ЕУ расправа за Западен Балкан

Австриската министерка за надворешни работи, Урсула Пласник, вчеравечер изјави дека чекорите на унијата преземени на почетокот на неделава во Луксембург јасно покажале оти европската перспектива за Балканот не е празно ветување, туку е нешто опипливо и вистинско. Тоа е сторено со договорот за членство на Хрватска, договорот за стабилизација со Албанија и давањето политички сигнал за Црна Гора, со кој на сите земји од унијата им е дадено зелено светло за билатерално признавање на таа земја,рече Пласник. Нејзините изјави се дадени по средбата на шефовите на дипломатии на унијата, кои синоќа се договорија и за помош за Србија со низа позитивни мерки. Предлог на еврокомесарот за проширување, Оли Рен, е Србија да подготви акционен план за постигн ување целосна соработка со Хашкиот трибунал, а ЕУ тоа да го поддржува и следи со ад-хок тело во кое би имало претставници на унијата, на високиот претставник Хавиер Солана и на Европската комисија. Рен смета дека обврската за соработка со Хаг е одговорност на Србија, но важно е и да и се помогне. Со посилната економска и трговска соработка важно е да се засилат и меѓучовечките односи, а во тој дел значајно е прашањето на визното олеснување, предочил Рен.