انڈونیشی آبدوز کا رابطہ منقطع، تریپن افراد لاپتہ
21 اپریل 2021انڈونیشی بحریہ نے اپنی لاپتہ ہو جانے والی آبدوز کی تلاش شروع کر دی ہے۔ آبدوز تینتالیس برس قبل تیار کی گئی تھی۔ اس آبدوز کا نیول ہیڈ کوارٹرز سے رابطہ بدھ اکیس اپریل کو منقطع ہوا تھا۔ اس پر تریپن افراد سوار ہیں۔
جرمنی اسرائیل کو چھٹی ڈولفن آب دوز فرام کرے گا
جنگی مشق کے دوران لاپتہ
یہ آبدوز جزیرہ بالی کے شمال میں واقع سمندری علاقے میں تارپیڈو کی مشقوں میں مصروف تھی۔ انڈونیشی نیوی کے ترجمان کا کہنا ہے کہ مشقوں میں آبدوز مطلوبہ نتائج دینے میں ناکام رہی تھی۔
انڈونیشی فوج کے سربراہ ہادی جاہجانتو نے ایک پیغام میں واضح کیا کہ آبدوز کی تلاش جزیرہ بالی کے سمندری پانیوں میں قریب چھیانوے کلومیٹر کی دوری پر کی جا رہی ہے۔ انہوں نے اپنے اسی پیغام میں تریپن افراد کے لاپتہ ہونے کی تصدیق بھی کی۔ اس مناسبت سے مزید اطلاعات جمعرات کو فراہم کی جائیں گی۔
خلیج میکسیکو میں ایک نیا آپریشن شروع
تلاش میں امداد کی درخواست
جکارتہ حکومت نے لاپتہ ہو جانے والی آبدوز کو ڈھونڈنے میں سینگاپور اور آسٹریلیا سے مدد کی درخواست کی ہے۔ بحریہ کے مطابق اس آبدوز کا رابطہ اکیس اپریل کی علی الصبح ساڑھے چار بجے کنٹرول روم سے ٹوٹ گیا تھا۔
اس مناسبت سے انڈونیشی فوج کے سربراہ نے آسٹریلیا اور سینگاپور کے دفاعی محکموں کو تلاش میں مدد کرنے کی درخواست کی ہے۔ ان دونوں ملکوں کی جانب سے اس مدد کی درخواست کے حوالے سے کوئی ردعمل سامنے نہیں آیا ہے۔
جرمن ساختہ آبدوز
جو انڈونیشی آبدوز لاپتہ ہوئی ہے، اس کا سرکاری نام 'آر آئی نانگ گالا 402' ہے۔ اس کا وزن ایک ہزار تین سو پچانوے ٹن ہے۔ اس کو جرمنی میں سن 1978 میں تعمیر کیا گیا تھا۔ گزشتہ برسوں میں سن 2012 میں یہ آبدوز جنوبی کوریا میں دو سال تک مرمت کے لیے بھی بھیجی گئی تھی۔ اس وقت ایسی پانچ آبدوزیں انڈونیشی فلیٹ کا حصہ ہیں۔
ایئر ایشیا کا مسافر بردار طیارہ لاپتہ
یہ امر اہم ہے کہ انڈونیشیا کے آبدوزوں کے بیڑے میں ایک درجن سب میرینز سابقہ سوویت یونین سے خرید کر بھی شامل کی گئی تھیں۔ یہ انڈونیشیا کے ہزاروں جزائر میں گشتی فرائض سرانجام دیتی ہیں۔
ع ح، ا ا (روئٹرز، اے ایف پی)