برطانیہ نے حماس پر پابندی عائد کر دی

فلسطینی علاقے غزہ پر کنٹرول رکھنے والی انتہا پسند عسکری و سیاسی تنظیم حماس کی مختلف عسکری سرگرمیوں کے تناظر میں برطانیہ نے اس پر پابندی عائد کر دی ہے۔ اس تنظیم کو برطانوی دہشت گردانہ قانون کے تحت ممنوعہ تنظیم قرار دے دیا گیا ہے اور جلد ہی اس پابندی کے فیصلے کو حتمی اور قانونی شکل دینے کے لیے حکومت ملکی پارلیمنٹ سے رجوع کرنے والی ہے۔

غزہ میں حماس کا گارڈین لاء، خواتین کے لیے مشکلات کا باعث

برطانوی وزیر داخلہ کا بیان

خاتون وزیر داخلہ پریتی پٹیل نے اپنے بیان میں کہا کہ حماس واضح انداز میں دہشت گردانہ صلاحیتوں کی حامل ہے اور اس کی حساس ہتھیاروں کے وسیع ذخیرے تک رسائی بھی ہے۔ ان کا مزید کہنا تھا کہ حماس کے پاس جدید ہتھیار رکھنے کے ساتھ ساتھ دہشت گردی کی تربیت دینے کی سہولیات بھی موجود ہیں۔

پٹیل کا مزید کہنا تھا کہ ان حقائق کی روشنی میں حماس پر مکمل پابندی عائد کر دی گئی ہے۔ اس کا امکان ہے کہ وہ پابندی کو قانونی شکل دینے کا مسودہ اگلے ہفتے کے دوران ملکی پارلیمنٹ کے دارالعوام میں پیش کریں گی۔

یہ امر اہم ہے کہ اس مکمل پابندی سے قبل برطانیہ نے حماس کے عسکری ونگ عزالدین القسام بریگیڈ پر کچھ سال قبل پابندی عائد کی تھی۔

آتشی غباروں کے جواب میں غزہ پر اسرائیل کے فضائی حملے

پابندی کے اثرات

یہ پابندی برطانوی دہشت گردی کے قانون کے تحت لگائی گئی ہے اور اب کوئی بھی شخص اس تنظیم کی کھلے عام یا ڈھکے چھپے انداز میں حمایت نہیں کر سکے گا۔ اس کے علاوہ حماس کا جھنڈا لہرانے کی بھی ممانعت ہو گی۔

اس پابندی کے تحت کوئی بھی فرد حماس کے حوالے سے کسی قسم کی کوئی میٹنگ طلب یا اس کا انعقاد نہیں کر سکے گا۔ ایسے تمام عوامل کو ریاستی اعتماد شکنی کے زمرے میں لایا جائے گا۔ برطانوی وزارتِ داخلہ نے اس پابندی کی تصدیق کی ہے۔

حماس کا ردعمل

برطانیہ میں فلسطینی تنظیم کے سیاسی اہلکار سمی ابو زہری نے اس پابندی پر افسوس اور مایوسی کا اظہار کرتے ہوئے کہا کہ یہ فیصلہ پوری طرح جانبدارانہ ہے اور اس کا جھکاؤ واضح انداز میں اسرائیل کی جانب ہے۔ ان کا یہ بھی کہنا ہے کہ لندن حکومت کا اقدام اسرائیلی بلیک میل کی پالیسی کا تسلسل ہے۔

حماس کی جانب سے جاری کردہ بیان میں کہا گیا کہ قبضے کے خلاف ہر قسم کے ذرائع کے استعمال کی اجازت انٹرنیشنل قانون فراہم کرتا ہے۔

اسرائیلی وزیر اعظم کا خیر مقدم

برطانیہ کی جانب سے حماس پر عائد مکمل پابندی کیے جانے کا اسرائیلی حکومت نے خیرمقدم کیا ہے۔ اسرائیل کے وزیر اعظم نفتالی بینیٹ نے ایک ٹویٹ میں بیان کیا کہ حماس ایک دہشت گرد تنظیم ہے اور اس کے ذیلی عسکری گروپس اس کی پالیسیوں کو اپنی عملی سرگرمیوں سے مکمل کرتے ہیں۔

تیرہ برسوں میں غزہ کی چار جنگیں، اثرات کیا اور نقصانات کتنے؟

یہ امر اہم ہے کہ اسرائیل اور حماس کے درمیان رواں برس مئی میں جو شدید جھڑپیں ہوئیں تھیں، وہ گیارہ روز تک جاری رہی تھیں۔

ع ح/ع س (اے پی، روئٹرز)