Њусом го обвинува Трамп за политички мотивирана истрага
16 јуни 2026
Гувернерот на Калифорнија, Гевин Њусом, го обвини претседателот Доналд Трамп дека го користи Министерството за правда на САД за политички мотивирана истрага против него и неговата сопруга. Сојузните службеници во последните денови разговарале со членови од неговото семејството, пријатели и поранешни вработени, барајќи стари документи.
Како што објавува Њујорк тајмс, против Њусом се водат повеќе истраги, од кои една се фокусира на финансиите на неговата сопруга, Џенифер Зибел Њусом. Самиот Њусом рече дека истрагите не се водат затоа што полицајците пронашле кривично дело, туку затоа што се обидуваат да пронајдат. Трамп не го напаѓа само поради неговите „зајадливи твитови“, рече демократот во видео објавено на платформата X. „Јас сум цел бидејќи размислувам за претседателска кандидатура.“
Белата куќа ги упати прашањата од американските медиуми до Министерството за правда, кое одби да коментира.
Јавно воден политички судир
Њусом, член на Демократската партија, и Трамп долго време се во конфликт - често преку социјалните мрежи. Спорни прашања, меѓу другото, се климатските промени, изградбата на гасоводи или испраќањето војници од Калифорнија во Портланд. Во 2025 година, Трамп рече дека ќе го поддржи апсењето на Њусом за наводно попречување на имиграциските власти во Калифорнија. Њусом, од друга страна, повеќепати остро ги критикуваше постапките на агенцијата ИЦЕ.
Откако Трамп се врати во Белата куќа за втор мандат, Министерството за правда покрена кривични постапки против голем број негови наводни политички противници. Меѓу нив се поранешниот директор на ФБИ Џејмс Коми, главната обвинителка на Њујорк Летиција Џејмс и поранешниот советник за национална безбедност Џон Болтон. Министерството, исто така, покрена истраги против државните службеници кои заклучија дека Русија се мешала во претседателските избори во 2016 година.
Демократските пратеници, како и либералните донатори и организациите за собирање средства, исто така, беа цел на властите. Според податоците на Ројтерс објавени во ноември 2025 година, од почетокот на вториот мандат на Трамп, најмалку 470 лица, организации и институции биле предмет на одмазднички мерки.