Rasha ta kai hari a yayin ziyarar Guterres

A yayin da ake ci gaba da jin karar fashewa a wasu sassan Kyiv babban birnin kasar Ukraine, Sakatare Janar na MDD Antonio Gutteres yayi wata ganawa da Shugaba Volodymr Zelensky, yana mai baiyana takaici kan yadda Kwamitin Sulhu na majalisar ya gagara kawo karshen yakin da ya janyo asarar rayuka da jefa jama'a da dama cikin halin ha-ula'i in ji jami'in, furucin da ke zuwa bayan gane ma idanunsa ta'asar da rikicin ya haifar a Mariupol.

A nasu bangaren kuwa, masu bincike na kasar Ukraine sun gano laifukan yaki da suka haura 8,000 da ake zargin Rasha ta aikata tun bayan da ta soma mamayar Ukraine, Iryna Venediktova wata mai gabatar da kara a Ukraine ce  ta shaida wa tashar DW hakan. Laifukan sun hada da fyade da azabtarwa dama kashe fararen hula da kuma lalata abubuwan more rayuwa da gwamnati ta tanadar ma 'yan kasa.