Иран: Трамп ги подгрева шпекулациите за копнена офанзива
30 март 2026
Американскиот претседател Доналд Трамп ги подгреа шпекулациите за копнена офанзива во Исламската Република Иран. Во интервју за весникот Фајненшл тајмс, Трамп неодредено рече: „Можеби ќе го освоиме островот Чарг, а можеби и не. Имаме многу опции“. Понатаму беше цитиран: „Тоа би значело и дека ќе мора да останеме таму некое време“.
Преку Чарг, остров во Персискиот Залив, Иран управува со околу 90 проценти од својот извоз на нафта. Според весникот, Пентагон наредил да се испратат околу 10.000 војници во регионот, обучени да ја освојат и обезбедат територијата.
Меѓутоа, нападот врз Чарг би бил ризичен. Експертите предупредуваат дека американските војници, по евентуалното заземање и окупација на островот, би биле лесна цел за иранските напади.
Трамп сака да дојде до иранската нафта
Трамп изјави за Фајненшл тајмс дека „најрадо“ би ја присвоил иранската нафта. Тој додаде: „Но, некои глупави луѓе во САД велат: 'Зошто го правите тоа?' Но, тоа се глупави луѓе“.
Според Трамп, индиректните преговори меѓу САД и Иран преку пакистански посредници напредуваат добро. Договор за прекин на огнот би можел да се постигне прилично брзо. Рокот за постигнување на можен договор истекува на 7 април, но Трамп веќе го одложи неколку пати. На тема примирјето со Иран рече и: „Ни останаа околу 3.000 цели - бомбардиравме 13.000 цели - а уште неколку илјади се пред нас“. Од почетокот на војната, Трамп повеќепати даваше контрадикторни изјави за планираното времетраење на војната и можните преговарачки решенија.
Тој, исто така, изјави за Фајненшл тајмс дека Иран сега дозволува 20 танкери со пакистанско знаме да поминат низ Ормускиот теснец - двојно повеќе од претходно. Според него, ова го одобрил претседателот на иранскиот парламент, Мохамед Багер Галибаф.
Во меѓувреме, меѓусебното гранатирање продолжува. Израел и САД започнаа заедничка војна против Исламската Република пред нешто повеќе од еден месец. Со денови пристигнуваат извештаи за можна копнена офанзива на американската војска во Иран. Пакистан се обидува да посредува, но Вашингтон и Техеран досега не започнаа директни преговори за завршување на војната.