Mawaziri wa mambo ya nje wa mataifa tajiri na yale yanayoinukia yakundi la G20 wanakutana katika mji wa mapumziko wa Bali nchini Indonesia kwa mazungumzo yanayotarajiwa kuangazia zaidi mgogoro nchini Ukraine licha ya ajenda inayolenga ushirikiano wa kimataifa na usalama wa chakula na nishati. Mkutano huo wa siku moja utafanyika kesho. Akisisitiza hali ya wasiwasi inayotanda kuhusiana na mkutano huo, waziri wa mambo ya nje wa China Wang Yi na mwanadiplomasia wa ngazi ya juu wa Urusi Sergey Lavrov walisimama katika miji mikuu mbalimbali ya Asia wakiwa njiani kuelekea Bali kupigia debe na kuimarisha uhusiano wao katika eneo hilo kabla ya mazungumzo hayo. Marekani na washirika wake wametafuta kumuadhibu rais wa Urusi Vladimir Putin kwa njia nyingi iwezekanavyo, ikiwa ni pamoja na kutishia kususia mkutano wa G20 mjini Bali mwezi Novemba iwapo Putin hataondolewa kwenye mkutano huo.

Wachambuzi wa maswala ya mambo ya nje wanasema Urusi inapunguza kwa muda kasi ya mashambulizi yake katika eneo la mashariki mwa Ukraine ili kupata nafasi ya kujenga nguvu zaidi kwa ajili ya kufanya mashambulizi muhimu yatakayoleta, haya yakiwa mashambulizi ya kuishinda nchi hiyo jirani.Taarifa iliyotolewa leo na wizara ya ulinzi ya Urusi inaonekana kuthibitisha tathmini hiyo. Taarifa hiyo imesema kuwa vikosi vya kijeshi vya Urusi vilivyohusika katika mapigano nchini Ukraine vimepewa muda wa kupumzika. Ripoti hiyo iliyonukuliwa na shirika la habari la serikali ya Urusi Tass, imesema kuwa vikosi vilivyohusika katika mapambano ya operesheni maalumu ya kijeshi, vinachukuwa hatua ya kuimarisha uwezo wake wa mapambano. Wanajeshi hao wanapewa nafasi ya kupumzika, kupokea barua na mizigo kutoka nyumbani.

Huku Wakenya wakiungana na mataifa mengine Ulimwenguni kuadhimisha siku ya lugha ya Kiswahili, wananchi wa Mombasa eneo ambalo ni kitovu cha lugha ya Kiswahili wamehimizwa na viongozi wao kuzungumza, kusoma na kukienzi kiswahili na tamaduni zake kama ilivyokuwa zamani. Hii ni mara ya kwanza kwa Kiswahili kusherehekewa duniani tangu kutengewa siku yake maalum ya tarehe saba mwezi wa saba,Kauli mbiu ya mwaka huu ni Kiswahili kwa amani utangamano na maendeleo. Maadhimisho ya siku ya lugha ya Kiswahili mjini Mombasa yalianza mapema leo kwa msafara wa gwaride kutoka barabara ya Moi Mapembeni hadi hadi Swahilipot hub. Viongozi Mbalimbali wa Mombasa akiwemo anayewania kiti cha Ugavana Abdulswamad Nasir walifika na kujumuika na wananchi kuadhimisha siku ya Kiswahili. Baadhi ya Viongozi wamelaumu wanoaendekeza lugha za mitaani na kusema kuwa hatua hiyo inachangia kudorora kwa lugha ya kiswahili nchini. Vilevile kumekuwa na maonyesho ya vyakula vya Kiswahili, Mavazi, vyombo vya nyumbani, mijadala, midahalo, burudani la Kiswahili ikiwamo Taarab na Kirumbizi.

Halmashauri kuu ya Umoja wa Ulaya imetahadharisha leo kuwa bara Ulaya linakabiliwa na moja ya miaka yake migumu zaidi linapokuja suala la mikasa ya asili kama ukame na mioto ya mwituni kwa sababu ya ongezeko la mabadiliko ya tabianchi. Kamishna wa Umoja huo wa Ulaya Maros Sefcovic leo amewaambia wabunge kuwa ukame ulioko kwasasa barani Ulaya huenda ukawa mbaya zaidi kuwahi kutokea na kuongeza kuwa mioto inayoteketeza maeneo makubwa ya vijiji huenda ikaongeza hali mbaya ya hewa. Sefcovic ameongeza kuwa takwimu zinaonesha kwamba tangu mwaka 2017, kumekuwa na mioto mikubwa ya misitu kushuhudiwa barani Ulaya na kwamba kwa bahati mbaya, wanatarajia kwamba kipindi cha mioto cha mwaka 2022 huenda kikafuata mtindo huo. Sefcovic amesema tayari Umoja wa Ulaya unafadhili kupelekwa kwa zaidi ya maafisa 200 wa zima moto kutoka kote katika umoja huo kukabiliana na mioto nchini Ugiriki.

Maelfu ya mahujaji leo wameanza kuondoka kutoka mjini Makka nchini Saudi Arabia kabla ya kilele cha ibada ya kila mwaka ya hija ambayo imehudhuriwa na umati mkubwa licha ya janga la corona linaloendelea na joto kali. Wengi wa waumini wanasafiri kwa miguu kuelekea mji wa Miulio umbali wa kilomita saba kutoka kwenye msikiti mkuu wa Makka, eneo takatifu zaidi la Waislamu, ambako walizunguka al-Kaaba mwanzoni mwa ibada siku ya Jumatano. Hapo kesho Ijumaa itakuwa siku ya kilele cha ibada ya Hijja kwa kupanda Mlima Arafat, ambapo Mtume Muhammad anaaminika alitoa hotuba yake ya mwisho. Waumini watasali na kusoma Quran kwa saa kadhaa katika eneo la mlima huo na kulala katika maeneo ya karibu.Siku ya Jumamosi, watakusanya mawe na kufanya tukio ambalo ni ishara ya kumpiga mawe shetani. Umati wa watu unaoaminika kuwa zaidi ya milioni moja ni mkubwa zaidi kuhiji tangu mwaka 2019 baada ya miaka miwili ya janga la corona ambapo ni idadi kadhaa tu ya watu walioruhusiwa kushiriki.

Kupanda kwa bei ya chakula na nishati duniani kumewasukuma watu milioni 71 katika umaskini katika nchi maskini zaidi duniani. Haya ni kwa mujibu wa ripoti ya Shirika la Maendeleo la Umoja wa Mataifa UNDP iliyochapishwa hii leo. Ripoti hiyo imesema kuwa ongezeko la viwango vya umaskini katika mataifa yanayoimarika kiuchumi duniani katika kipindi cha miezi mitatu iliyopita limekuwa kwa haraka zaidi kuliko athari za janga la virusi vya corona na kuongeza kuwa ongezeko hilo la bei kwa kiasi fulani limechangiwa na vita nchini Ukraine. Mkuu wa shirika hilo la UNDP Achim Steiner, amesema ongezeko hilo la bei lisilo la kawaida linamaanisha kuwa kwa watu wengi duniani kote, chakula ambacho wangeweza kumudu jana hawawezi kumudu tena leo. Ripoti hiyo inasema kuwa miongoni mwa mataifa yanayokabiliwa na athari mbaya zaidi za ongezeko hilo la bei ni Armenia, Uzbekistan, Burkina Faso, Ghana, Kenya, Rwanda, Sudan, Haiti, Pakistan, Sri Lanka, Ethiopia, Mali, Nigeria, Sierra Leone, Tanzania na Yemen.