Ko Al-Sharaa ya fita daga al Qaeda da IS?

Birtaniyan ta kuma sanar a shafinta na Internet cewa, za ta cirewa ministan cikin gida na Siriyan Anas Khattab takunkumi. Duka mutanen biyu dai, sun fuskanci takunkumin karya tattalin arziki da ke da nasaba da kungiyoyin 'yan ta'addan IS da  al Qaeda.

Wannan na zuwa ne bayan Kwamitin Sulhu na Majalisar Dinkin Duniya ya janye nasa takunkumin da ya kakabawa shugaban na Siriya, gabanin ganawar Shugaba Ahmad al-Sharaa da takwaransa na Amurka Donald Trump a mako mai zuwa.

Shugaba al-Sharaa da a baya aka sani da Abu Mohammad al-Julani ya zamo shugaban Siriya ne a watan Janairu, bayan kifar da gwamnatin kama-karyar kasar ta Bashar al-Assad a watan Disambar bara karkashin jagorancin kungiyarsa ta Hayat Tahrir al-Sham wato HTS.