Matashiya mai gyaran kwamfuta

Matashiyar mai suna A'isha Muhammad Lawal ta bayyana cewa ta fara wannan sana'ar tun tana karama, kasancewar ta taso a lokacin yayanta yana yin gyaran kwamfutar wanda a sanadiyyar haka ita ma ta tsinci kanta cikin sana'ar. Sannu a hankali A'isha ta bude shago mallakinta a cikin garin Bauchi. A'isha ta bayyana cewa cikin nasarorin da ta cimma a wannan sana'ar, har da tallafawa kannenta da iyayenta, baya ga dawainiyar kanta da take yi. Sai dai kuma duk da wadannan dimbin nasarori da A'isha ta samu a cikin gyaran kwamfutar da take yi, ta kuma bayyana cewa akwai matsaloli da suke kawo mata tarnaki a cikin harkar. Ahmad Muhammad matashi ne da ke aiki a karkashin A'isha, ya kuma bayyana cewa yana samun kwarewa a cikin sana'ar.