجہ سے بجلی کے نظام میں خرابی، خوراک و دواؤں کی کمی اور سیاحوں کی تعداد میں کمی جیسے چیلنجز بھی تسلیم کیے ہیں۔ کچھ علاقوں میں تعلیمی سرگرمیوں کو جزوی طور پر معطل کر دیا گیا ہے جبکہ عوام کو ایندھن کے شدید ہوتے ہوئے بحران کا سامنا ہے۔ 

بھارت اور امریکہ نے ایک عبوری تجارتی معاہدے کا فریم ورک جاری کیا ہے، جس کے تحت بھارتی مصنوعات پر امریکی ٹیرف 25 فیصد سے کم ہو کر 18 فیصد رہ جائے گا۔ یہ پیش رفت امریکی صدر ڈونلڈ ٹرمپ کے اس اعلان کے بعد سامنے آئی کہ بھارت روسی تیل کی خریداری روکنے پر آمادہ ہو گیا ہے۔

دونوں ممالک نے اس معاہدے کو ’’باہمی مفاد‘‘ میں قرار دیتے ہوئے ایک وسیع تر تجارتی ڈیل کی طرف بڑھنے کا عزم ظاہر کیا ہے، تاہم ایسی کسی ڈیل کو حتمی شکل دینے کے لیے مزید مذاکرات درکار ہوں گے۔ معاہدے کے تحت بھارت امریکی صنعتی اشیاء اور کئی زرعی مصنوعات پر بھی ٹیرف کم یا ختم کرے گا، جبکہ بھارت پانچ برس میں 500 ارب ڈالر کی امریکی مصنوعات خریدنے کا عندیہ دے رہا ہے۔

بھارتی وزیر اعظم نریندر مودی نے ٹرمپ کا شکریہ ادا کرتے ہوئے اسےدوطرفہ تعلقات میں گہرائی کی علامت قرار دیا، مگر بھارتی اپوزیشن نے کہا ہے کہ یہ ڈیل امریکہ کے حق میں ہے اور زراعت جیسے حساس شعبوں کو نقصان پہنچا سکتی ہے۔

ادھر بھارتی وزیر تجارت پیوش گوئل کا کہنا ہے کہ معاہدہ اہم زرعی و ڈیری مصنوعات کا تحفظ کرتا ہے اور اس سے امریکی منڈی بھارتی برآمدکنندگان کے لیے مزید کھل جائے گی، جس سے لاکھوں نئی نوکریاں پیدا ہو سکتی ہیں۔

اسی دوران بھارت نے حال ہی میں یورپی یونین کے ساتھ آزاد تجارتی معاہدہ بھی کیا ہے، جبکہ عمان کے ساتھ اقتصادی شراکت داری اور نیوزی لینڈ کے ساتھ فری ٹریڈ ڈیل پر بات چیت مکمل کر لی گئی ہے۔