′Yan sandan Najeriya sun ja damarar farautar ′yan Shi′a | Labarai | DW | 30.07.2019
  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

Labarai

'Yan sandan Najeriya sun ja damarar farautar 'yan Shi'a

'Yan sanda a Najeriya, sun bukaci jama'ar kasar da su taimaka masu a wani sabon shirinsu na kama 'ya'yan kungiyar Shi'ar nan ta malam Ibrahim el-Zakzaky.

Rundunar jami'an 'yan sanda a Najeriya, ta bukaci jama'ar kasar da su taimaka mata a wani sabon yunkurinta na kama 'ya'yan kungiyar Shi'ar nan ta malam Ibrahim el-Zakzaky a fadin kasar, kungiyar da hukumomin Najeriyar suka haramta ta a yanzu.

Haramta kungiyar Islamic Movemnet of Nigeria dai ya biyo wata zanga-zangar mako guda da ta kaure tsakaninta da jami'an 'yan sandan.

Shugaban 'yan sandan kasar Mohammed Adamu, yayin wani jawabin da ya yi wa manyan jami'an rundunar a yau, ya ce sun bude kofofin karbar bayanai daga 'yan Najeriya don gano duk inda 'ya'yan kungiyar manyansu da kananansu suke a kasar don hukunta su.

Shugaban 'yan sandan ya ce daga yanzu, ana daukar duk wani dan kungiyar karkashin malam el-Zakzaky a matsayin dan ta'adda, kuma haramun ne su gudanar da duk wani tattaki a Najeriyar.